Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 3

Иисус Моисейде ине

1Секскак, кемиця ялгат, Пазонь ломанть, конатненень минек марто вейсэ максозь менельстэ Пазонть пельде тердема, кирдеде превсэнк-седейсэнк Иисус Христосонь, конань минь весень икеле ловтано Пазонь кучовтокс ды Попонь прявтокс.2Сон кемевикс Пазонтень, кие Сонзэ аравтызе те важодемантень, кода Моисейгак «ульнесь кемевикс важодицякс Пазонь кудонь весе тевтнесэ».3Ансяк Иисус ловови Моисеень коряс седе инекс истя жо, кода кудонь теицяськак ули седе лововиксэкс сонзэ теевть кудонть коряс.4Нама, эрьва кудонть ули эсензэ теицязо, Пазось жо весементь теиця.5Моисей ульнесь кемевикс важодицякс Пазонь кудонь весе тевтнесэ, ялатеке ансяк кода важо. Сон ульнесь ломантненень сень невтицякс, мезе Пазось ёвтыль икелепелев.6А вана Христос ули кемевиксэкс кода Пазонть Цёразо, Сонзэ весе кудонзо тевтнень ветиця. Сонзэ кудось – те минь, бути, нама, кеместэ педе пес ванстсынек смелчинть ды кенярдозь шнатано прянок эсь седейнежедькссэнек.

Пазонь оймамо тарка

7Секскак, кода корты Иневанькс Оймеялтось Сёрмадовкссо:
«Бути течи тынь марясынк Пазонть вайгелензэ,
8сестэ илинк калгодкстомто седеенк,
кода тынк покштянк кепедевкшнесть Пазонть каршо
снартнема-варчавтнема читнестэ чаво модасо.
9Тосо сынь налкставтнесть ды варчавтнесть Монь,
ды несть сень,
мезе Мон тенст теинь ниленьгемень иень перть.
10Секскак Мон пек кежиявтынь неть ломантнень лангс ды меринь:
“Сынст седеест свал саезь Монь эйстэ,
ды арась мелест ютамс Монь кияванть.”
11Секскак Мон кежень пачк божинь-пежетькстынь:
“Сынь зярдояк а совавить Монь оймамо таркас!”»
12Ванодо, кемиця ялгат, киньгак эйстэнк илязо уле апаро ды акемиця седеезэ, кона тынк потавтовлидизь эриця Пазонть эйстэ.13Мекевланк, вейкенк-вейкенк путодо превс эрьва чистэ, зярс мереви ёвтнемс Сёрмадовксонь “течи” валонть, кадык киньгак эйстэнк а калгодкстоми седеезэ, пежетьсэ манявозь.14Эдь минь вейсэндязтяно Христос марто, бути ансяк педе пес кеместэ ванстсынек се кемемачинть, кона минек ульнесь ушодома шкастонть.15Сёрмадовкссо ёвтазь истя:
«Бути течи тынь марясынк Пазонть вайгелензэ,
сестэ илинк калгодкстомто седеенк,
кода тынк покштянк кепедевкшнесть Пазонть каршо».
16Эдь кой-конат Пазонь вайгелень марицятнестэ кепедевсть Сонзэ каршо, ялатеке аволь весе, конатнень Моисей ливтинзе Египетстэ.17Кинь лангс эно кежиявтнесь Пазось ниленьгемень иень перть? Нама, сетнень лангс, конат тейсть пежетть ды конатнень ловажаст кадовсть чаво модас.18Кинень эно Пазось божась-пежетькстась: сынь зярдояк а совавить Сонзэ оймамо таркас? Нама, сетненень, кить ульнесть а кунсолыцят.19Истя, минь нетяно, мекс сынь эзть соваво Сонзэ оймамо таркас – те акемемаст кувалма.


предыдущая глава Глава 3 следующая глава