Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФЕССАЛОНИКА ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 2

Койтемечинь ломанесь

1А вана ней кортатано минек Иисус Христос Азоронть самодонзо ды седе, кода минек пурнасамизь Сонензэ. Кемиця ялгат, энялдтано тенк:2иляст сеске чаракадо превенк ды илядо талакале-тандале кодамояк пазмарицянь валдонть, тонавтомадонть эли сёрмадонть, кона, келя, минек пельде. Сынст эйсэ буто ёвтазь: «Христосонь чись уш сы».3Киненьгак мейсэяк илинк максо прянк ильведстемс-манямс. Эдь те чиденть икеле карми улеме покш потамо-велявтома Пазонть эйстэ ды невтьсы прянзо пежетень ломанесь, кона максозь-судязь ёмамос.4Те каршомолицясь путсы-ловсы прянзо сехте покшокс весеме лангсо, конанень мерить паз эли сюконямо тарка. Сон озы Пазонь кудос кода Паз ды яволявтсы эсь прянзо Пазокс.

5Паряк тынь эзинк стувто? Мон тыненк кортакшнынь тень эйстэ уш сестэ, зярдо ульнинь тынк кедьсэ.6Тынь истя жо содатадо, мезесь кирди койтемечинь ломаненть невтемс прянзо шкадонзо икеле.7Эдь койтемечинь виесь уш важоди салава. Ансяк эряви саемс кинзэ лангсто сень, кие кирди сонзэ.8Ды сестэ лиси лангс те койтемечинь ломанесь, конань Иисус Азорось куловтсы Эсензэ кургсто лисиця оймекоштсонзо ды маштсы-ёмавтсы Эсензэ сияждомасонзо се чистэнть, зярдо Сон сы.9Койтемечинь ломаненть самось – те тевесь Сатананть. Те самось карми невтевеме эрьва кодамо вийсэ ды кенгелиця-ильведстиця тамашасо ды дивань тевсэ10ды эрьва кодамо авидечинь манчемасо. Неть манчематнес понгить сеть, конат ютыть ёмамос, секс мекс сыненст эзь вечкеве Пазонть видечись, конань вийсэ сынь улевельтькак идезь.11Тень кисэ Пазось кучи лангозост манчевемань покш вий, ды секс сынь кармить кемеме кенгелемантень.12Истя кармить улеме судязь весе сетне, кить эзть кеме видечинтень ды кинень вечкевсь авидечись.

Тынь кочказтядо идемас

13Азоронтень вечкевикст, кемиця ялгат, миненек свал эряви ёвтамс сюкпря Пазонтень тынк кисэ. Сон тынк ушодкссто саезь кочкидизь пачкодемс идемантень, секс мекс Оймеялтось теи эйсэнк Пазонтень алтазь ломанекс ды секс мекс тынь кемтядо видечинтень.14Тенень Сон тердидизь тынк Кенярксов кулясонть, конань минь пачтинек тыненк. Сестэ тынь явсынк минек Иисус Христос Азоронть инексчинзэ.15Истямо ладсо, кемиця ялгат, аштеде-кирдеведе кеместэ се тонавтомасонть, конанень минь тынк тонавтыдизь икеленк ёвтазь валсо эли кучозь сёрмасо!16Ды Сонсь Иисус Христос Азоронок ды Пазось, минек Тетянок, кона минек вечксамизь ды кона Эсь чанстензэ кувалт казимизь минек пингеде пингень важдамосо-оймамосо ды паро седейнежедькссэ, –17кадык важдасызь-оймавтсызь седеенк ды виевгавттадызь тынк эрьва кодамо паро тевс-валс.


предыдущая глава Глава 2 следующая глава