Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 15

Сисем ангелт, сисем зыянонь кандыцят

1Мейле мон неинь менельстэ таго вейке ине ды абунгавтыця тешкс: сисем ангелт, конат кандсть сисем зыянт. Неть зыянтнэ – меельцеть, эдь сынст эйстэ топавтови Пазонь инекежесь.2Ды мон неинь прок тол марто човорязь суликань кондямо иневедь. Те иневеденть чиресэ аштесть идем ракшань изницятне, конат эзть сюконякшно сонзэ чопачантень ды эзть сова те тешксэнть алов, кона невтсь сонзэ лемень цисланть. Сынь кирдсть кедьсэст Пазонь максовт кайгат ды3морасть Моисеень, Пазнэнь важодицянь ды Вирезэнь шнамо морост:
«Инеть ды абунгавтыцят Тонь теветь,
Азоро Паз, Весеменькирдиця!
Видеть ды алкукст Тонь кить-янот,
Пазонь ломантнень Инязоро!
4Кие а пелезеви Тонь эйстэ, Азоро?!
Кие а шнасы Тонь лементь инексчинзэ?!
Эдь ансяк Тон ськамот иневаньксат!
Весе масторлангонь раськетне сыть
ды прыть Тонь икелев кумажа лангс!
Эдь Тонь виде тевтне ней кармасть неявомо!»

5Теде мейле мон неинь, кода панжовсь менельсэ иневанькстэяк иневанькс таркась Пазонь кудосо,6ды тосто лиссть сисем зыянонь кандыця ангелт. Ангелтнэ оршазельть ванькс ды цитниця лияназонь оршамосо ды карксазельть мештева сырнень каркссо.7Мейле ниле ракшань-ломанень кондятнэстэ вейкесь венстясь эрьва ангелэнтень сырнень вакан, пештязь пингеде пингес эриця Пазонть инекежсэ.8Ды Пазонь кудосо иневанькстэяк иневанькс таркась пешкедсь качамосо Пазонь инексчиденть ды вийденть. Секскак кияк эзь соваво Пазонь кудонтень се шкас, зярс эзть топавтово сисем ангелэнь кандовт сисем зыянтнэ.


предыдущая глава Глава 15 следующая глава