Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ТИМОФЕЙНЕНЬ ПАВОЛОНЬ ВАСЕНЦЕ СЁРМАЗО

Глава 1

1Павол, Иисус Христосонь апостолось, конань аравтызе Пазось, минек Идицясь, ды Христос Иисус Азорось, минек седейнежедьксэсь,2кучи шумбракстнемат Тимофейнень, кемемань коряс сонзэ алкуксонь цёрантень. Улезэ теть чансть, седеймарямо ды седейоймамо минек Тетя Пазонть пельде ды минек Христос Иисус Азоронть пельде!

Кармавтомат лия тонавтоматнень коряс

3Македонияв туемстэ мон энялдынь теть кадовомс Эфессэ вана мекс: тонеть эрявсь кармавтомс кой-конатненень, иляст пачтне лия тонавтомат,4ды иляст яво мель ёвкстнэнень ды кезэрень шкань покштятнень лемень певтеме кортавтоматненень. Сынь ветить аэрявикс пелькстамотнес-спорямотнес ды а кандыть кодамояк лезэ Пазонтень кемемань кастомантень.5Те кармавтоманть бажамозо – кирвазтемс вечкема, кона лиси ванькс седейстэ, паро-виде оймеёжосто ды алкуксонь кемемасто.6Кой-конат потасть-мурдасть весе тень эйстэ ды ваясть стяконь келень-валонь таргсемас.7Сынст мелест улемс Койс тонавтыцякс, ансяк сынь а чарькодить сень, мезде кортыть, ды сеньгак, мезенть виевстэ кемекстыть валсост.

8Минь содатано: Коесь паро сестэ, бути сонзэ кода эряви нолдасак тевс.9Ды чарькодьсак: Коесь аравтозь-путозь аволь видечисэтненень, мекевланк, Коень колсицятненень, акунсолыцятненень, пазтомотненень ды пежетевтненень. Сон истя жо путозь визькстэметненень ды нарьгицятненень, ломанень ды мик тетянь-авань маштницятненень.10Коесь сёрмадозь ускурицятненень, цёра цёра марто удсицятненень, ломанень салыцятненень, кенгелицятненень ды авидестэ божицятненень-пежетькстыцятненень ды весе сетненень, кить молить шумбра тонавтоманть каршо.11Те тонавтомась кирдеви шназь-чанстязь ды ине Пазонть Кенярксов кулясонть. Те кулянть пачтямонзо Пазось максызе монень.

Сюкпря Пазонтень седеймарямонзо кисэ

12Ёвтан сюкпря минек Христос Иисус Азоронтень, кона макссь монень вий. Ёвтан Сонензэ сюкпря секс, мекс Сон ловимим монь кемевиксэкс ды аравтымим Эстензэ важодеме,13монь, кона икеле ульнесь Сонзэ сюдыцякс, пансицякс ды нарьгицякс-покордыцякс. Пазось жо путызе монень седеймарямонзо секс, мекс мон эсень акемемам коряс а содылинь, мезе тейнинь.14Минек Азорось сюпавсто валызе монь лангс Эсь чанстензэ, истя жо макссь монень кемема ды вечкема Христос Иисус вельде.15Неть валтнэ видеть ды эрявить путомс седейс: Христос Иисус сась масторлангс идеме пежетевтнень, конатнень ютксо мон сехте пежетевесь.16Ансяк Пазось путызе монень седеймарямонзо вана мекс: Иисус Христос невтевлизе васенцекс монь лангсо Эсензэ куватень цидярдоманзо. Монь лангс ванозь, лиятнеяк теде мейле кармавольть кемеме Тензэ ды совавольть пингеде пингень эрямос.17Пингеде пингень Инязоронтень, акулыця, анеявиця, вейкине превейдеяк превей Пазонтень шнамо ды инексчи пингеде пингес! Аминь.

18Цёрынем, Тимофей, те кармавтоманть мон максан тонеть пазмарицянь валтнэнь коряс, конат икеле ульнесть ёвтазь тондеть: ветяк неть валтнэнь лангс нежедезь паро тюрема,19ванстык кемемат ды ванькс оймеёжот. Конат-конат сонзэ ёмавтызь, ды кемемасткак ваясь, кода венч иневедьс.20Истятнэ Гименей Александр марто, конатнень мон максынь Сатананень. Кадык тонадыть ды а кармить Пазонть нарьгакшномо-покордакшномо!


предыдущая глава Глава 1 следующая глава