Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 8

Лезкс Ерусалимень кемицятнень туртов

1Кемиця ялгат, минек меленек ёвтамс тенк седе, кода сюпавсто Пазось казинзе Эсь чанстьсэнзэ Македониянь кемикуротнень.2Куш сынст варчавтнесть-снартнесть ламо стакачить, ялатеке сынст кенярксост валозь валовсь чудикерькссэ. Эсест покш арасьчист лангскак апак вано, сынь пурнасть лиятнень лезэс пек сюпав-важов казне!3Мон яволявтан-кемекстан: сынь макссть эсь виест коряс ды мик эсь вийдесткак ламо. Эсь мелест коряс,4сынь пек энялдсть максомс тенст кеняркс: лездамс вейсэ лиятнень марто Пазонь ломантненень Ерусалимсэ.5Те ульнесь пек ламо сень коряс, мезде минь арсинек! Васняяк сынь максызь эсь пряст Азоронтень, ды мейле, Пазонть мелензэ коряс, истя жо максызь эсь пряст миненеккак.6Секс минь энялдынек Титнэнь прядомс тынк кедьсэяк се кенярдовтыця тевенть, конанень сон уш путсь ушодкс.7Тынь весемесэ вельть сюпавт: кемемасо, мазы кельвалсо, содамочисэ, виде мельсэ-бажамосо, миненек вечкемасонк. Секскак те лездамонь тевсэнтькак истя жо уледе сюпав-важов максыцякс.

8Монь арась мелем вийсэ кармавтомс тынк тень тееме. А вана зярдо мон ёвтнян тыненк лиятнень седеень паломадост, теньсэ мон варчавтнян-снартнян тынк вечкемань алкуксчинть.9Тынь уш содатадо, кодамо покш минек Иисус Христос Азоронть чанстезэ: куш Сон ульнесь сюпав, тынк кисэ теевсь кажовкс, истя Эсь кажовчисэнзэ теемс тынк сюпавокс.10Вана тенк монь превспутомам те лездамонь тевенть коряс: тыненк улевель седе паро нейке прядомс сонзэ, конанень путыде ушодкс мелят. Эдь тынь те тевенть аволь ансяк васенцекс ушодынк, истя жо васенцекс арсинккак.11Истямо ладсо, ней тевенть прядомстояк невтеде секе жо анокчинть, конань невтинк сонзэ арсемстэ! Максодо-путодо эсь виенк коряс!12Ды бути тынк ули анокчинк максомс, сестэ Пазось паро мельсэ сайсы тынк казненк. Эдь Пазось учи сень, мезенк ули, аволь сень, мезенк арась.13Монь арась мелем саемс стака канстонть лиятнень лангсто ды путомс тынк лангс. Мекевланк, улезэ истямо лезксэнь максомась карадо-каршонь.14Ней тынь эсь сюпав уличисэнк шождалгавтсынк сынст арасьчинть. Зярдо тынк ули арасьчи, сестэ сынь топавтсызь сонзэ эсь сюпав уличисэст. Истя ули вейкетьксчи.15Теде кортави Пазонь пельде Сёрмадовкссонтькак:
«Сень, кие пурнась ламо, арасель лиядксозо,
ды сеяк, кие пурнась аламо, эзь сода арасьчи».

Тит ды килангонь ялганзо

16Сюкпря Пазонтень, кие кирвазтизе Титэнь седейс тынк кисэ секе жо бажамонть, кона палы минек седейсэяк!17Сон кецязь кецясь минек энялдомантень ды сыргияк тенк эсь мелензэ-олянзо коряс, аволь ансяк минек вешеманок кувалт.18Сонзэ марто минь кучтано вейке кемиця цёра, конань весе кемикуротне пек шныть Кенярксов кулянть пачтямонзо кисэ.19Теде башка, кемикуротне кочкизь сонзэ молемс минек марто те вечкемань казненть пачтямо, зярс минь те тевсэнть важодтяно Азоронть шнамонзо кисэ ды эсенек лездамонь меленек невтеманзо кисэ.20Минь бажатано киненьгак а максомс тувтал чумондомс минек сень кисэ, кода ды мезе тейтяно истямо покш казезь ярмактнень марто.21Минь терявттано весементь теемс парсте ломантнень икелеяк, аволь ансяк Азоронть сельмензэ икеле.22Неть кавтотнень марто минь кучтано таго вейке кемиця ялганок. Минь а весть ванкшнынек сонзэ мельга ды неинек сонзэ седеень паломанзо эрьва кодамо тевень теемстэ. Ней сонзэ седеяк покш мелезэ-бажамозо лездамс тыненк, секс мекс сон домкасто кеми лангозонк.23Титэнь коряс ёвтан вана мезе: сон монь ялгам ды мартон важодиця тыненк лездамсто. Лия кавто кемиця ялгатне – кемикуротнень кучовт, кандыть Христоснэнь шнамо.24Секс ней тевсэ невтинк тенст эсь вечкеманк! Кадык весе кемикуротне кармить содамо: минь аволь стяко шнатано прянок тынк эйсэ!


предыдущая глава Глава 8 следующая глава