Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ГАЛАТИЯНЬ КЕМИКУРОТНЕНЕНЬ ПАВОЛОНЬ СЁРМАЗО

Глава 3

Кой ды кемема

1Галатиянь превтеме ломанть! Кие тынк сельмедидизь – а кунсоломс видечинть? Мон жо тынк сельменк икеле вельть чарькодевиксстэ невтия, кода Иисус Христос теке тынк кедьсэ кулось крёст лангсо!2Ансяк вейкеде ули мелем кевкстемс тынк: Мезень кувалт максозель тенк Пазонь Оймеялтось? Коенть топавтоманзо кувалт эли Христосто кулянть марямонзо кувалт ды тензэ кемеманть кувалт?3Кода эно тынь теевиде истямо превтемекс! Тынь ушодынк Оймеялтонть вийсэ. Арази ней бажатадо прядомс эсенк вийсэ?!4Арази весе, мезенть трокс печтиде, ютась стяко? Тенень мон а кеман!5Пазось кази тыненк Оймеялт ды теи ютксонк дивань тевть. Арази Сон тень теи секс, мекс тынь топавттадо Моисеень Коень вешематнень? Арази аволь секс, мекс тынь маринк Христосто кулянть ды кемезевиде тензэ?6Авраамдо, кезэрень ине тетядонок, Сёрмадовкссо ёвтазь: «Сон кемезевсь Пазонтень, ды тень кисэ Пазось ловизе сонзэ чумовтомокс».

7Секскак чарькодеде: Авраамонь алкуксонь эйкакшокс улить сеть, конат кемить.8Сёрмадовксось уш икелев ёвтызе: Пазось ловсынзе весе раськень ломантнень чумовтомокс кемемань кувалт. Сон васенцеде ёвтызе Кенярксов кулянть Авраамнень: «Тонь вельде весе раськетненень максови чанстямо-баславамо».9Лисни, Пазось чансти-баслави весень, кие кеми-нежеди лангозонзо, кода Сон икеле чанстизе-баславизе кемиця Авраамоньгак.10А вана сетне, кить нежедить Коень топавтоманть лангс, эрить-аштить сюдома ало. Эдь Сёрмадовкссонть кортави: «Сюдозь эрьвась, кие а топавты весе сень, мезе сёрмадозь Коень книгасонть».11Коенть топавтома вельде кияк а ловови чумовтомокс Пазонть икеле. Те парсте неяви Сёрмадовксонь валтнэстэ: «Ломанесь, кона кемемань кисэ ловозь чумовтомокс, карми эрямо».12Коенть юрсо ашти, нама, аволь кемемась. Мекевланк, Койденть ёвтазь истя: «Ансяк се, кие топавты Коень весе вешематнень, сонзэ вельде карми эрямо».13Ней жо Христос идимизь-менстимизь олячис Коень сюдоманть алдо. Сон саизе Эсь лангозонзо минек таркас те сюдоманть. Теде ёвтазь Сёрмадовкссонть: «Сюдозь эрьвась, кие понгавтозь чувтос».14Христос теизе тень вана мекс: Авраамнень алтазь чанстямось-баславамось максоволь-сравтневель Христос Иисус вельде лия раськетнень лангаяк, ды Пазонь алтавт Оймеялтось максоволь миненеккак Христоснэнь кемеманок вельде.

Алтамо ды Кой

15Кемиця ялгат! Невтевксэкс сайтяно эрямонь-аштемань истямо тев. Бути ломанесь тейсь ладямодо кемекстазь конёв, сестэ те конёвось киненьгак а ёртови-а полавтови ды лия мезеяк тозонь уш а путови.16Пазось жо макссь алтамот Авраамнень ды сонзэ буень-раськень поладыцянтень. Сёрмадовксонь те таркасонть ёвтазь аволь “буень поладыцятненень”, кода ламонень, а вана “тонь буень поладыцянтень”, кода вейкенень, те – Христоснэнь.17Теньсэ монь мелем ёвтамс: Коесь, кона лиссь нилесядт колоньгемень иеде мейле, а полавтсы Христосто вейсэньлувонть-ладямонть, конань Пазось кемекстызе икеле. Истямо ладсо Коесь а ёртсы-а ёмавтсы Пазонь максовт алтамонть.18Бути Пазонь казнесь максоволь Коенть коряс, сестэ сон а саевель алтамонь коряс. Авраамнень жо Пазось максызе Эсь казнензэ алтамонзо коряс!

Мезекс эряви Коесь?

19Мезекс сестэ эряви Коесь? Сон путозь мейле, ломантнень пежетест невтемга, ды вийсэнзэ ульнесь се шкас, зярс эзь са Авраамонь буень поладыцясь, конанень максозель алтамось. Коесь максозель-аравтозель ангелтнэнь вельде, мейле Моисей, Пазонть ды ломантнень ютксо тевень якавтыцясь, максызе сонзэ ломантненень.20Тевень якавтыцясь эрявкшны ансяк сестэ, зярдо улить вейсэньлувонь-ладямонь кавто теицят. Пазось жо – ськамонзо!

21Арази сестэ Коесь ашти Пазонь алтамотнень каршо? Кодаяк аволь! Бути ломантненень максозь улевель истямо кой, кона казевель эрямо, сестэ Пазонть икеле чумовтомочись максоволь весенень, нама, те коенть топавтоманзо кисэ.22Сёрмадовксось яволявты: весе ломантне аштить ваязь пежеть потс. Секс казнесь, кона ульнесь алтазь ансяк кемеманть коряс, максови Иисус Христоснэнь кемицятненень.

23Кемеманть самодо икеле минь ульнинек пекстазь Коенть ванстоманзо алов се шкас, зярс эзь яволявтово-панжово те сыця кемемась.24Истямо ладсо Коесь ульнесь минек трицякс-кастыцякс Христосонь самс: кемеманть коряс миненек чумовтомокс теевемга.25Ней уш сась кемемась, ды минь лисинек трицянть-кастыцянть кедензэ алдо.

Тынь Пазонь эйкакшт – аволь уреть

26Христос Иисуснэнь кемеманть коряс тынь весе теевиде Пазонь эйкакшокс.27Эдь весе тынь, кить нававтызь-лемдизь пряст, теньсэ вейсэндявиде Христос марто, теке оршавиде Христоссо.28Ней уш ялатеке, улят тон еврей эли лия раськень ломань, уре эли олячисэ, цёра эли ава. Весе тынь ней вейкеть, вейсэндязь Христос Иисус вельде.29Бути тынь Христосонь, сестэ тынь Авраамонь буень-раськень поладыцянзо, ды тыненк максови се, мезенть Пазось алтызе Авраамнень.


предыдущая глава Глава 3 следующая глава