Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 7

1Вечкевикс ялган, ванодо, кодат алтамот максозь миненек. Секс, эрьга ванськавтовтано весемеденть, мезесь нулгодьксэкс теи рунгонть ды ойменть, ды, Паздонть пелезь-талнозь, алтасынек Сонензэ весе эсь эрямонок!

Кемикурось канды кеняркс Паволнэнь

2Вечкезь саимизь-совавтомизь минек эсь седеезэнк! Минь киненьгак эзинек тее берянь, киненьгак эзинек кандо зыян, кинь пельдеяк эзинек сюпалгадо.3Тень мон кортан аволь тынк судямонк-корямонк кисэ. Кода мон уш икелеяк тыненк кортынь: тынь свал минек седейсэ, ды минь тынк марто вейсэ эрямосояк ды куломасояк.4Мон тыненк кортан панжадо седейсэ, лангозонк пек кемезь! Мон тынк эйсэ пек каштангалян! Тынь монень оймавтыцят-кемекстыцят, ды кенярксось пешти монь, весе минек стакачитнень лангс апак вано.

5Македонияв самодо мейлеяк миненек ялатеке арасель кодамояк оймамо. Эрьва ёндо минек лепштясть веенст стакачить: перьканок сёвномат-пелькстамот, седейсэнек пелема.6Ансяк Пазось, нолдазь прятнень нежесь ды кемекстыцясь, оймавтымизь-кемекстымизь минеккак Титэнь самосонть.7Сонзэ самодонть башка, минек оймавтымизь-кемекстымизь ёвтнемазо седе, кода тынь сонзэ кемекстынк. Сон истя жо ёвтнесь миненек, кодамо тынк покш меленк неемс монь, кода пек ризнэтядо ды кода кеместэ аштетядо монь кисэ. Те монь седеяк пек кенярдовтымим!

8Секскак, бути мон эсь сёрмасон кандыньгак тыненк ризкс, ней уш тень кисэ а янксян. Зярдо мон неия: се сёрмась, кадык аволь куватьс, ялатеке кандсь тенк ризкс, сестэ мик янксиньгак, –9ансяк ней кенярдан. Кенярдан аволь тенк ризксэнь кандомантень, а вана сенень: те ризксэсь ветидизь пежетте велявтомас. Тень кондямо ризксэсь – Пазонть пельде. Истя минь тыненк кодамояк зыян эзинек кандо.10Пазонть пельде седей ризксэсь вети пежетте велявтомас, кона канды идема, мезень кисэ а эряви янксемс. Масторлангонь теевть ризксэсь, мекевланк, канды кулома.11Ванодоя, мезе тейсь тынк марто Пазонть пельде ризксэсь! Зяро кармась улеме оймень путоманк, зяро чумосто лисемань меленк! Истя жо зяро сыргозсь эйсэнк ацирьгадома, пелема-талнома, куроксто вастовомань мельть, видестэ теемань мельть ды чумонь пандомань мельть сенень, кие тейсь берянь тев! Весе теньсэ тынь невтинк эсь чумовтомочинк те тевсэнть.12Эдь мон сёрмадыя се сёрманть аволь сень кисэ, кие тейсь берянь тев, аволь сень кисэяк, кинь покордызь. Мон тень сёрмадыя сень кувалма: невтемс тенк Пазонть сельмензэ икеле, кода виевстэ минь путтано тыненк эсь ойменек-седеенек!13Те минек пек оймавтымизь-кемекстымизь – тынк оймавтомась-кемекстамось.

Ды те зярс а весе! Теде пек минек кецявтымизь Титэнь кенярксось. Эдь весе тынь саинк сонзэ оймензэ лангсто кевенть.14Мон шныдизь тынк сонзэ икеле, ды монень эзь саво кисэнк якстерьгалемс! Весе се вадрясь, мезе минь Титнэнь кортакшнынек тынденк, ульсь алкуксокс, истя жо весемесь сеяк, мезе минь кортынек тыненк.15Титэнь седеезэ яла пештяви тыненк седеяк покш вечкемасо, зярдо мелезэнзэ леди, кода тынь топавтыде сонзэ превспутоманзо, кода вастынк сонзэ пелема ды талнома марто.16Мон кенярдан: весемесэ монь ули покш кемемам нежедемс тынк лангс!


предыдущая глава Глава 7 следующая глава