Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 10

Христосонь аноксонть вельде минь малавгадтано Пазонтень

1Моисеень Коесь ульнесь Пазонь ансяк весе се паронть сулеекс, кона учось ломантнень икелепелев, аволь алкуксонь те паронть чачокс. Секскак Коентень зярдояк а теевить асатыкстэмекс сеть, кить сакшныть Пазонтень ды иеде иес свал кандтнить некеть жо анокстнэнь.2Бути улевельть теезь асатыкстэмекс, сестэ аноксонь кандтнемась прядоволь. Пазнэнь сюконицятне сестэ улевельть ванськавтозь весть ды свалшкас ды уш авольть маря чумо эсест пежетест кисэ.3Ней, мекевланк, анокстнэ иеде иес ледстнить пежетнеде.4Эдь букань ды сеянь верентень кодаяк а шлявить-нардавить ломанень пежетне.

5Секскак Христос масторонть лангс самсто корты Пазонтень:
«Тонь арасель мелеть саемс казнеть ды анокст,
а вана рунго Тон Монень анокстыть.
6Тонь мельс а тукшныльть ракшань пултамотнеяк,
пежетень кисэ анокстнэяк.
7Сестэ Мон меринь: “Вана Мон, Мон сынь –
кода Монь эйстэ книгань тапаркссонть сёрмадозьгак –
Тонь мелеть, Пазом, топавтомо”».
8Васенцекс Христос ёвтакшнось: «аноксткак, казнетькак, ракшань пултамоткак, пежетень кисэ аноксткак Тонеть а эрявить ды а вечкевить». Сон истя ёвтась, куш весе неть анокстнэ кандтневитькак Коенть коряс.9Мейле Сон поладсь: «Вана Мон, Мон сынь Тонь мелеть, Пазом, топавтомо». Истя Христос полавтызе аноксонь кандтнема ташто лувонть од лувсонть.10Истямо ладсо Сон топавтызе Пазонь меленть. Теньсэ минь допрок ванськавтозтяно ды алтазтяно Пазонтень Иисус Христосонь рунгонть вельде, конань Сон максызе аноксокс весть ды свалшкас.

11Эрьва попось чистэ чис ютавты эсь важодеманзо ды ламоксть кандтни некеть жо анокстнэнь, конатнень арась виест нардамс-саемс ломаненть пежетензэ.12А вана Христос кандсь вейкине анокс пежетнень кисэ ды пингеде пингес озась Пазонть вить кедензэ ёнов.13Ней Сон учи сень, зярс Пазось а тейсынзе Сонзэ душманонзо пильгензэ путома таркакс.14Вейке аноксонть вельде Сон теинзе пингеде пингес асатыкстэмекс сетнень, конатне ванськавтовить ды алтавить Пазонтень.

15Тень кемексты миненек Иневанькс Оймеялтоськак. Васняяк Сон ёвтась:16
«Вана кодамо вейсэньлув Мон теян мартост
неть читнеде мейле, – корты Азорось, –
Мон путсынь Эсень койтнень сынст седеезэст
ды сёрмадсынь сынст пря потмозост».
17Ды мейле Сон полады:
«Мон уш зярдояк а ледстясынь мелезэнь
сынст пежетест ды койтемечист».
18Зярдо пежетне нолдазь, сестэ уш а эряви сынст кисэ кандтнемс анокст.

Малавгадодо Пазонтень!

19Истя вана, кемиця ялган, Иисус Христосонь веренть вельде миненек келейстэ панжозь кенкшесь апак пеле совамс сехте иневаньксэнтень, од ды эрямонь максыця киява.20Сон панжизе миненек те кинть, кона юты коцтонь пирявксонть пачк, лиякс меремс – Сонзэ рунгонть пачк.21Минек ули ине Попонок, кона ашти Пазонть весе кудонзо тевтнень ветицякс.22Секскак, эрде, сатано Пазонтень панжадо седейсэ, пештязь покш кемемасо, ванськавтозь седейсэ, чумовтомо оймеёжосо, ды ванькс ведьсэ шлязь рунгосо.23Карматано апак кавтолдо кирдевеме се седейнежедькссэнть, конадо апак кекше ёвтнетяно. Эдь Пазось, кона максызе алтамонть, кемевикс.24Карматано мелявтомо вейкенек-вейкенек кисэ, кирвазтеме эрьванть эйсэ вечкема, кона невтеви паро тевень теемасо.25А карматано кадномо эсенек кемикуронь промксонок, кода кой-кить тейнить. Мекевланк, карматано кемекстамо вейкенек-вейкенек эйсэ седеяк пек, секс мекс тынсь нетядо: Азоронть само чись яла малавгады.

26Бути жо минь, конат кармасть содамо видечинть, чарькодезьгак яла тейнетяно пежетть, сестэ минек пежетне а нардавить-саевить уш кодамояк анокссо.27Сестэ миненек кадови ансяк пелезь учомс Пазонь судонть ды гайниця толонть, кона нильсынзе каршонзо молицятнень.28Бути кияк коласы Моисеень Коенть, се куловтови апак жаля, зярдо кавто эли колмо ломанть кемекстасызь сонзэ чумонзо.29Арседея, зяроксть седе стакасто сестэ чумондови се, кие чалгси Пазонь Цёранть пильгензэ алов, кие а лови иневаньксэкс се вейсэньлувонь веренть, конаньсэ сонсь ванськавтозь-алтазь Пазонтень, ды кие покорды чанстень Оймеялтонть!30Минь жо содасынек Сень, кие мерсь:
«Кежень пандомась Монь кедьсэ.
Мон пандсаяк, корты Азорось».
Ды таго:
«Азорось карми судямо Эсь раськензэ».
31Кодамо покштояк покш тандавкс понгомс эриця Пазонть кедьс!

32Ледстинк мелезэнк сеть икелень читнень, зярдо Пазонь валдось тынк валдомтыдизь, сестэ тынь кирдиде ламо пиштемат ды цидярдыде стака тюремасо.33Лиясто тынсенккак весеме икеле покордасть-корясть ды муцясть, ды лиясто тынь вейсэндявилиде сетнень марто, кинь истямоль жо уцяскаст.34Тынь пиштиде вейсэ монь, тюрьмас пекстазенть, марто. Тынь кецязь вастынк мик сеньгак, зярдо нельгенесть-сайнесть тынк ули-паронк. Тынь содылиде: тынк ули менель лангсо вельть седе вадря ули-паронк, кона пингеде пингень.35Истя, илинк кадно-ёрто эсенк смелчинк, эдь тень кисэ тынь ультядо сюпавсто-важовсто казезь.36Тыненк эряви кирдема ды цидярдома, Пазонть мелензэ топавтоманть кисэ. Сестэ уш тыненк максови се, мезенть Сон алтызе.37Эдь Сёрмадовкссояк кортави истя:
«Шкась кадовсь аламо, пек аламо,
ды Се, кинень эряви самс, сы, шканть а таргасы.
38Ломанесь, кона кемемань кисэ ловозь чумовтомокс,
карми эрямо,
а бути сон велявты кемемасто,
сестэ Монь седеем саеви эйстэнзэ».
39Минь жо аволь сетнень ютксто, кить велявтыть кемемастост ды ёмить, мекевланк, минь вансттано кемеманок ды ультяно идезь.


предыдущая глава Глава 10 следующая глава