Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 4

1Пазонь алтамонть, Сонзэ оймамо таркас совамодонть, зярс нейгак ули виезэ. Секс миненек эряви пштистэ ваномс: илязо лисе истя, кияк эйстэнк кадови ве ёнов те оймамо таркадонть.2Эдь минеккак, кода сеть кезэрень ломантненень, ульнесь ёвтнезь те Кенярксов кулясь. Ялатеке марязь валось сыненст лезэ эзь кандо, секс мекс сынь кемезь эзизь сае сонзэ эсь седеезэст.3Минь вана, конат кемезевинек, соватано те оймамо таркантень, конадо Пазось ёвтась:
«Истя Мон кежень пачк божинь-пежетькстынь:
“Сынь зярдояк а совавить Монь оймамо таркас”».

Сон ёвтызе тень, куш менельтнень-мастортнэнь теемасто саезь Сонзэ тевензэ ульнесть прядозь.4Сёрмадовксонь вейке таркасо сисемеце чинть коряс ёвтазь истя: «Ды сисемеце чистэнть Пазось оймсесь весе Эсь тевензэ прядомадо мейле».5Ды теке самай Сёрмадовкссонть Сон таго корты: «Сынь зярдояк а совавить Монь оймамо таркас».6Лисни, сетне, конатненень Кенярксов кулясь ульнесь пачтязь васенцекс, эзть соваво тов эсест акунсоломаст кисэ. Ансяк кой-кить совавить Сонзэ оймамо таркантень.7Секс Пазось аравтсь лия чи, конанень Сон мери “течи”. Ламо шкань ютазь Пазось кортась теде Давид вельде, кода тесэ ёвтазель уш икеле:
«Бути течи тынь марясынк Пазонть вайгелензэ,
сестэ илинк калгодкстомто седеенк».
8Бути Иисус Навин ветявлинзе эсь ломанензэ Пазонь оймамо таркантень, сестэ теде мейле Пазось аволь карма кортамо лия чиде.9Лисни истя: кода Пазоськак оймсесь сисемеце чистэнть, истя жо Пазонь ломантненьгак зярс учи оймсема.10Эдь кие сови Сонзэ оймамо таркантень, се эсь прядозь тевдензэ мейле оймси истя жо, кода Пазоськак оймсесь весе тевензэ прядомадо мейле.11Секскак карматано весе вийсэнек бажамо совамс те оймамо таркантень. Илязо кадово ве ёнов кияк секс, мекс сон тусь кезэренсетнень мельга акунсоломань киява.

12Пазонь валось эриця ды пек виев, ды сон кавто ёндо човазь тородо седе пшти: сон сови минек эйс домкасто, натой яви ойменть ды оймеялтонть, эзнетнень ды ловажань удементь ды суди седеень арсематнень ды мельтнень.13Мезеяк а кекшеви Пазонть эйстэ, весе Сонзэ теевксэсь штадо ды панжадо Сонзэ сельмензэ икеле. Те Сонзэ икеле миненек сави кирдемс вал.

Иисус – минек ине Попонь прявтонок

14Истя, карматано кеместэ кирдевеме эсенек кемемасонть, конадо минь апак кекше кортатано, секс мекс минек ули ине Попонь прявтонок, кона кепететсь менелень пачк сехте верев: те Иисус, Пазонь Цёрась.15Эдь минек Попонь прявтонок аволь истямо, кона а машты путомо седейёжо минек лавшочинтень. Арась, Сон снартневтезель-варчавтнезель минек ладсо весемесэ, ансяк ялатеке кадовсь пежеттеме.16Секскак апак пеле карматано сакшномо чанстень максыця Пазонть икелев. Тосо минь мутано седеймарямо ды чансть, конат лездыть тенек сестэ, зярдо те эряви.


предыдущая глава Глава 4 следующая глава