Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 6

1Секскак, кода Пазонть марто важодицят, энялдтано тыненк: Пазонь чанстенть, кона тыненк максозь, илинк кадо стяконь тевекс!2Эдь Пазось корты:
«Паро шкасто Мон маритинь тонь,
идема чистэ Мон лездынь теть!»
Ды вана ней – те паро шкась, вантая, ней – идема чись!

Павол лангс празь стакачитне

3Минек арась меленек улемс киненьгак пупордямо кевекс: кияк мейсэяк аволимизь мурне-покорда важодеманок кисэ.4Мекевланк, кода Пазонь алкуксонь важодицят, минь весемесэ аштетяно вадря невтевксэкс: цидярдозь кандтано пиштемат, кажот, стакачить.5Минь кирдинек чавомат, пекстамо кудот, абунгалицянь нарьгамот, стака важодемань шкат, апак удо веть, вачочить.6Минь важодтяно Пазонтень ваньксчисэ, содамочисэ, куватень кирдемасо, парочисэ, Иневанькс Оймеялтсо, алкуксонь вечкемасо,7видечинь валсо, Пазонь вийсэ. Минек тюремань кедьёнксонок – Пазонь меленть топавтома, конань вийсэ каявкшнотано ды пряноккак вансттано.8Минек эйсэ ловить ды сёвныть, лангозонок кенгелить ды шнытькак эйсэнек. Минек неить манчицякс, ансяк минь ёвтнетяно видечи.9Ловить минек асодавиксэкс, ансяк минь содавикст весенень. Минь эль кулотано, ансяк ванодоя, минь эрятано! Минек муцить, ансяк минь апак машто.10Минь ризнэтяно, ды ялатеке свал кенярдтано. Куш минсь кажовт, ялатеке ламонь сюпавкс тейтяно. Минек мезенеккак арась, ансяк, ялатеке, минек эрьва мезенек ули.

11Коринфень вечкевикс ялгат! Минь кортынек тыненк седейшкава. Минь вечкезь саидизь-совавтыдизь тынк эсь седеезэнек.12Те тынь сайтядо минек эйстэ эсь седеенк, аволь минь.13Мон кортан тенк, кода эсь эйкакшон туртов. Тееде каршонок истя жо: саимизь-совавтомизь минеккак эсь седеезэнк!

Кемицятне – те Пазонь кудо

14Илядо терявтояк кильдемс прянк вейке ашкос Христоснэнь акемицятнень марто! Арази ули видечинь ломаненть вейсэнь тевезэ койтементь марто? Арази мезеяк вейкетсти валдонть ды чоподанть?15Пракшныть-а пракшныть ве мельс Христос ды Велиар*? Эли ули-арась вейсэндямо кемицянть акемиця марто?16Кода вейсэндямс Пазонь кудонть аволь алкуксонь пазтнэнь марто? Эдь тынь – эриця Пазонть кудозо! Сонсь Пазось ёвтась:
«Мон озан эрямо сынст кедьс, Мон карман якамо мартост.
Мон улян сынст Пазокс, ды сынь улить Монь ломанекс».
17Секскак Азорось таго корты:
«Кадынк сынст ды яводо эйстэст,
илядо токше аваньксэнть, –
ды Мон сайтядызь тынк Эстень.
18Мон карман улеме тенк Тетякс,
ды тынь ультядо Монь тиринь цёракс ды тейтерекс.
Истя корты Весеменькирдиця Азорось».


предыдущая глава Глава 6 следующая глава