Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 15

Кулозьстэ Христосонь вельмемась

1Кемиця ялгат! Ней ледстяса мелезэнк Кенярксов кулянть, конань мон тыненк пачтия ды конань тынь саинк эсь седеезэнк ды конань эйсэ ней кеместэ аштетядо.2Сонзэ вельде тынь ультядояк идезь, бути кирдьсынк сонзэ допрок истямокс, кодамокс мон сонзэ тыненк пачтия. Лиякс, тынк кемемас самось ули стяконь.3Истя, васенцекс, мон ёвтыя тенк сень, мезесь монень эстеньгак максозель: Христос кулось минек пежетнень кисэ, кода ёвтазель Сёрмадовкстнэсэ.4Сон ульнесь калмазь ды колмоце чистэ вельмевтезь, кода ёвтазель Сёрмадовкстнэсэ.5Сон невтизе Эсь прянзо Кефанень, мейле кемгавтово апостолтнэнень.6Мейле Сон невтизе прянзо ве шкасто вете сядодо ламо мельганзо молицятненень. Конат-конат ютксост уш кулость, а седе ламотне эрить течинь чис.7Мейле Сон невтизе прянзо Яковнень, седе мейле весе лия апостолтнэнень.8Сехте меельцекс Сон невтизе прянзо моненьгак, а шкастонзо чачозь эйкакш ёнов молицянтень.9Эдь мон весе апостолтнэнь эйстэ сехте вишкинян, ды мон а маштован апостолонь лементь кандыцякс вана мекс: мон пансинь Пазонь Кемикуронть.10Пазонь максовт чанстенть коряс жо мон истяман, кодаман ней. Ды монень Сонзэ максовт чанстесь эзь ульне стякокс. Мекевланк, мон лия апостолтнэнь коряс вельть седе пек важодинь. Тень теизе Пазонь чанстесь, кона макссь монень вий, аволь монсь.11Секскак ялатеке, кие тенк пачтизе Кулянть: мон эли сынь. Те се кулясь, конань весе минь пачтятано, ды се, конанень тынь кармиде кемеме.

Кулозьстэ вельмемась

12Истя, Христос кулозьстэ вельмевтезь, кода минь Сондензэ пачтятано. Мекс сестэ конат-конат эйстэнк кортыть, келя, арась кулозьстэ вельмема?13Бути арась кулозьстэ вельмема, сестэ Христоскак кулозьстэ апак вельмевте.14А бути Христос кулозьстэ апак вельмевте, сестэ миненеккак а мезекс пачтямс Кулянть ды тыненккак а мезекс кемемс Христоснэнь.15Ды сестэ минь ультяно мик кенгелиця яволявтыцякс Пазонть каршо. Эдь минь яволявттано: Пазось кулозьстэ вельмевтизе Христосонь. Тень жо Сон эзизе тее, бути арась кулозьстэ вельмема.16Эдь бути арась кулозьстэ вельмема, сестэ Христоскак апак вельмевте.17Ды бути Христос кулозьстэ апак вельмевте, сестэ тынк кемемась лезэвтеме ды тынь икеле ладсо аштетядо эсенк пежетенк потсо.18Тень коряс истя жо лисни: Христоснэнь сеть кемицятне, конат кулость, ёмасть пингеде пингес.19Ды бути минек седейнежедьксэсь Христос лангс маштови ансяк те эрямонтень, сестэ минь масторлангсонть сехте седей сэредстиця ломанть.

20А вана ней Христос алкукскак кулозьстэ вельмевтезь – ды те ушодкс лия кулозтнень вельмемантень.21Эдь кода куломась ушодовсь вейке ломань вельде, истя кулозьстэ вельмемаськак ушодовсь вейке Ломань вельде.22Ды кода весе минь кулотано Адамонь кувалт, самай истя жо эрямос вельмевтезьгак ультяно Христосонь кувалт.23Ансяк эрьвась вельмевтеви эсь шкастонзо-порастонзо: васняяк Христос, мейле, зярдо Сон сы, сеть, конат Христосонь.24Мейле сы песь. Христос изнясынзе весе чопода оймеялтонь прявтнэнь, азорксчитнень ды кармавтыця вийтнень ды макссы инязорксчинть Тетя Пазонтень.25Эдь Христоснэнь аравтозь улемс инязорокс семс, зярс Пазось а путсынзе весе душмантнэнь Сонзэ пильге алов.26Кода меельце душман, изнязь ули куломась.27Сёрмадовкссо ёвтазь: «Пазось весементь максызе-путызе Сонзэ пильге алов». Куш сёрмадозьгак: «весемесь Сонзэ пильге ало», нама, те ёвтазь аволь Пазонть коряс, кие Сонсь весементь максызе Христосонь кедь алов.28Зярдо Пазось весементь макссы Сонзэ кедь алов, сестэ Пазонь Цёраськак макссы Эсь прянзо Тетянть кедь алов, кона максокшнызе весементь Сонзэ кедь алов. Истя Пазось карми улеме весемекс ды весемесэ.

29Эно мезес бажить сеть ломантне, конат нававтыть-лемдить эсь пряст кулозтнень кисэ? Бути кулозтне зярдояк а улить вельмевтезь, сестэ мекс сынст кисэ нававтыть пряст?30Мекс сестэ миненеккак эрьва чистэ тонгомс прянок пелемачис?31А мон, кемиця ялган, алкукскак, эрьва чистэ ванан куломанть сельмс! Истя жо алкукс мон шнан эсь прям тынк эйсэ минек Христос Иисус Азоронть икеле!32Ды бути мон арсевлинь ансяк ломанень вановтонь коряс, сестэ мезекс эрявсь монень тюремс Эфессэ идем ракшатнень марто? Кодамо монень тень эйстэ лезэсь? Бути кулозтне а вельмить, сестэ «эрьга карматано ярсамо ды симеме, ялатеке ванды кулотано!»33Илядо ильведстеве! «Берянь ялгатне коласызь мик сехте паро обуцянтькак».34Совадо валдо превс, лоткадо пежетень теемадо! Эдь тынк ютксо улить истят, конат тунь а содасызь Пазонть. Кода тенк а визькс!

Менель лангонь од рунгось

35Кияк, паряк, кевксти: «Кода кулозтне вельмить? Кодамо сестэ ули сынст рунгост?»36Превтеме! Видьмесь, конань видят, а сыргози од эрямос, бути сон васняяк а кулы.37Тон жо а видят недькснэк-мезнек сюрот-тикшеть, конат мейле касовольть. Аволь, видят ансяк вейке видьмине, товзюронь эли лиянь-мезень.38А уш Пазось максы тензэ недькс Эсь мелензэ коряс; те недьксэсь эрьва видьменть эсензэ.39Аволь весе лексицятнень-эрицятнень рунгост вейкеть: ломаненть эсензэ, ракшанть-скотинанть эсензэ, нармуненть эсензэ, калонтькак эсензэ.40Улить менель лангонь рунгот ды мода лангонь рунгот. Менель лангонь рунготнень эсест мазычист, мода лангонсетненьгак эсест.41Чинть мазычизэ – вейке, ковонть ды тештетнень – лия. Мик тештетнеяк явовить эсь мазычисэст вейкест-вейкест эйстэ.

42Истя жо ули кулозтнень вельмемстэяк: видеви ёмиця-наксадыця рунго – вельми пингеде пингес эриця рунго.43Видеви амазый – вельми мазый; видеви лавшо – вельми вийсэ пештязь.44Видеви мода лангонь рунго – вельми оймеялтонь рунго. Бути ули мода лангонь рунго, сестэ, нама, ули оймеялтонь рунгояк.45Эдь Сёрмадовкссо ёвтазь истя: «Васенце ломанесь Адам кармась улеме эриця оймекс». А вана меельце Адамось* ули эрямонь максыця оймеялтокс.46Мода лангонь рунгось ульнесь оймеялтонседенть икеле: васняяк сась мода лангонсесь, ансяк мейле оймеялтонсесь.47Васенце ломанесь ульнесь мода лангсто, теезь мода пульстэ, омбоце ломанесь, Азорось, – менель лангсто.48Кодамо ульнесь мода пульстэсь, истят весе мода пульстэтнеяк. Кодамо менель лангстось, истят улить весе менель лангстотнеяк.49Ды сень ладсо, кода минь ней мольтяно мода пульстэ теезь ломаненть ёнов, истя жо самай карматано молеме менелень ломаненть ёновгак.

50Монь мелем, кемиця ялгат, ёвтамс тыненк: минек сывелень-верень рунгось а совави Пазонть Инязорксчинтень. Истя жо кулыцясь-ёмицясь кодаяк а тееви акулыцякс-аёмицякс.51Кунсолодо, мон панжса тенк салавачинть: аволь весе минь кулотано, ансяк весе полавтовтано –52апак учо, вейке липкестэ, зярдо зэрьксты меельце торамонь гайтесь. Сон гайгсты – ды кулозтне вельмевтевить акулыцякс-аёмицякс, а вана минь, эрицятне, полавтовтано.53Эдь те минек ёмиця рунгонтень эряви теевемс аёмицякс, ды те кулыця рунгонтеньгак эряви велявтомс акулыцякс.54Ды зярдо те ёмицясь тееви аёмицякс ды те кулыцясь велявты акулыцякс, сестэ топавтовить Сёрмадовкссо ёвтазь Пазонь валтнэ:
«Куломась изнязь! Сонзэ нилизе изнямось!
55Кулома, косо тонь пупамо сардось?
Тоначи, косо тонь изнямось?»
56Куломань пупамо сардось – те пежетесь. А пежетенть виезэ – Коенть эйсэ.57Сюкпря Пазонтень, Сон кази миненек изнямо минек Иисус Христос Азоронть вельде!58Вана мекс, монь вечкевикс кемиця ялган, аштеде кеместэ ды илядо шатавтово. Весе седейсэнк свал важодеде Азоронь тевсэнть, эдь тынь содатадо: тынк важодемась Азоронть икеле стяко а ёми.


предыдущая глава Глава 15 следующая глава