Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 6

Вирезэсь панжи книгань пекстамо тешкстнэнь

1Мон неия, кода Вирезэсь панжизе сисемтнень эйстэ васенце пекстамо тешксэнть, ды мария, кода вейке ракшань-ломанень кондямось прок пурьгинень вайгельсэ рангстась: «Сак ды вант!»2Мон варштынь ды неинь эсень икельде ашо лишме. Лишменть лангсо ульнесь та-кие ласте, кедьсэнзэ налчирьке. Сонензэ макссть инязоронь каштаз, ды сон, кода изниця, сыргась од изнямотнес.

3Вирезэсь панжизе омбоце пекстамо тешксэнть, ды мон мария, кода омбоце ракшань-ломанень кондямось мерсь: «Сак!»4Ды сестэ лиссь толонь кондямо якстере лишме. Сонзэ лангсо ластентень Пазось макссь вий нельгемс мода лангонь сэтьмелувонть ды кармавтомс ломантнень маштнеме вейкест-вейкест. Сонензэ макссть покш торо.

5Зярдо Вирезэсь панжизе колмоце пекстамо тешксэнть, мон мария, кода колмоце ракшань-ломанень кондямось мерсь: «Сак!» Мон варштынь ды неинь эсень икельде раужо лишме, конань лангсо ластесь кирдсь кедьсэнзэ онкст.6Ды мон маринь таго-мезе ломанень вайгель ёнов молиця, кона каятотсь ниле ракшань-ломанень кондямотнень ютксто. Вайгелесь мерсь: «Товзюронь вейке онксонть питнезэ ули вейке динар*, шужонь колмо онкстнэнь* кисэ – истя жо вейке динар. Ансяк ойумарькстнэнь ды винаумарькстнэнь илить колсе!»

7Зярдо Вирезэсь панжизе нилеце пекстамо тешксэнть, мон мария, кода нилеце ракшань-ломанень кондямось мерсь: «Сак!»8Мон варштынь ды неинь эсень икельде ловтаня лишме. Сонзэ лангсо ластенть лемезэ ульнесь Кулома, мельганзо мольсь Тоначись. Сонензэ Пазось макссь азорксчи моданть нилеце пельксэнзэ лангсо маштнемс ломантнень торосо, вачочисэ, куломань ормасо ды идем ракшань вийсэ.

9Зярдо Вирезэсь панжизе ветеце пекстамо тешксэнть, алтаренть алдо мон неинь сетнень оймест, конат маштозельть Пазонь валонть пачтямонть ды кемемадост ёвтамонть кисэ.10Сынь рангсть верьга вайгельть: «Иневанькс ды Виде! Весемень Азоро! Мекс Тон те шкас а судят мода лангонь эрицятнень ды а пандат тенст кеж минек валозь веренть кисэ?»11Сестэ кулозтнень эйстэ эрьвантень Пазонть пельде макссть ашо оршамопель ды мерсть оймамс аволь куватьс. Сыненст эрявсь учомс се шкас, зярс а пурнави эрявикс ламочи сынст марто Пазонтень важодиця кемиця ялгатнеде, конат истя жо улить маштозь.

12Вирезэсь панжизе котоце пекстамо тешксэнть. Ды мон неия, кода виевстэ соракадсь модась, чипаесь раужкадсь прок ризнэмань оршамопель, ковось теевсь верень кондямокс.13Менелень тештнеяк прасть мода лангс, кода пракшныть чувто прясто пиже инжир умартне виев даволонь шкасто.14Менелесь ёматотсь, прок тапардавсь килей керень тапарксокс; весе пандотне ды усиятне сыргстасть таркастост.15Те шкане мода лангонь инязортнэ, чинязтнэ ды ушмонь ветицятне, сюпавтне ды виевтне, – весе лия ломантнеяк: уретнеяк ды олячисэтнеяк кекшнесть кевботмарга ды пандтнэнь лазкстнэва.16Сынь энялдсть пандотненень ды пандокарязтнэнень: «Пракшнодо минек лангс ды кекшимизь инязоронь таркасо Озадо аштицянть вановтонзо эйстэ ды Вирезэнть кежень пандоманзо эйстэ!17Эдь сась Сонзэ кежень пандомань тандавтыця чись, ды арази кияк сонзэ каршо аштеви!»


предыдущая глава Глава 6 следующая глава