Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЭФЕС ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 3

Лия раськетнень ютксо Паволонь важодемазо

1Ды секскак мон, Павол, – Иисус Христосонь кисэ тюрьмасо аштицясь, тыненк, лия раськенсетненень, паронь теемга.

2Тынь, паряк, мариде седе, кодамо покш чансть макссь монень Пазось тыненк паронь кандомга: те топавтомс Сонзэ мелензэ-арсеманзо.3Монень чарть-неявкс вельде ульнесь панжозь те салавачись, конадо мон нурькинестэ тесэ сёрмадокшнынь икеле.4Истя, тень ловномсто тынськак несынк, кода домкасто мон чарькодьса Христосонь салавачинть.5Седикелень ломантненень апаколь максо содамс те салавачинть, а вана ней Пазонь Оймеялтось сонзэ панжизе Пазонь кочкавт апостолтнэнень ды пазмарицятненень.6Те салавачись вана мейсэ: ней Кенярксов кулянть вельде лия раськетнененьгак, кода еврейтненень, максовить Пазонь весе чанстямотне-баславамотне. Истя сыньгак теевить вейкине рунгонь пельксэкс, ды сынст лангаяк сравтневи Пазонь алтамось Христос Иисус вельде.7Те Кенярксов кулянть важокс мон теевинь Пазонть чанстень казнензэ кувалма, конань Сон монень максызе монь эйсэ важодиця виензэ вельде.

8Монень, Пазонь весе ломантнень ютксто допрок мезекскак а аштицянтень, ульнесь максозь те чанстесь – пачтямс лия раськетненень Кенярксов кулянть Христосонь аёвтавишка сюпавчиденть.9Монень истя жо эряви весенень невтемс, кода карми топавтовомо те салавань арсемась, конась кезэрень пингетнень перть кекшезель Пазонть эйсэ, конась весементь теизе Иисус Христос вельде.10Истямо ладсо, Пазонть превейчись весе ламо ёнксонзо марто ней Кемикуронть вельде панжови менель лангонь прявтнэнень ды азорксчитненень.11Пазось тень теизе пингетнеде икелень арсеманзо-мелензэ коряс, конань Сон топавтызе минек Христос Иисус Азоронть вельде.12Христос марто вейсэндязь ды Сонзэ эйс кемезь, миненек панжовсь кись Пазонтень: секс минь апак пеле ды седейнежедькс марто пшкадтяно Тензэ.13Тень кувалт мон энялдан икеленк: кадык тынк кисэ монь пиштематне-майсематне а правтадызь пильге лангсто, эдь неть пиштематне ветить тынк ине парос.

Ознома Христосонь вечкеманзо чарькодемадо

14Ды секскак мон пульзян минек Иисус Христос Азоронть Тетянзо икелев,15кона ашти алкуксонь тетякс, эрямонь лисьмапрякс весе раськетненень-буетненень менель лангсояк ды мода лангсояк.16Вешан пельдензэ, кадык Сон Эсь Оймеялтсонзо, сюпав инексчинзэ коряс, кемекстасы-виевгавтсы тынк оймеёжонк.17Кадык Христос свал эри тынк седейсэ кемеманк вельде,18ды кадык вечкемась ули эрямонк корёнокс ды юрокс. Сестэ тынк карми улеме сатышка виенк, Пазонь весе лия ломантнень марто вейсэ, превс саемс Христосонь вечкеманть кувалмонзо ды келензэ, сэрензэ ды домкачинзэ,19ды чарькодемс те вечкеманть, кона пек седе сэрей весе минек чарькодемадонть. Сестэ Пазось пештясы тынк эрямонк весе Эсь пешксечисэнзэ.20Пазонтень, минек эйсэ важодиця виензэ вельде, тееви ламодояк ламо весе сень коряс, мезе минь вештяно эли мик арсетяно!21Улезэ Тензэ шнамо раськеде раськес ды пингеде пингес Кемикуронть вельде, Христос Иисус марто вейсэндямонок вельде! Аминь.


предыдущая глава Глава 3 следующая глава