Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 16

Ярмаконь пурнамось Ерусалимень кемицятнень туртов

1Ней сёрмадан Пазонь ломантнень туртов ярмаконь пурнамодо: мезе мон кармавтынь теемс Галатиянь кемикуротнесэ, текень тееде тыньгак.2Кадык эрьвась тынк эйстэ недлячистэнть кудосонзо путы башка зяро ярмакт, зяро мери сонзэ уличизэ, ды ванстсынзе. Ды зярдо мон тыненк сан, сестэ уш сынст пурнамс а эряви.3А вана зярдо тыненк пачкодян, сестэ кучсынь эсенк кочкавт ломантнень кемекстамо сёрма марто Ерусалимев тынк ярмактнень пачтямо.4Бути жо тень кувалма моненьгак эряви тов молемс, сестэ минь мольтяно вейсэ.

Якамонь кувалт Паволонь мелензэ-превензэ

5Мон сан тенк сестэ, зярдо ютаса Македониянть, эдь мон пурнан якамо Македониява.6Тынк кедьсэ мон зярскак эрян, паряк, телентькак мик ютавтса. Ансяк мейле тынь монь пурнасамизь тов, ков мон молян.7А ней монь арась мелем совамс тыненк ансяк варштамо, ваксканк ютамсто. Мекевланк, мон кеман улемс мартонк седе куватьс, бути мери Азорось.8Тесэ, Эфессэ, мон улян Ведьгеменце чинь покшчинть самс.9Эдь монь икеле тесэ келейстэ панжовсть кенкштне покш ды лакиця важодемас, куш каршо молицятнедеяк ламо.

10Бути сы тыненк Тимофей, ванодо сестэ: кадык сон, тынк кедьсэ улемстэ, мездеяк а пели. Эдь сон, кода монгак, теи Азоронть тевензэ.11Кадык кияк а ваны лангозонзо безардезь! Ансяк мейле, паронь арсезь, пурнынк сонзэ ки лангс, кадык мекев сы монень. Мон учан сонзэ тесэ кемиця ялгатнень марто.

12Аполлос кемиця ялганть икеле мон пек энялдынь: саволь сон тыненк лия кемицятнень марто, ансяк сонзэ ней арасель истямо мелезэ. Сон сы, зярдо карми улеме ён шказо.

Меельце превспутомат ды сюкпрят

13Илядо удо, кеместэ аштеде кемемасонк, уледе апелицят ды виевть!14Тееде весементь вечкема марто!

15Тынь весе содасынк Стефанасонь кудораськенть-семиянть, конат васенцекс теевсть христианокс Акайясо ды максызь эсь пряст Пазонь ломантненень важодемас. Секс энялдан икеленк, кемиця ялгат:16тыньгак кунсолодо истят прявтнэнь ды весе сетненьгак, конат истя жо важодить мартост покш мелень путозь.17Мон кенярдан Стефанасонь, Фортунатонь ды Акаикень тей самозост. Сынь монень максызь сень, мезе тень эзь сатно тынстеменк.18Сынь оймавтызь кода тынк, истя монь ойментькак. Ловодо истят ломантнень!

19Асиянь кемикуротнеяк кучить тыненк сюкпрят! Истя жо Акила Прискилла марто ды кемикурось, кона пурнавкшны сынст кудосо, кучить тенк христианонь седейшкавань сюкпрят!20Весе тесэнь кемиця ялгатне кучить тенк сюкпрят. Шумбракстнеде вейкенк-вейкенк марто Пазонь ломанень паламосо.

21А вана ней мон сёрмадан эсь кедьсэнь: сюкпря Паволонь пельде.22Кие а вечксы Азоронть – улезэ сюдозь! Маран ата! – Сак, минек Азорось!23Иисус Христос Азоронть чанстесь улезэ тынк марто!24Ды мон вечктядызь тынк весень, кие Христос Иисусонь. Аминь.


*а 16:22 Маран ата – арамеянь келень валт. Смустест: Сак, минек Азорось! эли: Минек Азорось сы!

предыдущая глава Глава 16 следующая глава