Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 19

Менель лангсо кеняркс Вавилононь лондадоманть кувалма

1Теде мейле мон маринь менельстэ ламо ломанень вайгелень кондямо покш увт. Вайгельтне морасть:
«Аллилуя*!
Идемась, шнамось ды виесь – минек Пазонть кедьсэ!
2Сонзэ кежень пандоматне алкукст ды видеть.
Сон судизе ине ускуриця аванть,
кона наксавтызе весе моданть эсензэ ускурямосонть.
Эсензэ важотнень верест валоманть кисэ
Пазось пандызе те аванть чумонзо».
3Ды таго марязевсть вайгельть: «Аллилуя! Палыця ошонть качамось кепедеви пингеде пингес!»4Комснилее сыре атятне ды ниле ракшань-ломанень кондямотне прасть инязоронь озамо таркасо аштиця Пазонть икелев, шнасть Сонзэ инексчинзэ ды кортасть: «Аминь, истя улезэ! Аллилуя!»5Мейле инязоронь озамо тарканть ёндо марятотсь кортыця вайгель:
«Пазонь весе важотне, Пазонь мелень ваныцятне,
инетнеяк, вишкинетнеяк, шнадо минек Пазонть!»

Вирезэнть урьвакстома чизэ

6Мейле мон маринь теке ламо ломанень вайгельть, теке ведьпрамонь кондямо увт, теке виев пурьгинень кондямо зэрть:
«Аллилуя! Минек Азоро Пазось,
Весеменькирдицясь, саизе Эсензэ кедьс инязорксчинть!
7Кенярдтано, кецятано
ды шнатано Сонзэ инексчинзэ,
эдь течи сась Вирезэнть урьвакстома шкась!
Ды одирьвазояк анокстызе прянзо:
8сон оршазь ванькс ды сияждыця оршамопельсэ,
кона теезь човине лияназонь коцтсто».
Те човине лияназонь коцтось – Пазонь ломантнень виде тевест.

9Мейле ангелэсь кармавтсь монень: «Сёрмадт: уцяскавт сеть, конат тердезь Вирезэнь урьвакстома чинь каванямонтень!» Ды седе тов сон поладсь: «Неть вана Пазонь виде валтнэ».

10Мон пульзинь ангелэнть пильгезэнзэ ды сюкониксэлинь тензэ, ансяк сон мерсь монень: «Вант, истя иля тейне! Мон Пазнэнь истямо жо важодицян, кодамат тонгак ды кемиця тонь ялгатне, конат ёвтнить Иисусто! Пазонтень сюконяк! Содак: Иисусто ёвтницятнесэ важоди теке жо Оймеялтось, кона максы вий пазмарицятнененьгак».

Ашо лишме лангсо ласте аштицясь

11Теде мейле мон неия панжозь менеленть ды вана тосо ашо лишме ды лангсонзо ласте аштиця. Ласте аштицянтень мерить Кемевикс ды Виде. Сон видекойсэ суди ломантнень ды тюрияк душманонзо каршо.12Сонзэ сельмензэ палыця толонь кондят, ды прясонзо инязоронь ламо каштазт, лангсонзо сёрмадозь лемезэ, конань кияк а содасы Эстедензэ башка.13Ланга оршамозо артозь верьсэ, ды Ластентень мерить Пазонь Вал.

14Сонзэ мельга мольсть ласте ашо лишме лангсо менелень ушмотне. Сынь оршазельть ашо, ванькс, човине лияназонь оршамосо.15Кургстонзо лисиль пшти торо, конаньсэ Сон пандсы кеженть весе раськетненень, ды карми кирдеме-ветямо сынст кшнинь мандосо. Винаумарень матрамо таркасонть пильгесэ лепшти Сон винаумартнестэ Весеменькирдиця Пазонь ацирьгадомань ды кежень пандомань вина.16Оршамопельганзо, пукшо видьганзо, сёрмадозь лемезэ: “Инязортнэнь Инязорось ды азортнэнь Азорось”.

17Мейле мон неинь чинть лангсо стядо аштиця ангел, кона виев вайгельсэ сеересь менель ёжова ливтниця весе нармунтненень: «Садо, пурнаводо вейс Пазонь анокставт покш каванямонтень!18Садо ярсамо кулозь инязортнэнь, ушмантнэнь ды сынст прявтнэнь, лишметнень ды ластетнень сывельдест; весе ломантнень: олячисэтнень ды уретнень, вишкинетнень ды инетнень сывельдест».19Ды мон неинь: идем ракшась, весе масторлангонь инязортнэ ды сынст ушмост пурнавсть вейс. Сынь сыргиксэльть тюреме ашо лишме лангсо Ластенть ды Сонзэ ушмонть каршо.20Ансяк идем ракшась кундазель, мартонзо кенгелиця пазмарицяськак, кона тейнесь сонзэ икеле тамашат, ды сынст вельде ветясь манчемас сетнень, конат путсть эстест идем ракшань тешксэнть ды сюконякшность сонзэ чопачантень. Сынь кавонест живстэ ёртозельть кирвитолсо ды палыкандалсо палыця эрькентень.21Ятонь ушмотнестэ кадовикстнэ маштнезельть Ластенть кургсто лисиця торосонть, ды весе нармунтне пештизь пекест сынст сывельдест.


предыдущая глава Глава 19 следующая глава