Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФЕССАЛОНИКА ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 5

Уледе анокт Азоронть самонтень!

1Кемиця ялгат, шкатнень ды аравтозь читнень эйстэ а эряви тыненк сёрмадомскак.2Эдь тынь тынсь пек парсте содатадо: Азоронть чись сы апак учо, салыця ладсо веть.3Зярдо ломантне кармить кортамо: «Эрьва косо сэтьмечи ды лув-лад», сестэ сынст апак учо стардсынзе ёмамось, кода пешксесэ аванть ушодовкшныть чачтомань майсематне, ды сынь кодаяк уш а оргодевить.4А тынь, кемиця ялгат, аволь чоподачисэ, ды се чись а стардтадызь тынк апак учо, салыця ладсо.5Эдь весе тынь валдонь ды чинь эйкакшт. Минь а ультяно вень ды чоподань эйкакшокс.6Секскак, эрде, а карматано удомо, кода лиятне! Ультяно анокт ды валдо превсэть!7Эдь удыцятне удыть веть, ды винань вечкицятнеяк симить-лекить веть.8Минь, чивалдонь эйкакштнэ, мекевланк, ультяно валдо превсэ, оршасынек кшнинь панарокс кемеманть ды вечкеманть, путсынек прязонок шлёмокс седейнежедьксэнть идеманть лангс!9Эдь Пазось аравтсь миненек идема, кона максови тенек Иисус Христос Азоронок вельде, аволь чумонь пандома.10Христос кулось минек кисэ ды секс минь карматано эрямо Сонзэ марто вейсэ, сень лангс апак вано: эрицятано минь эли кулозтяно.11Секскак кемекстадо ды кастодо-кепедеде вейкенк-вейкенк эйсэ, кода тынь тейтядояк.

Меельце превспутомат ды сюкпрят

12Кемиця ялгат, энялдтано тенк: ловодо сетнень, кить пек ламо важодить тынк ютксо, кить Азоронть марто эрямосонк аштить тынк прявтокс ды путыть эйсэнк превс.13Улезэ сыненст тынк ёндо покш мелень путома ды вечкема се тевенть кисэ, конань сынь теить. Эрядо вейкенк-вейкенк марто ладязь.

14Кемиця ялгат, минь энялдтано тенк: путодо превс нузялдыцятнень, кемекстадо аволь кеме ойметнень, уледе нежекс лавшотненень, весе марто уледе коронь кирдицякс.15Ванодо: кияк киненьгак кеж илязо пандо кежсэ. Мекевланк, свал бажадо теемс паро вейкенк-вейкенк туртов ды весе лиятнень туртовгак.

16Свал кенярдодо.17Апак лотксе ознодо.18Весементь кисэ ёвтадо сюкпря. Те Пазонть мелезэ тыненк, Христос Иисуснэнь кемицятненень.19Илядо мадсте Пазонь Оймеялтонь толонть,20илядо лово стякокс пазмарицянь валтнэнь.21Ялатеке весементь ванкшнодо эрьва ёндо, саеде сень, мезесь паро.22Кирдеведе ве ёно эрьва кодамо зыяндонть.

23Кадык Сонсь Пазось, седейоймамонь лисьмапрясь, тейтядызь тынк педе пес Эстензэ алтазекс. Ды кадык весе тынк эйсэ: оймеялтонккак, ойменккак ды рунгонккак – ванстови ачумондовиксэкс минек Иисус Христос Азоронть самочис.24Тынк Тердицясь кемевикс, ды Сон тейсы тень.

25Кемиця ялгат, ознодо минек кисэяк.26Шумбракстнеде весе кемиця ялгатнень марто Пазонь ломанень паламосо.27Азоронть лемсэ вешан пельденк: ловнынк те сёрманть весе иневанькс кемиця ялгатненень.

28Минек Иисус Христос Азоронть чанстесь улезэ тынк марто! Аминь.


предыдущая глава Глава 5 следующая глава