Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 10

Илядо сюконя аволь алкуксонь пазтнэнень

1Монь мелем, кемиця ялгат, ледстямс тынк мельс вана мезе: весе минек покштятнень ветнесь-ванстсь пелень палмань, ды весе ютасть Якстере иневеденть трокс*.2Те пельсэнть ды иневедьсэнть весе сынь нававтозельть Моисей мельга молицякс.3Весе сынь ярсасть вейке ды секе жо менелень ярсамопельденть,4ды весе сынь симсть вейке ды теке жо менелень симемапельденть. Сынь симсть менелень кевпандосто, кона мольсь мартост. Те кевпандось жо ульнесь Сонсь Христос.5Ды ялатеке ламотне эйстэст эзизь савто Пазонтень, ды сынь пракшность-кулсесть чаво модас.6Весе те теевсь миненек невтемакс: эрьга, а карматано бажамо зыянонь тееме, кода бажасть сетне!7Илядо сюконя аволь алкуксонь пазтнэнень, кода конат-конат эйстэст. Эдь Сёрмадовкссо ёвтазь: «Ломантне озасть ярсамо-симеме, ды мейле эсест теевть пазтнэнь лемс тейсть амазы киштнемкат-морсемкат».8А карматано ускурямо-усксевеме, кода конат-конат эйстэст. Сынь кармасть ускурямо-усксевеме – ды вейке чис ёмасть-прасть комськолмово тёжат.9А карматано снартнеме-варчавтнеме Христосонь, кода снартнесть-варчавтнесть Сонзэ конат-конат эйстэст. Секскак сынь кулость-ёмасть гуень пупамодо.10Илядо пеняця-шално, кода пеняцясть-шалность конат-конат эйстэст – ды сынст куловтынзе ёмавтыця ангел.

11Весе те теевсь мартост лиятненень невтемакс ды сёрмадозь минек тонавтомга-ванстомга, эдь минь эрятано пингетнень прядовома шкасто.12Секскак, кие арси, сон кеместэ ашти, кадык ваны, кода а прамс.13Стакачинь снартнематне-варчавтнематне, конатне савкшныть тенк печтямс – те ансяк ломанень эрямонь-аштемань снартнемат. Пазось ялатеке кемевикс, ды Сон а нолды истят снартнемат, конат улевельть аволь тынк виенк коряс. Теке марто эрьва снартнемастонть Сон невти лисема ки ды вийгак максы сонзэ изнямга.

14Вана мекс, монь вечкевикс ялган, оргодеде аволь алкуксонь пазнэнь сюконямодо!15Мон карман кортамо мартонк, кода превей ломань марто. Тынсь арсинк монь валон.16Чанстямонь кечесь, конань кисэ минь ёвтатано сюкпря Пазонтень, вейсэнди минек весень Христосонь верентень. Ды кшиськак, конань минь синдтяно, сэвемстэнзэ вейсэнди минек весень Христосонь рунгонтень.17Те кшись вейке, ды истя жо весе миньгак, куш минь ламонек, ультяно вейке рунгокс секс, мекс весе явтано вейке ды теке жо кшинть.18Варштадояк израилень раськенть лангс! Сеть, конат ярсыть аноксокс кандозденть, вейсэндявить теньсэ Пазонь алтарентень.19Сестэ мезень коряс эно мон кортан? Арази авиде пазнэнь кандозенть ули кодамо-бути смустезэ эли сонсь авиде пазоськак невти мезе-бути алкуксонь?20Нама, аволь! Мон кортан вана мезде: зярдо виде Пазонь асодыцятне кандыть анокс алтарь лангс, сынь кандыть сонзэ идемевстненень, аволь Пазонтень. А вана монь арась мелем вейсэндямс тынк идемевстнень марто.21Тынь а симевтядо ве шкасто Азоронть кечестэ ды истя жо идемевсень кечестэяк! Истя жо тынь ве шкасто а улевтядо Азоронть столь экшсэ ды идемевсень столь экшсэяк.22Эли минек меленек ацирьгавтнемс теньсэ Азоронть? Арази минь Сондензэ виевть?

Тееде весементь Пазонть шнамга

23Тынь кортатадо: «Монень весе мереви!» Нама, ансяк аволь весе моли лезэкс. «Монень весе мереви!» Нама, ансяк аволь весе касты-кемексты.24Кадык кияк а вешни эстензэ лезэ, кадык мелявты лиянть кисэ ды теи тензэ паро!25Весенть эйстэ, мезе рамсетядо сывелень микшницянь кедьстэ, ярсадо апак кевкстне ды оймеёжонь апак талновто.26Эдь Сёрмадовкссо ёвтазь: «Модась ды весе, мезе сонзэ лангсо, Азоронть».27Бути кияк акемицятнень эйстэ тердтядызь тынк ярсамо ды тынь сайтядо мель молемс, сестэ весементь эйстэ, мезе икеленк путыть, ярсадо апак кевкстне ды оймеёжонь апак талновто.28А бути кияк тенк мери: «Те сывелесь авиде пазнэнь аноксокс кандозенть эйстэ», – сестэ илядо ярса те сывельденть – се ломаненть кисэ, кие ёвтась, ды оймеёжонть кисэ, эдь «модась ды весе, мезе сонзэ лангсо, Азоронть».29Мон ней кортан те лия ломаненть оймеёжодонть, аволь тынк оймеёжодонть. Нама, мон а максса лия ломанень оймеёжонтень пирямс монь олячинть.30Бути мон ёвтан сюкпря Пазонтень ярсамопеленть кисэ, сестэ а эряви монь пазямс-кортавтомс, мезенть кисэ монсь ёвтан сюкпря.31Истя вана, ярстадояк, симтядояк – весе, мезе тынь тейтядо, тееде Пазонть шнамга.32Эрядо истя: илядо уле пупордямо кевекс еврейтнененьгак, лия раськетнененьгак ды Пазонь кемикуронтеньгак.33Тееде монь ладсо: мон бажан весенень савтомс весемесэ ды, сынст идемга, вешнян лезэ весе ломантненень, аволь эстень.


*а 10:1 пелень палмань – столб облака

*б 10:18 анокс – жертва


предыдущая глава Глава 10 следующая глава