Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 7

Урьвакстомадо-венчамодо

1Ней мон тынк сёрманк каршо ёвтан вана мезе: нама, цёрантень паро а урьвакстомс.2Усксевема-ускурямо тевс а прамонть кувалт, седе паро ули эрьва цёрантень эрямс эсензэ нинзэ марто, ды эрьва авантень – эсензэ мирдензэ марто.3Ды кадык мирдесь топавты мирдень паро тевензэ нинзэ коряс, ды истя жо нись – мирдензэ коряс.4Аволь нись азор эсь рунгонзо лангсо, а уш мирдесь, ды истя жо мирдеськак аволь азор эсь рунгонзо лангсо, а уш нись.5Илядо кадно вейкенк-вейкенк ёжо вачнеманть, бути ансяк зярскак, вейсэнь меленк коряс, постс ды озномас прянь максомга, мейле таго уледе вейсэ. Лиякс, Сатанась совавттадызь пежетьс, бути а саты виенк кирдемс эсь прянк.6Тень мон кортан тенк кода превспутома, аволь кода кармавтома.7Нама, монь мелем: эрявольть весе ломантне истя, кода мон. Ансяк эрьванть Пазонть пельде эсензэ казнезэ: вейкенть вейке, омбоценть лия.

8Апак урьвакстозтненень-венчазтненень ды дова аватненень мон кортан: седе паро эрямс тенст монь ладсо ськамост.9А вана бути эсь прянк тенк а кирдевить, сестэ урьвакстодо-венчадо. Те ули потмо мелень толсо паломадонть седе паро.10Урьвакстомасо-венчамосо сюлмавозтненень мон кармавтан Азоронть пельде, аволь уш монсь: нись илязо яво мирдензэ эйстэ.11Бути сон яви, кадык сестэ эри ськамонзо эли лади мирдензэ марто. Мирдеськак илязо яво нинзэ эйстэ.12Лиятненень кортан монсь, аволь Азорось: бути кемиця цёранть низэ акемиця ды нинть ули мелезэ эрямс сонзэ марто, сестэ мирдесь илязо яво эйстэнзэ.13Ды бути кемиця аванть мирдезэ акемиця ды сонзэ мелезэ эрямс те нинть марто, сестэ аваськак илязо яво эйстэнзэ.14Эдь акемиця мирдесь, кона сюлмави кемиця ни марто, алтави Пазонтень, ды акемиця ниськак, кона сюлмави кемиця мирде марто, алтави Пазонтень. Лиякс, сынст эйкакштнэ улевельть аванькст, а вана истя сыньгак алтавить Пазонтень.15Бути жо акемиця мирденть эли нинть мелезэ явомс, сестэ кадык яви. Истямо тевсэнть кемиця мирдентень эли нинтень а эряви кадовомс мартонзо. Тень лангс апак вано, Азорось ялатеке тердимизь минек эрямс ладязь.16Арази тонеть содави, кемиця ни, паряк идесак мирдеть? Ды тонетькак, кемиця мирде, арази содави, паряк идесак нить?

Кадоводо истямокс, кодамокс тердидизь Пазось

17Эрьвась кадык эри седе товгак се уцясканть коряс, конань явизе-аравтызе тензэ Азорось, ды кадык ули истямокс, кодамокс тердизе сонзэ Пазось. Тень мон кармавтан весе кемикуротненень.18Кинь Пазось тердизе керявтозь – се кадык а терявты полавтомс-кекшемс керявтоманть. Кинь Пазось тердизе апак керявто – се кадык а теи керявтовтома.19Пазонтень ялатеке: керявтозь ломанесь эли апак керявто. Сехте эрявиксэсь – те Пазонь кармавтовкстнэнь топавтомась.20Кадык эрьвась кадови се уцяскасонть, конаньсэ Пазось тердизе.21Тон урекс ульнить, зярдо тердинзеть Пазось? Кадык те тонь а талновты. Ды бути лисеват оляс, сестэ тень пек парсте нолдык тевс, лиссть.22Эдь уренть, конань Азорось тердизе, Сон олякстомтызе. Истя жо олячисэ тердезесь ней ули Христосонь урекс.23Христос рамидизь тынк покш питнеде, секскак илядо тееве ломанень урекс!24Кемиця ялгат, кинь кодамокс тердизе Пазось, кадык истямокс кадовияк Пазонть икеле.

Апак урьвакстозтнеде-венчазтнеде ды доватнеде

25Апак урьвакстозтнень-венчазтнень коряс монь арась кармавтомам Азоронть пельде. Мон ёвтаса ансяк эсь мелем кода ломань, конанень Азоронть пельде максозь чансть улемс Сонензэ кемевиксэкс.26Монь арсемга, неень стака шкатнень кисэ, конат кармасть ушодовомо, седе паро эрьвантень кадовомс истямокс, кодамокс сон ули.27Бути тон сюлмазят ни марто – сестэ иляк сезе те сюлмавксонть. Ды бути тон апак сюлма – сестэ ни иля вешне.28А бути тон урьвакстат, теньсэ пежеть а теят. Ды бути тейтереськак лиси мирденень, теньсэяк пежеть а теи. Монь мелем жо ванстомс тынк сеть стакачитнеде, конатне вастневить урьвакстозь эрямосонть.

29Кемиця ялгат! Мон кортан вана мезде: шкась кадови допрок аламо. Секс сетне, кинь улить нист, кадык седе тов эрить теке нивтеме.30Сетне, кить авардить, кадык теке а авардитькак. Сетне, конат кенярдкшныть, кадык теке а кенярдкшнытькак. Сетне, конатне рамсить, кадык эрить кода сетне, конатненень а кирдеви-максови рамазесь.31Ды сетне, конат саить лезэ те масторлангонь тевтнестэ, кадык а ваить эйзэст пильгстэ пряс. Эдь неень кондямо масторлангось курок допрок ёми.

32Монь мелем: стяко тынь аволиде тално-мелявто. Апак урьвакстозесь мелявты Азоронь тевтнеде, седе, кода савтомс Азоронтень.33Урьвакстозесь мелявты эрямо-аштема тевтнеде, седе, кода савтомс нинстэнь. Ули авейкетьксчи мирдень кедьсэнть ды тейтеренть ютксо:34аволь мирдень кедьсэсь эли тейтересь мелявты Азоронь тевтнеде, седе, кода рунгонть ды ойменть алтамс ансяк Пазонтень. А мирде экшсэсь мелявты эрямо-аштема тевтнеде, седе, кода савтомс мирденстэнь.35Весе тень мон кортан тыненк лездамга, аволь эсь мельган тынк пикссэ ускомга. Монь мелем: свал эрявлиде тынь паро койсэ ды весе эсь прянк, мезе лангскак апак вано, максовлинк Азоронтень важодемас.

36Бути цёрась лови: сон чиязь тейтерензэ коряс теи аволь истя, кода эряволь, ды бути сонзэ а саты виезэ кирдемс потмо мелень паломанзо ды сон лови: эряви тензэ урьвакстомс, сестэ кадык теи сень, мезес терди седеезэ-мелезэ. Пежеть теньсэ а ули – кадык урьвакстыть.37Мекевланк, бути сон кеместэ кирди эсь арсеманзо, киненьгак а кавтолдовтови, ды кирдевить тензэ весе потмо мелензэ, ды кеместэ седейсэнзэ сась мельс ванстомс чиязенть тейтерьксчинзэ, – сон парсте теи.38Мезе тень эйстэ лиси? Се, кие максы мирденень тейтерензэ, теи парсте, се жо, кона а максы тейтерензэ, теи седеяк парсте.

39Нись сюлмазь Койсэнть, зярс эри сонзэ мирдезэ. Бути мирдесь кулы, сестэ сон олячисэ лисемс лия мирденень, кинень мелезэ, ансяк те улезэ Азоронть мелензэ коряскак.40Нама, те авась карми улеме седе уцяскав, бути кадови ськамонзо. Те мон истя арсян, ды ялатеке кеман: монь эйсэяк ули Пазонь Оймеялт.


предыдущая глава Глава 7 следующая глава