Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 7

Пазонь ломанень промкс

1Теде мейле мон неинь ниле ангелт, конат стядо аштесть модань ниле ёнкстнэва. Сынь кирдсть модань ниле варматнень ды эзть максо тенст пувамс моданть лангс, иневеденть лангс ды кодамояк чувто лангскак.2Ды мон неинь лия ангел, кона кепедевсь чилисема пельде ды конань кедьсэ ульнесь эриця Пазонть тешкстамопель. Ангелэсь виев вайгельсэ серьгедсь ниле ангелтнэнень, конатненень мерезель теемс зыян модантень ды иневедентень:3«Илядо тее зыян модантень, иневедентень ды чувтнэненьгак, зярс минь а тешкстасынек минек Пазонть весе важотнень коняст тешкстамосо!»4Ды мон маринь, зярот ульнесть тешкстазь Пазонь тешкстамосо. Тешкстазтнеде ульнесть сядо ниленьгемень ниле тёжат Израилень весе буетнестэ-раськетнестэ.5Тешкстазтнеде ульнесть кемгавтово тёжат эрьва буенть ютксто: Иудань, Рувинэнь, Гадонь,6Асирэнь, Нафталинь, Манассень,7Симеононь, Левинь, Исаскаронь,8Завулононь, Иосифень ды Вениаминэнь буенть ютксто.

9Мейле мон неинь покштояк покш промкс. Тосо ульнесть ламодояк ламо ломанть – сынь киненьгак эзть ловново. Сынст ютксо ульнесть эрьва кодамо буень, раськень, масторонь ды эрьва кодамо келень ломанть. Сынь аштесть инязоронь озамо тарканть ды Вирезэнть икеле, оршазельть ашо оршамосо, ды кедьсэст кирдсть пальмань тарадт.10Сынь покш вайгельсэ сеересть:
«Минек Пазонть кедьсэ,
кона озадо ашти инязоронь озамо таркасо,
ды Вирезэнть кедьсэ
минек идеманок!»
11Ды весе ангелтнэ, конат стядо аштесть инязоронь озамо тарканть перька, сыре атятнень ды ниле ракшань-ломанень кондятнэнь перька, прасть инязоронь озамо тарканть икелев ды шнасть Пазонть инексчинзэ.12
«Аминь, улезэ истя! – кортасть сынь. –
Чанстямо-баславамо ды инексчи,
ине превть ды сюкпря,
шнамо, вий ды нарде
улезэ минек Пазонтень
пингеде пингес! Аминь».

13Сыре атятнестэ вейкесь кевкстимим монь: «Кить неть ашо оршамосо оршазь ломантне ды косто сынь састь?»14Тень каршо мон меринь: «Мон а содан. Теде тон содат, покштяй». Сон кортась монень:
«Нетне сеть, конат печтясть ине пиштемань шка.
Сынь муськизь-ванськавтызь эсест оршамопелест
ды ашолгавтызь Вирезэнь верьсэнть.
15Секскак сынь Пазонь инязоронь озамо тарканть икеле
ды чинек-венек важодить Тензэ Сонзэ кудосо.
Инязоронь таркасо Озадось карми эрямо ютксост
ды карми ванстомо сынст.
16Ды ней сынст зярдояк а стардсынзе вачочись
ды симемань самось.
Сынст а пултасынзе чипаесь,
а чентясынзе псись.
17Эдь Вирезэсь инязоронь озамо тарканть куншкасто
карми ваномо сынст мельга
ды ветясынзе лисьмапрятнес,
конатнестэ чуди эрямо ведь.
Ды Пазось нардасы сынст сельместэст эрьва сельведьэрьгиненть».


предыдущая глава Глава 7 следующая глава