Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 2

Идемадо куля

1Вана мекс миненек эряви седеяк кеместэ кирдевемс сень эйсэ, мезенть маринек: аволинек туеве ве ёнов виде кинть лангсто.2Уш ангелтнэньгак вельде ёвтазь кулясь ульнесь кемевиксэкс, ды эрьвась, кие потась эйстэнзэ эли эзь кунсоло сонзэ, таргась эсь лангозонзо чумонь виде пандома.3Кода эно минь оргодтяно чумонь пандомадонть, бути минь допрок мельс а сайтяно те ине идеманть, конадо васенцекс ёвтась сонсь Азорось? Ды сеть, конат маризь те кулянть, кемекстызь сонзэ алкуксчинзэ ды пачтизь миненек.4Сонсь Пазоськак кемекстызе сынст кулянть дивань тешкссэ, тамашасо ды эрьва кодамо виев тевсэ, ды истя жо Иневанькс Оймеялтонь казнесэ, конатнень Сон Эсь мелензэ коряс явшинзе ломантненень.

Иисус – идемас Ветиця

5Сыця шкань од мирэнть-масторонть, конадо минь тесэ кортатано, Пазось максызе аволь ангелтнэнь азорксчист алов.6Мекевланк, кода кие-бути косо-бути ёвтась:
«Пазом, кие истямо ломанесь!
Ялатеке Тон кирдят сонзэ мельсэть.
Кие истямо ломанень эйдесь!
Ялатеке Тон сонзэ кисэ мелявтат.
7Нурькине шкас Тон теик сонзэ
ангелтнэде вишкинекс,
а вана мейле путык прязонзо
инексчинь ды шнамонь каштазонть
ды путык сонзэ прявтокс Эсеть теевть тевтнень лангсо,
8Тон весементь максык-путык сонзэ пильге алов!»
Пазось максызе весементь сонзэ кедь алов, ды мезеяк эзь кадо сонзэ азорксчивтеме. Ялатеке зярс миненек а неяви, буто весемесь сонзэ кедь ало.9Ансяк ней минек икеле Иисус, кона нурькине шкас ульнесь теезь ангелтнэде вишкинекс. Ней жо минь Сонзэ несынек инексчинь ды шнамонь каштазсо ламо пиштеманзо ды майсезь куломанзо кисэ. Эдь Пазонть чанстев арсеманзо-мелензэ коряс Иисуснэнь савсь куломс эрьва ломаненть кисэ.

10Истя эрявсь улемскак: Пазонть, весемень теицянть ды кирдицянть, ульнесь мелезэ теемс ламотнень Эсензэ эйкакшокс ды ветямс-пачтямс Эсь инексчизэнзэ. Тень кисэ Сонензэ эрявсь пиштема вельде теемс педе пес вийс совазекс-анокстазекс Сень, кие вети сынст идемас.11Эдь Се, кона теи ломантнень иневаньксэкс, ды сеть, конат теевить иневаньксэкс, – сынь весе вейке Тетянь эйкакшт. Секскак Иисус а визди ловомс сынст Эсензэ ялаксокс-сазорокс. Сон корты Пазонтень:12
«Мон карман ёвтнеме Тонь эйстэ
Монь ялакстнэнень-сазортнэнень
ды моразь шнамот сынст промкссо».
13Ды таго Сон корты:
«Мон карман кемеме-нежедеме Пазонть лангс».
Ды таго:
«Тесэ аштетяно Мон ды эйкакштнэ,
конатнень Монень максынзе Пазось».

14Неть эйкакштнэ, кода Сон тенст мери, аштить сывельстэ ды верьстэ, секс Иисускак истя жо теевсь сынст кондямокс, ломанекс. Истямо ладсо Сон Эсензэ куломанть вельде изнизе сень, конань ули куломанть лангсо азорксчизэ, лиякс меремс, Идемевсенть.15Теньсэ Сон олякстомтынзе весе сетнень, кить ульнесть куломадо пелемань урексчисэ эрямост перть.16Нама, Сон сайсь Эсензэ лангс мелявкс Авраамонь пельде чачозтнеде-касозтнеде, аволь ангелтнэде.17Секскак Иисуснэнь эрявсь теевемс весеме ёндо Эсензэ ялакстнэнь-сазортнэнь кондямокс. Ансяк истя Сон кармась улеме седеймарицякс ды Пазонть икеле кемевикс Попонь прявтокс ды максызе прянзо ломантнень пежетест нолдамост кисэ.18Эдь Сон Сонсь кирдсь пиштемат ды ульнесь снартневтезь-варчавтнезь, секс Сонзэ ули виезэ лездамс сетнененьгак, конат понгонить варчавтнемас.


предыдущая глава Глава 2 следующая глава