Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 5

1Минь содатано: зярдо кизэнь те кудынесь, косо минь ней эрятано – минек мода лангонь рунгось -, ули калавтозь, сестэ минек учи Пазонь анокставт эрямо тарканок менель лангсо. Те – пингеде пингень, аволь кедьсэ теевть кудо.2Зярс минь теске, минь укстнетяно-кувсетяно се шканть учомасо, зярдо минь оршавтано менелень кудонок вельтявкссонть!3Ансяк зярдо минь оршавтано сонзэ эйсэ, сестэ уш а карматано улеме штапокс.4Зярс эрятано эсенек кизэнь кудынесэнть, минь стакасто укстнетяно-кувсетяно вана мекс: минек арась меленек каямс лангстонок мода лангонь рунгонть. Мекевланк, меленек теске оршавомс менеленсесэнть, ды сестэ пингеде пингень эрямось лиякстомтовлизе-вельтявлизе минек кулыця рунгонть.5Вана самай тень туртов Сонсь Пазось анокстымизь минек, ды тень кемекстамга максызе тенек Эсь Оймеялтонзо.

6Секскак минь свал оймазь ды а пелицят, куш содатано: зярс минь эрятано эсь рунгосонок, – минь кудовтомот, аволь Азоронть кедьсэ.7Эдь ней минь эрятано кемемань коряс, аволь неемань коряс.8Истя, минь оймазь ды а пелицят, куш минек меленек седе курок лисемс рунгостонть ды туемс Азоронтень, эсенек кудов.9Секскак, минек сехте покш меленек савтомс Сонензэ, сень лангс апак вано, “кудосо” минь уш эли аволь.10Эдь весенень миненек сави аштемс Христосонь судонть икеле, ды эрьвантень максови весе сень кисэ, мезе сон тейсь рунгосо эрямстонзо: паро эли берянь.

Пазонть марто ладямос-ялгаксчис тердема

11Минь содатано, мезе истямо Азоронть мельде пелемась, ды секс бажатано тенень кемевтемс лиятненьгак. Пазось, нама, минек парсте содасамизь, ды мон кеман: тыньгак эсь оймеёжосонк минек содасамизь.12Минь а снартнетяно таго шнамс эсь прянок тынк икеле. Мекевланк, минь макстано тыненк тувтал каштангалемс минек эйсэ. Сестэ тынк ули мезе ёвтамс сетненень, кить каштангалить ломанень чачосо-колчисэ, аволь сеньсэ, мезесь седейсэ.13Бути минь ветятано эсь прянок превстэ лисезь ломань ладсо, тень тейтяно Пазонть кисэ. Бути минь эсь превсэнек, истятано тынк кисэ.14Эдь Христосонь вечкемась а кады миненек кочксема. Минь сынек истямо мельс-арсемас: вейке Ломань кулось весень кисэ, лисни – кулость весе.15Ды Христос кулось весень кисэ вана мекс: сетне, кить эрить, лоткавольть эсест туртов эрямодо, ды кармавольть эрямо ансяк Сень туртов, кие сынст кисэ кулось ды вельмесь.

16Истямо ладсо, те шкастонть саезь минь уш киньгак а онкстнетяно ломанень вановтонь коряс. Бути икеле минь Христосоньгак чарькодилинек ломанень вановтонь коряс – ней уш Сонзэ содасынек аволь истя.17Кие сюлмазь Христос марто, се – Пазонь од теевкс. Весе таштось ютась-тусь, ды, вантая, сась одось!18Весе тень теизе Пазось, кона Иисус Христос вельде ладимизь минек Эсь мартонзо ды макссь миненек важодема тев – ладявтомс мартонзо лиятненьгак.19Лиякс: Пазось Сонсь Христос вельде ладизе Эсь мартонзо весе масторлангонть. Сон эзинзе чумондо ломантнень сынст чумост-тапавксост кисэ ды кармавтсь миненек пачтямс кулянть Сонзэ марто ладямодо.20Истя, минь – Христосонь пельде кучовт, ды Пазось Сонсь минек вельде корты-энялды тыненк. Христосонь лемсэ вештяно: «Мереде тынк ладямс Пазонть марто!»21Христосонь, конань арасельть пежетензэ, Пазось теизе аноксокс минек пежетенек кисэ. Тень кувалт минь Христос вельде ловозтяно чумовтомокс Пазонть икеле.


предыдущая глава Глава 5 следующая глава