Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФЕССАЛОНИКА ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 3

Павол терди озномо

1Ды меельцекс, кемиця ялгат, ознодо минек кисэ. Кадык Азоронть валось куроксто пачкодевель эрьва ков ды улевель шназь лиятнень ютксояк, кода тынк ютксо.2Ознодо сень кисэяк, кадык Пазось ванстсамизь минек апаро ды зыянонь кандыця ломантнеде, эдь аволь весень ули кемемаст.3А вана Азорось кемевикс. Сон виевгавттадызь ды вансттадызь апародонть.4Азорось миненек максы кемема тынк лангс: тынь топавттадо ды карматадояк топавтомо сень, мезе минь тыненк кармавттано.5Ды кадык Азорось аравтсынзе-ветясынзе тынк седеенк Пазонь вечкемантень ды Христосонь цидярдомантень.

Превспутомат нузякстнэнь туртов

6Кемиця ялгат, Иисус Христос Азоронок лемсэ кармавттано тенк: кирдеведе ве ёно эрьва кемиця ялганть эйстэ, конась эри нузякссто, тевтеме ды а моли минек максовт тонавтоманть мельга.7Тынь тынсь содатадо, кода тыненк эряви теемс минек ладсо. Тынк кедьсэ минь тевтеме эзинек аштекшне.8Кинь кедьсэяк кши сускомне стяко эзинек сэве, мекевланк, важодинек чинек-венек, виень апак жаля, а улемс киненьгак тыненк кирьгасо кевекс.9Куш минек ульнесь азорксчинек вешемс пельденк лезкс, ансяк минь истя ялатеке эзинек тее, эдь минек ульнесь меленек максомс тыненк невтевкс. Кадык эрьвась эйстэнк тейневель минек ладсо.10Зярдо минь ульнинек тынк кедьсэ, сестэ уш минь тыненк кармавтнинек: кинь арась мелезэ важодемс, се кадык а ярсыяк.

11Минь теде кортатано вана мекс: минь марятано, тынк улить зярыя ломаненк, конат нузялдыть, важодемскак а важодить, а эсь пряст эцить эрьва тевс.12Неть ломантнень минь кармавттано ды тердтяно минек Иисус Христос Азоронть лемсэ сэтьместэ важодеме ды эсест вийсэ пряст трямо.13Тынь жо, кемиця ялгат, паронь теемстэ илядо сода сизема.

14Бути кияк а кунсолы сень, мезде минь сёрмадтано те сёрмасонть, сестэ кундынк сонзэ эсенк мельс: илядо пшкале тензэ ды кадык сонензэ карми улеме визькс!15Ялатеке илядо лово сонзэ эсенк ятокс, мекевланк, путодо эйсэнзэ превс кода кемиця ялганк.

Меельце паро мельть-арсемат

16Кадык Сонсь Азорось, седейоймамонь лисьмапрясь, максы тенк седейоймамо, свал ды эрьва кода. Улезэ Азорось весеменк тынк марто!

17Шумбракстнеманть мон, Павол, сёрмалян тезэнь эсень кедьсэ. Истя тешкстнян эрьва сёрмам.18Минек Иисус Христос Азоронть чанстесь улезэ весеменк тынк марто! Аминь.


предыдущая глава Глава 3 следующая глава