Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 12

Тейтерьава ды инегуй

1Ды неявсь менель лангсо ине дивань тешкс: чипайсэ оршазь тейтерьава. Сонзэ пильгензэ ало ульнесь ковось, прясонзо кемгавтово тештестэ каштаз.2Тейтерьавась пешксесэль, ды сась уш чачтома шказо: сон пек майсесь ды пижнесь чачтомань сэредькстэнть.3Ды вана лиссь менель лангс лия тешкс: покштояк покш якстере инегуй, сисем пря ды кемень сюро марто. Эрьва прянть лангсо ульнесь инязоронь каштазке.4Инегуесь пулосонзо тенсезь тенсинзе весе менелень тештнень колмотькс пельксэст ды ёртынзе сынст мода лангс. Сон стясь чачтыцянть икелев ды учось эйденть чачоманзо: эдь ульнесь покш мелезэ сеске сэвемс эйденть.5Авась чачтась эйде, цёрыне, конась карми весе раськетнень кирдеме-ветямо кшнинь мандосо. Эйкакшось нейке каподезель Пазонтень, ды Сонзэ инязоронь озамо таркантень.6Сонсь авась оргодсь чаво мода лангов, козо Пазось анокстакшнось тензэ эрямо тарка. Тосо кармить мельганзо якамо тёжа кавтосядт кодгемень чинь перть.

7Те шкастонть менельсэ ушодовсь тюрема: Михаил ды сонзэ ангелтнэ тюрсть инегуенть каршо, кона эсь ангелэнзэ марто тюрсь сынст каршо.8Ды инегуесь ульнесь изнязь, ды сон ангелэнзэ марто ёмавтызе эсь тарканзо менель лангсо.9Те покштояк покш инегуесь, кезэрень гуесь, конанень мерить Идемевсь эли Сатана, весе ломаньлувонь манчицясь, ульнесь ёртозь мода лангс весе ангелэнзэ марто.10Ды мон маринь менельстэ виев вайгель, кона кортась:
«Окойники сась Пазонь пельде идемась!
Ней Сон нолдызе тевс Эсь Инязорксчинь виензэ!
Ды Сонзэ кучовт Идицянть ули азорксчизэ!
Эдь минек кемиця ялгатнень чумондыцясь,
кона чинек-венек сынст чумондсь Пазонок икеле,
ней ёртозь менельстэ.
11Вирезэнь верьсэнть ды Пазонь валонь пачтямосонть
минек кемиця ялгатне изнизь инегуенть.
Сынь эзть пеле куломадо,
ды ульнесть анокт максомс эсь эрямосткак.
12Секскак кенярдт, менель ды весе тонь эрицятне!
А мода масторонь ды иневедень эрицятненень – зыян!
Эдь тыненк валгсь Идемевсесь,
пештязь ине кежсэ,
эдь сон соды: сонзэ шказо эль прядови!»

13Зярдо инегуесь неизе эсь прянзо мода лангс ёртозекс, сон напустясь аванть мельга, кона чачтызе цёрыненть.14Авантень макссть ине куцьканонь кавто сёлмот ливтямс чаво модасо анокстазь таркантень, ков а пачкодеви гуесь ды косо кармить аванть мельга якамо колмо пель марто иеть.15Гуесь киргакстсь кургстонзо аванть мельга чадыведень лей сонзэ саламга-ёмавтомга.16Ансяк модась лездась авантень: сон панжинзе турванзо ды симизе леенть, конань киргакстызе кургстонзо инегуесь.17Инегуесь азаргадсь аванть лангс ды тусь тюреме сонзэ лия эйкакштнэнь каршо, конат топавтыть Пазонь кармавтовкстнэнь ды Иисус Христосонь виде тонавтоманть.


предыдущая глава Глава 12 следующая глава