Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 8

Аволь алкуксонь пазнэнь алтазь сывелесь

1Ней карман кортамо сывельденть, кона алтазь авиде пазтнэнень. Нама, “минек весень ули содамочинек тень кувалма”. Ансяк истямо содамочись чачты прянь верьга кандома, вечкемась жо кемексты-касты.2Бути кияк лови: сон уш мезе-бути соды, се зярс а соды истя, кода тензэ эряволь содамс.3А вана кие вечксы Пазонть, сенень максозь содамочи Сонзэ пельде.4Ней мон кортан авиде пазнэнь алтазь сывельденть ярсамодо. Минь содатано: масторлангсонть арасть лия пазт, ули ансяк вейке Паз.5Ды бути улитькак истят, конатненень мерить “пазт”, менель лангсо эли мода лангсо, – ды истят “пазтнэде” кода “азортнэдеяк” ламо, –6минек ялатеке ансяк вейке Пазонок, Тетясь, весемень ушодыцясь-теицясь, конань туртов миньгак эрятано. Азороноккак вейке, Иисус Христос, конань вельде теезь весемесь, ды конань вельде миньгак эрятано.

7Ансяк аволь весень ули истямо содамочист. Конат-конат оймеёжосост те шкас сюконить авиде пазтнэнень, натой нейгак, зярдо ярсыть истямо сывельденть, арсить: сон, келя, алкукскак алтазь пазтнэнень. Истямо арсема марто ярсамось теи аваньксэкс сынст кавтолдыця оймеёжост.8Ярсамопелесь, ялатеке, минек а малавгавтсамизь Пазонтень. Кодамояк лезэ миненек а ули, бути ярстано, ды мезеяк а ёмавттано, бути а ярстано.9Ансяк ванодо: те тынк олячись илязо тееве пупордямокс сетненень, конатнень кемемаст лавшо.10Эдь бути кавтолдыця оймеёжо мартось нетянзат тонь, конань ули содамочизэ, столь экшсэ авиде пазнэнь озкскудосо, сестэ арази а саи сон мель ярсамс се сывельденть, кона алтазь авиде пазтнэнень?11Ды истя тонь содамочисэть ёмавтови те лавшо кемиця ялгась, конань кисэ кулось Христос!12Зярдо тынь истямо ладсо тейтядо пежеть эсь кемиця ялганк каршо ды кандтадо сэредькс сынст кавтолдыця оймеёжонтень, сестэ тынь тейтядо пежеть Христосонь каршояк.13Ды секскак, бути ярсамопелесь карми улеме монь кемиця ялганть туртов пежетьс прамо тувталокс, сестэ уш мон зярдояк а карман ярсамо сывельде, ансяк а правтомс монь кемиця ялганть пежетьс!


предыдущая глава Глава 8 следующая глава