Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 13

Пазонть мелензэ коряс эрямо

1Свал вечкеде вейкенк-вейкенк лелянь-сазоронь вечкемасо.2Уледе инжень вастыцякс. Истя теемстэ зярыя ломанть апак сода вастнесть натой ангелт эсест кедьсэ.3Илядо стувтне пекстазтнень эйсэ, буто тынськак мартост аштетядо пекстазь. Кирдеде мельсэнк пиштицятнень, буто тыньгак майсетядо сынст ладсо.

4Урьвакстомань сюлмавксось улезэ лововиксэкс весеме ютксо. Мирдентень ды нинтень эряви улемс видечисэ вейкест-вейкест икеле. Пазось чумондсынзе сетнень, кить усксевить ды ускурить.

5Илядо бажа ярмак мельга. Кадык саты тенк се, мезенк ули. Эдь Сонсь Пазось мерсь:
«Мон зярдояк а кадтан, зярдояк эйстэть а туян».
6Секскак минь апак пеле кортатано:
«Азорось свал сы монень лездамо,
секс мон мездеяк а пелян.
Мезе теи монень ломанесь?»

Пазонтень мельстуиця анокст

7Ледстнеде мелезэнк эсенк ветицянк, конат пачтясть тенк Пазонь валонть. Мельсэнк кирдеде сень, кода сынь эрясть ды прядызь эсь эрямо кист, ды тееде сынст кемемаст коряс.8Иисус Христос свал теке жо: исяккак, течияк ды пингеде пингескак.

9Кадык тынк а пурдавтыть виде ки лангсто эрьва кодамо каршо молиця тонавтомат. Паро, зярдо тынк седеенк кемекставить Пазонь чанстьсэ, аволь кодаткак койтнесэ-кирдатнесэ ярсамопелень коряс. Неть койтнень топавтомаст эйстэ киненьгак лезэ арасель.

10Минек ули эсенек алтаренек. Сонзэ лангсо аштиця анокстонть а мереви ярснемс ташто ознома коцткудосонть сюконицятненень-важодицятненень.11Тынь содатадо: ракшатнень верест попонь прявтось совавтнилинзе аноксокс пежетень нолдамонь кисэ ознома кудонь сехте иневанькс пельксэнтень, а вана рунгост пултнилинзе эрямо таркаст эйстэ ве ёно.12Иисускак пиштсь-майсесь оштонть ве ёно сень кисэ: Эсензэ верьсэнть ванськавтомс ломантнень ды алтамс сынст Пазонтень.13Эрьга, листяно Тензэ ошонть ушов ды явсынек вейсэ Сонзэ покордамонть.14Эдь минек арась тесэ свалшкань ошонок, мекевланк, минь вешнетяно се ошонть, конанень эряви улемс.

15Истя, карматано Иисус вельде апак лотксе шнамо Пазонть. Те Сонензэ минек аноксонок: минек ёвтавт валтнэ, конат инекс теить Сонзэ лементь.16Истя жо илядо стувтне теемс паро ды максомс лиянень сень эйстэ, мезенк ули, эдь истят анокстнэ вечкевить Пазонтень.

17Кунсолодо ветицянк, моледе превспутомаст мельга. Эдь сынь апак лотксе мелявтыть тынк ойменк кисэ, секс мекс сыненст Пазонть икеле эряви кирдемс вал эсь важодемаст кисэ. Кадык сынь теить эсь тевест кеняркс марто, апак укстне-вайкстне, лиякс те а ули тыненк лезэкс.

18Свал ознодо минек кисэ. Минь кемтяно: минек оймеёжонок ванькст, эдь минь весемесэ бажатано ветямс эсь прянок парсте.19Мон энялдан тенк седе пек озномс вана мезень кисэ: велявтомс монень седе курок тыненк.

Ознома ды меельце валтнэ

20
Пазось, седейоймамонь лисьмапрясь,
вельмевтизе кулозьстэ минек Иисус Азоронть,
Эсь ревензэ ине Ваныцянть,
кона Сонсензэ веренть вельде
кемекстызе пингеде пингень вейсэньлувонть.
21Мон ознан: кадык Пазось анокстатадызь тынк эрьва паро тевентень
Сонзэ мелензэ топавтоманть кисэ.
Ды кадык Сон теи Иисус Христос вельде
тынк эйсэ сень, мезесь тукшны мелезэнзэ.
Улезэ Христоснэнь инексчи пингеде пингес! Аминь.

22Энялдан тенк, кемиця ялгат, кунсолынк цидярдозь весе неть кемекстыця валтнэнь, конатнень мон максынь тенк те нурькине сёрмасонть.23Пачтян тенк куля: минек кемиця ялганок Тимофеень нолдызь пекстамо кудосто. Бути сон курок сы монень, сестэ мон сонзэ марто сан тынк содавтомо.

24Ёвтадо монь пельде сюкпря весе тынк ветицятненень ды Пазонь весе ломантненень. Сюкпрят кучить тенк Италиянь кемиця ломантне.

25Пазонь чанстесь улезэ весеменк марто! Аминь.


*а 13:9 чансть – благодать


предыдущая глава Глава 13 следующая глава