Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ТИТНЭНЬ ПАВОЛОНЬ СЁРМАЗО

Глава 2

Кода видестэ эрямс Пазонтень кемицятненень

1Тон жо кортак седе, мезесь ве мельс пры виде тонавтоманть марто.2Тонавт сыре цёратнень улемс валдо превсэ арсицякс, эсь прянь питнень содыцякс, ванькс мельсэ эрицякс, шумбракс кемемасо, вечкемасо, цидярдомасо.3Сыре аватненьгак тонавт эрямо прок Пазонть сельмензэ икеле: сынь иляст уле лия ломанде апаро кулянь нолдыцякс, вина мельга правтыцякс. Мекевланк, кадык сынь тонавтыть лиятнень паронтень.4Кадык сынь од аватнень кармавтыть эсест мирдест ды эйкакшост вечкеме,5ванькс мельсэ ды ваньксчисэ эрямо, эсь кудо юронь вадрясто ванстомо ды эсест мирдень кунсоломо. Ды сестэ Пазонь валось а ули покордазь.6Истя жо од цёратненьгак путыть превс ванькс мельсэ эрямо.7Весемесэ невть-ветяк эсь прят парсте, ды сестэ лия цёратнеяк кармить ветямо пряст тонь ладсо. Тонавт седейстэ лисиця валсо, эсь питнень содазь ды аёмиця-арыця тонавтомасо.8Тонь кортамось улезэ видекс, мейсэяк а чумондовицякс. Сестэ минек каршо молицятненень а ёвтави эйстэнек мезеяк берянь, ды сынь кармить улеме визделгавтозь.

9Кадык уретне улить эсест азорост кунсолыцякс, весемесэ сынст мелест ваныцякс. Сынь иляст ёвта каршо вал эсест азорост туртов10ды иляст сёпо ярмакт сынст эйстэ. Мекевланк, уретне улест свал азорост туртов весемесэ допрок парокс ды кемевиксэкс. Истя сынь эсест эрьва кодамо тевсэ мазылгавтсызь Паздонть, минек Идицядонть, тонавтоманть.

Пазонь чанстесь весе ломантнень идемаст туртов

11Пазонь чанстесь, кона канды идема, панжовсь весе ломантненень.12Те чанстесь тонавты минек кадомс пазтомо эрямонть, пежетев мельтнень-бажамотнень ды тень таркас эрямс неень эрямосонть ванькс мельсэ, видечисэ ды Пазонь мелень ванозь.13Истя минь седейнежедькс марто учотано те уцяскав чинть, зярдо минек ине Пазось, Иисус Христос, минек Идицясь, панжсы Эсензэ сияждыця инексчинзэ.14Сон максызе Эсь прянзо минек кисэ: идемс-менстемс минек эрьва кодамо зыяндо, ванськавтомс пежетнеде ды теемс минек ансяк Эсензэ раськекс, конась оймень путозь бажи паронь тееме.

15Вана истя тонавт, кемекстак ды лангс таргак кемицятнень весе тонь азорксчинть вийсэ, ды киненьгак иля мере ваномс лангозот верде алов.


предыдущая глава Глава 2 следующая глава