Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 9

1Зэрнезевсь ветеце ангелэнть торамось, ды мон неия менельстэ мода лангс празь тештенть. Сонензэ макссть тоначинь потмакстомо отьманть эйстэ панжома.2Тештесь панжизе потмакстомо отьманть, ды тосто кармась лисеме тусто качамо, прок покштояк покш каштомосто. Те качамодонть чипаесь ды коштоськак чополгадсть.3Ды качамостонть моданть лангс лиссть пек ламо тастат. Сыненст макссть истямо жо пупамовий, кодамо ули мода лангсо сялгопуло шанжавтнэнь.4Тастатненень кармавтозель а тееме зыян модалангонь тикшетнененьгак, кодаткак пиже лисевкстнэненьгак ды чувтнэненьгак, ансяк сеть ломантненень, конатнень конясо арасель Пазонть тешксэзэ.5Тастатненень эзть мере маштнеме неть ломантнень, кармавтозель ансяк пиштевтемест сынст вете ковонь перть. Те пиштемась ульнесь истямо, кода сялгопуло шанжавдо пиштемась, зярдо сон пупасы ломаненть.6Се шкастонть ломантне кармить вешнеме куломанть, ансяк а мусызь сонзэ. Сынь тердить куломанть, ансяк куломась оргоди эйстэст.

7Тастатне неявсть прок тюремас анокстазь лишметь, пряваст – прок сырнень каштазт, сынст чачост – ломанень кондямот,8черест кувакат, кода аватнень, пеест прок левень.9Лангсост ульнесть прок кшнистэ теезь панарт. Сынст сёлмонь либордомань увтост ульнесь истямо зэртекс, теке кильдезь ушмокрандазтнэс, ламо лишметь ардыть тюремас.10Сынст пулост ды сялгост, кода сялгопуло шанжавтнэнь, ды пулозост путозель вий тейнемс зыян ломантненень вете ковонь перть.11Сынст лангсо инязорокс ульнесь потмакстомо отьмань ангелэсь, конань лемезэ евреень кельсэ Абаддон, грекень кельсэ – Аполлион*.

12Васенце зыянось ютась. Ды вана сонзэ мельга ютыть таго кавто лия зыянт.

13Зэрнезевсь котоце ангелэнть торамось. Мон маринь вайгель, кона лиссь ниле сюротнестэ, конат теезельть Пазонть икеле аштиця сырнень алтаренть ниле ужотнева.14Вайгелесь кармавтсь ангелэнтень, кона зэрнесь торамосо: «Юкснить сеть ниле ангелтнэнь, конат сюлмсезь ине Эвфрат леенть чиресэ!»15Ды неть ниле ангелтнэнь юкснизь. Сынст кирдекшнизь анококс те часонтень, чинтень, ковонтень ды иентень, – куловтомс весе масторлангонь ломантнень колмотькс пельксэст.16Тосо ульнесть кавто сядт миллионт ласте тюриця ушмант. Мон монсь маринь сынст ламочидест.

17Вана кодамокс мон неинь эсень неявкссо лишметнень ды сынст лангсо ластетнень. Сынст кшнинь панарост ульнесть толонь якстереть, чопода сэнть ды палыкандалонь ожот. Лишметнень пряст мольсть левень пря ёнов; кургстост лисиль тол, качамо ды лакиця палыкандал.18Ды неть колмо маштнема вийтнесэ: толсонть, качамосонть ды палыкандалсонть, конат лиссть лишметнень кургсто, куловтозель весе ломаньлувонть колмотькс пельксэзэ.19Эдь лишметнень виест ульнесь кургсост ды пулосост: сынст пулотне ульнесть пря марто, прок гуйть, ды неть прятнесэ сынь пупсильть ломантнень.

20Кадовикс ломантне, конатнень эзизь куловто неть маштнема вийтне, эзть янксезеве эсест кедьсэ теезь пазост кисэ. Сынь эзть лотка сюконякшномадо идемевстненень ды сырнестэ, сиясто, бронзасто, кевстэ ды чувтосто теезь чопачатненень, конат а маштыть неемеяк, марямояк, якамояк.21Неть ломантне эзизь кадо ломанень куловтомань, мунямонь, ускурямонь-усксевемань ды саламонь тевтнень.


предыдущая глава Глава 9 следующая глава