Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 10

Павол иди эсь важодеманзо

1Мон, Павол, кона тынк ютксо улемстэ вельть пелицян, ансяк зярдо тынденк васолан, допрок а пелицян, – кода кортыть кой-кить, – монсь ней пшкадян тенк Христосонь сэтьмечисэ ды чевтечисэ.2Энялдан тенк: зярдо таго сан тыненк, илямизь кармавто монь улеме истямо апелицякс ды калгодокс. Кемеде тень, мон эрсян истямокс сетнень марто, кить чумондыть, келя, минь эрятано те масторлангонь ломантнень ладсо.3Куш минь эрятанояк те масторлангсонть, ялатеке минь тюртяно аволь сонзэ ломантнень ладсо.4Минек тюремань кедьёнкстнэ аволь ломанень пельде. Сынь Пазонть пельде, ды сынст ули виест яжамс душманонь сехте кемекстазь кекшема таркатнень. Минь калавттано ломанень превень арсевкстнэнь-кодавкстнэнь5ды эрьва кодамо покшкавтнеманть, кона а нолды ломантнень Пазонть содамо. Сайтяно полонс-пленс ломантнень весе арсевксэст, ды тейтяно эйсэст Христоснэнь кунсолыцякс.6Ды зярдо Христосонь кедь алов тынк прянк максомась ули прядозь педе пес, сестэ минь ультяно анокт пандомс чумонзо эрьванть, кие а кунсолы.

7Ванодояк, мезе тынк сельме икеле! Бути кияк кеместэ арси: сон Христосонь, сестэ кадык арсезеви седеяк: миньгак Христосонь истя жо, кода сон.8Бути мон мик аламодо седе пек прям шнан минсенек азорксчисэнть, монень а визькс. Те азорксчинть миненек максызе Азорось тынк кастоманк-кемекстамонк кисэ, аволь яжамонк-калавтоманк кисэ!9Кадык а арсить монь эйстэ, келя, мон ансяк тандавтнян тынк эсень сёрмасон.10Конат-конат кортыть: «Паволонь сёрманзо виевть ды кеметь, а вана сонсь ютксонок улемстэ неяви лавшокс ды кортыяк каназа кельсэ!»11Кадык неть кортыцятне кирдить мельсэст: минь ультяно истят жо тынк ютксо тевтнесэяк, кодатано тынк эйстэ васоло сёрмадозь сёрматнесэ.

12Минек арась смелчинек арамс сетнень юткс ды вейкетстямс прянок сетнень марто, конат сынсь шныть эсь пряст. Вай, кодат сынь чаволат! Сынь онкстыть пряст эсест онкссо ды вейкетстить пряст ансяк эсест марто!13Минь, мекевланк, а карматано эсь прянок шнамо седе пек сень эйстэ, мезе тенек онкстазь-явозь Пазонть пельде, ды те минек важодемасонть ультядо тыньгак.14Зярс тынь аштетядо миненек онкстазь-явозь таркасонть, секс минь тынк ютксо важодемасонок а печтнетяно сонзэ трокс. Эдь те минь васенцекс сынек тынк видьскак Христосто Кенярксов кулянть пачтямо.15Минь а шнатано прянок миненек онкстазденть седе пек эли лиянь важодемасо. Мекевланк, минек ули седейнежедьксэнек: тынк кемеманть касоманзо марто седе пек келейгали минек важодемась тынк ютксо – нама, миненек онкстазденть-явозденть аволь седе ламо.16Сестэ минь тутано Кенярксов кулянть пачтямо лия таркава, тынденк седе васов, ды а карматано прянок шнамо се важодемасонть, конань теизь лиятне сыненст онкстазь-явозь таркасонть.17Кода ёвтазь Сёрмадовкссо:
«Кинь ули мелезэ шнамс эсь прянзо,
кадык шнасы Азоронть эйсэ!»
18Эдь кемевикс ансяк се, кинь Азорось шны, аволь се, кие сонсь эсь прянзо шны.


предыдущая глава Глава 10 следующая глава