Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 6

Христиантнэнь ютксо пелькстамотнеде

1Зярдо киньгак тынк ютксто ули пелькстамонь тевезэ кемиця ялганзо марто, кода сестэ сонензэ а визькс пшкадемс судиянень, кона а кеми Пазнэнь? Мекс сон те тевенть а максы Пазнэнь кемиця ломанень судс?2Арази тынь а содатадо: Пазонь ломантне кармить судямо весе мирэнть-масторонть? Ды бути тынь карматадо судямо мирэнть-масторонть, арази сестэ а юксневить тыненк вишкине пелькстамотне?3Арази тынь а содатадо: минь карматано судямо мик ангелтнэньгак? Арази сестэ миненек седеяк парсте а юксневить эрямо-аштема тевтне?4Ды зярдо тынк лисить пелькстамот эрямо-аштема тевтнень коряс, кода эно тынь судицякс путтадо ломанть, конатнень допрок а лови кемикурось?5Кода тенк а визькс! Арази тынк арась вейкеяк превей ломаненк, конанень юксневельть кемицятнень ютксо пелькстамотне?6А тынк ютксо жо, мекевланк, кемиця ялга тарги кемиця ялганзо судс, натой Пазнэнь акемиця судия икелев!7Ансяк уш секе, вейкенк-вейкенк марто судямось, канды тыненк покш зыян. Паряк, седе паро улевель кадовомс тыненк авидестэ покордазекс? Паряк, седе паро улевель кадовомс манязекс-салазекс?8А вана тынь тынсь, мекевланк, покордатадо ды манчетядо-салатадо. Ды кинь? Мик эсь кемиця ялганк!

9Арази тынь а содатадо: апаро ломантне а совавить Пазонть Инязорксчинтень. Илядо ильведсте эсь прянк! Сеть, кить усксевить-ускурить, эли сюконить аволь алкуксонь пазнэнь, эли кить авидечисэть мирде-ни икеле, истя жо цёра цёра марто удсицятне,10салыцятне, вардонь сельметне, симицятне, кенгелицятне-нарьгицятне, нельгицятне, а совавить Пазонть Инязорксчинтень.11Тынк ютксояк ульнесть истят! Ансяк ней тынь шлязь-нардазь, тынь алтазь Пазонтень, тынь ловозь чумовтомокс Иисус Христос Азоронть вельде ды минек Пазонть Оймеялтсо!

Рунгосонккак важодеде Пазонтень

12Тынь кортатадо: «Монень весе мереви». Нама, ансяк аволь весе моли лезэкс. «Монень весе мереви». Нама, ансяк мезеньгак азорксчи алов мон а максса прям.13Тынь истя жо кортатадо: “Ярсамопелесь пекенть туртов ды пекесь ярсамопеленть туртов”. Пазось жо ёмавтсы кода пекенть, истя ярсамопелентькак. А вана рунгось Азоронть туртов, аволь усксевемань-ускурямонь туртов, ды Азорось максы весементь рунгонть туртов.14Пазось вельмевтизе Азоронть кулозьстэ, ды Сон минеккак вельмевтьсамизь Эсь вийсэнзэ.15Нать тынь а содатадо: тынк рунгонк – Христосонь рунгонь пелькст. Арази мон сайсынь ды тейсынь Христосонь рунгонь пелькстнэнь усксевиця авань рунгонь пельксэкс? Зярдояк!16Паряк, тынь а содатадо: се, кие сюлмави усксевицянть марто, тееви сонзэ марто вейке рунгокс. Эдь Сёрмадовкссо ёвтазь: «Неть кавтотне теевить вейке рунгокс».17Се жо, кие сюлмави Азоронть марто, тееви Сонзэ марто вейке оймеялтокс.18Оргодеде усксевемадонть-ускурямодонть! Кодамо пежеть ломанесь илязо тее, те пежетесь а токши ломаненть весе рунгонзо. А усксевицясь-ускурицясь теи пежеть весе рунгонзо каршо!19Арази тынь а содатадо: тынк рунгось – Пазонь кудо, косо эри тынк эйсэ улиця Иневанькс Оймеялтось, кона максозь тенк Пазонть пельде. Ней тынь уш аволь эсенк,20эдь Пазось тынк рамидизь покш питнеде. Секскак шнадо Пазонть эсь рунгосонккак, оймесэнккак, эдь сынь – Пазонть!


предыдущая глава Глава 6 следующая глава