Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЭФЕС ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 5

1Истя, эсь эрямосонк бажадо молемс Пазонть ёнов, эдь тынь Сонзэ вечкема эйкакшонзо.2Эрядо вечкемасо истя, кода Христос вечксамизь минек ды максызе кисэнек Эсь прянзо, Пазонтень казнекс ды аноксокс, кона тантейстэ качадыця ялткень кондямо ды Тензэ мельстуиця.3Тынк эйстэ иляст уле кортамот истят тевтнеде кода ускурямо, эрьва кодамо аваньксчи ды вардонь сельмечи. Сыненст арась тарка Пазонь ломантнень ютксо.4Истя жо иляст уле ютксонк амазый визькс кортамот, чаво валт, аванькс пеедькшнемат. Те тыненк а лади! Мекевланк, ёвтадо сюкпрят Пазонтень.5Содадо: вейкеяк ускурицянть, аваньксчисэ эрицянть ды эрьва мезе мельга правтыцянть, кона мейсэяк а явови аволь алкуксонь пазнэнь сюконицядо, арась тарказо-таликазо Христосонь ды Пазонть Инязорксчисэнть.

Эрядо валдосо!

6Киненьгак илинк максо прянк манямс чаво валсо! Эдь весе тень кисэ Пазонь кежесь стардсынзе сетнень, конат а кунсолыть Сонзэ.7Илязо уле тынк мезенккак вейсэнь сынст марто!8Зярдо-бути тынь ульниде чоподасо, ней жо, зярдо тынь Азоронть марто, валдосотадо. Эрядо истя, кода эряви эрямс валдонсетненень.9Оймеялтось чачты-канды эрьва кодамо вадряксчи, видечи ды алкуксчи.10Бажадо содамс-чарькодемс, мезе тукшны Пазонть мельс.11Илядо совсе чоподань тевс, конат а чачтыть-кандыть кодамояк лезэ. Мекевланк, истят тевтнень ливтеде лангс.12Тевтнеде, конатнень сынь тейнить салава, натой, кортамскак визькс.13Зярдо валдось ливтьсынзе лангс весе тевтнень, сестэ панжови сынст алкуксонь смустест. А вана весе, кона ливтеви лангс, се уш ули валдосо.14Секскак кортави:
«Сыргозть, удыця!
Вельмек кулозьстэ – ды Христос валдомтанзат тонь!»
15Истямо ладсо, ванодо пштистэ эсь прянк ветямонзо мельга! Эрядо превей ломань ладсо, аволь превтеме ломанькс.16Бажадо парсте нолдамс тевс эрьва ён шканть, секс мекс ней шкась зыянов.17Илядо уле лангапревекс, маштодо чарькодеме, мейсэ Азоронть мелезэ.18Ды пек илядо симе винадо, сонзэ эйстэ лиснить ансяк визьксэнь тевть-мельть. Мекевланк, пештяводо Пазонь Оймеялтсо!19Вейкенк-вейкенк марто кортнеде псалмань, шнамо моронь ды Оймеялтонь максовт моронь валсо. Моравтодо ды шнадо Азоронть весе седейсэнк.20Свал ды весементь кисэ ёвтадо сюкпря Тетя Пазонтень, минек Иисус Христос Азоронть кисэ.

Нинть мирде марто эрямодост

21Максодо прянк вейкенк-вейкенк кедь алов – тень тееде Пазонь мелензэ ванозь.22Тынь, нитне, максынк прянк мирденк кедь алов, кода Азоронть кедь алов,23секс мекс мирдесь – нинть прязо, кода Христоскак Кемикуронть прязо. Сон Сонсь Эсь Кемикуронзо, лиякс рунгонзо, Идиця.24Ды кода Кемикурось максы прянзо Христосонь кедь алов, истя жо нитнененьгак весемесэ эряви максомс пряст эсь мирдест кедь алов.

25Мирдеть, вечкеде нинк истя жо, кода Христоскак вечксы Кемикуронть ды максызе сонзэ кисэ Эсь прянзо,26Пазонтень Кемикуронть алтамга. Иисус ванськавтызе сонзэ ведьсэ шлязь, вал вельде, сень кисэ:27стявтомс сонзэ весе мазычисэнзэ Эсь икелензэ. Илязо уле Кемикуронть эйсэ кодамояк петнявкске, сормсевкске эли лия кодамояк колавкс, лиякс меремс, улезэ сон Пазонтень алтазь ды асатыкстэме.28Истямо ладсо, мирдентеньгак эряви вечкемс эсь нинзэ, кода эсензэ рунгонзо. Кие вечксы нинзэ, се вечксы эсь прянзояк.29Зярдояк арасель ломань, кона аволизе вечке эсь рунгонзо. Эрьвась анды-симди сонзэ ды мелявты кисэнзэ, кода Азороськак мелявты Эсь Кемикуронзо кисэ,30Эсь рунгонзо кисэ, конань пельксэкс минь ультянояк, Сонзэ рунгонзо ды ловажанзо пелькст.31Кода сёрмадозь: «Секскак цёрась кадсынзе тетянзо-аванзо, сюлмави нинзэ марто, ды сынь кавонест теевить вейке рунгокс».32Тесэ кекшезь ине салавачись: мон ней кортан Христосонь ды Кемикуронть ютксо сюлмавомадонть.33Неть валтнэ истя жо кандовить тыненккак весенень: эрьва мирдентень эряви вечкемс эсь нинзэ, кода эсь прянзо. Ды нинтеньгак эряви ваномс мирдензэ меленть.


предыдущая глава Глава 5 следующая глава