Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 16

Пазонь инекежсэ пештязь сисем вакант

1Мон маринь Пазонь кудосто гайгиця виев вайгель, кона кортась сисем ангелтнэнень: «Азёдо ды валынк мода лангс Пазонь инекежень сисем вакантнэнь!»

2Лиссь васенце ангелэсь ды валызе эсь ваканонзо мода лангс. Нулгодькс ды пиштевтиця сыявкст лиссть сеть ломантнень лангс, конат тешкстазельть идем ракшанть тешкссэ ды сюконякшность сонзэ чопачантень.

3Омбоце ангелэсь валызе эсь ваканонзо иневедь лангс. Ведесь теевсь прок кулозень верекс, ды иневедень эрицятне весе кулость.

4Колмоце ангелэсь валызе эсь ваканонзо лейтнес ды лисьмапрятнес, ды сыньгак теевсть верекс.5Ды мон маринь, кода ведень ангелэсь кортась Пазонтень:
«Неть Тонь кежень пандоматне,
конатнень Тон кучить, видеть!
Виде Тон, Азоро, кона свал ули ды ульнесь,
ды иневаньксат секс, мекс истя судят!
6Сынь валсть Тонь ломантнень ды пазмарицятнень верест.
Секскак Тон сынст симдить верде.
Тевест коряс тенст истя эрявияк!»
7Ды мон маринь алтарьстэ лисиця лия вайгель:
«Алкукс истя, Азоро Пазось, Весеменькирдиця!
Алкукст ды видеть Тонь кежень пандоматне!»

8Нилеце ангелэсь валызе эсь ваканонзо чинть лангс, ды чинтень максозель вий эсензэ толонь псисэнть пултамс ломантнень.9Ломантне пицевсть те виев псиденть ды сюдость-покордасть Пазонть, конань ульнесь кирдемавиезэ неть зыянтнэнь лангсо. Ялатеке сынь эзизь кадо пежетест ды эзть шна Пазонть инексчинзэ.

10Ветеце ангелэсь валызе эсь ваканонзо идем ракшань инязоронь озамо тарканть лангс, ды сонзэ инязорксчинь масторозо копачавсь чоподачисэ. Неть пиштематнеде ломантне порсть эсь келест11ды ялатеке сюдость-покордасть менелень Пазонть эсест сыявксост ды майсемаст кис. Ансяк сынь ялатеке эзизь кадо пежетев киява молемаст.

12Вана котоце ангелэсь валызе эсь ваканонзо ине Эвфрат леентень, ды коськсь леенть ведесь. Истя панжовсь кись чилисема ёндонь инязортнэнень.13Ды мон неинь ватракш ёнов молиця колмо аванькс оймеялтт, конат лиссть инегуенть, идем ракшанть ды кенгелиця пазмарицянть кургосто.14Неть ульнесть идемевсень оймеялтт, тамашань тейницят. Сынь сыргасть пурнамо весе масторлангонь инязортнэнь тюремас. Те тюремась ули Весеменькирдиця Пазонть ине судямо чистэнть.15Иисус Христос корты: «Кунсолодо! Мон сан апак учо, прок салыця. Уцяскав се, кона а уды ды аноксты эсензэ оршамонзо. Сон а карми якамо штапо, ды сонензэ а сави визделгалемс весень сельме икеле!»16Ды сон пурнынзе инязортнэнь се таркантень, конанень евреень кельсэ мерить Армагеддон.*

17Сисемеце ангелэсь валызе эсь ваканонзо коштс. Менелень Пазонь кудостонть, инязоронь озамо тарканть лангсто, каятотсь виев вайгель: «Топавтовсь!»18Ды неявсть ёндолонь кивчкаемат, марявсть сееремат, пурьгинень зэрть ды кепететсь модань покш сорнома. Истямо покштояк покш модань сорнома арасель се шкастонть саезь, зярдо ломанесь кармась эрямо мода лангсо!19Модань сорномадонть ине ошось лазовсь колмо пельксэв. Ды весе масторлангонь раськетненьгак ошост лондадсть. Пазонть мельс ледсь Вавилон ине ошось, ды Вавилоннэнь савсь симемс Пазонь ацирьгадомань ды инекежень винадо пештязь кеченть потмаксос.20Ды иневедень весе усиятне ёмасть, ды пандтнэяк а мукшновить.21Менельстэ прась ломантнень лангс виев цярахман, ды эрьва цярахман эрьгенть сталмозо – ниле пондт*. Ломантне сюдость-покордасть Пазонть зыянонть кисэ, конань теизе цярахманось, эдь те зыянось ульнесь покштояк покш!


предыдущая глава Глава 16 следующая глава