Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 14

Илядо чумондо кемиця ялганк

1Саинк эсь юткозонк лавшо кемема марто ломаненть ды илядо пелькста сонзэ марто арсеманзо коряс.2Эдь вейкесь кеми: вадря ярсамс эрьва мезде. А вана лиясь, кинь кемемазо лавшо, ярсы ансяк эмежде.3Се, кие ярсы эрьва мезде, кадык а безарди седе, кие ярсы ансяк эмежде. Ды се, кие ярсы ансяк эмежде, кадык а чумонды сень, кие ярсы эрьва мезде, эдь Пазось сонзэяк саизе Эстензэ.4Кият тон истямось, лиянь важонзо чумондыцясь? Сонзэ Азорозо сонсь несы: стядо се ашти эли празь. Ды сон ялатеке карми аштеме стядо, секс мекс Пазонть ули виезэ кирдемс сонзэ стядо.

5Вейкесь лови кодамо-бути чинть лиятнеде седе покшокс. Лиянтень весе читне вейкеть. Кадык эрьвась теи эсь кемеманзо-вановтонзо коряс.6Се, кие седе покшокс лови-яви кодамо-бути чи, сон тень теи Азоронть ловоманзо кисэ, ды се, кие а лови-яви истямо чи, сон тень теи истя жо Азоронть ловоманзо кисэ. Сеяк, кие ярсы эрьва мезде, ярсы Азоронть ловомга ды ёвты сюкпря Пазонтень. Кие эрьва мезде а ярсы, се а ярсы Азоронть ловомга ды истя жо ёвты сюкпря Пазонтень.7Кияк минек эйстэ а эри ансяк эсь кисэнзэ, ды истя жо эсь кисэнзэ кияк а кулы.8Бути минь эрятано, сестэ эрятано Азоронть кисэ. Бути кулотано, сестэ кулотанояк Азоронть кисэ. Лисни истя: эрятано минь эли кулозтяно, яла кадовтано Азоронть ломанекс.9Эдь Христос кулось ды одов кармась эрямо сень кисэ: улемс Азорокс кулозтнень лангсояк ды эрицятнень лангсояк.10Мекс эно тон чумондат кемиця ялгать? А мекс тон безардят ялгадот? Минь весе карматано аштеме Христосонь судонть икеле.11Эдь Пазонь Сёрмадовкссонть ёвтазь:
«Кода алкукс Мон эрян, – корты Азорось, –
истя алкукс сеяк: эрьвась пры кумажа лангс Монь икеле,
ды эрьва келесь шнасы Пазонть».
12Истя, эрьвась минек эйстэ сонсь ёвтни Пазонтень эсь тевдензэ.

Илядо совавто пежетьс кемиця ялганк

13Секскак а карматано чумондомо вейкенек-вейкенек. Мекевланк, бажадо а теемс мезеяк истямо, конась кемиця ялганть кавтолдовтсы-пупордявтсы эли совавтсы пежетьс.14Иисус Азоронть марто вейсэндямонть кувалт мон содан ды пек кеман: мезеяк арась истямо, мезесь бу сонсь улевель аванькс. Ансяк се, мезенть ломанесь лови аваньксэкс, улияк сонензэ аваньксэкс.15А бути тон ярсат истямо ярсамопельде, конадо кемиця ялгать сайсы мельсапаро, сестэ тон уш а эрят вечкеманть коряс. Эсь ярсамопельсэть иля ветя ёмамос сень, кинь кисэ кулось Христос!16Истя, илядо максо лиятненень кодамояк тувтал беряньстэ кортамс сень эйстэ, мезенть тынь ловтадо вадрякс.17Эдь Пазонь Инязорксчись – те аволь ярсамопельде ды симемапельде кевкстема. Те – Пазонь мелень топавтома, ладямо ды кеняркс, конатнень максы Иневанькс Оймеялтось.18Кие истямо ладсо важоди Христоснэнь, сон мельс тукшны Пазонтень ды ловови вадрякс ломантнень ютксояк.

19Истя, карматано бажамо эрямс весе марто ладязь ды вейкенек-вейкенек кемекстазь.20Иля калавто Пазонь тевенть ярсамопеленть кисэ. Ярсамс мереви эрьва мезде, а вана берянь се, бути тон совавтат ломаненть пежетьс эсь ярсамопельсэть.21Седе паро а ярсамс сывельде ды а симемс винадо ды мезеяк а теемс истямо, конась тонь кемиця ялганть совавты пежетьс, эли пупордявтни, эли теи лавшокс.22Ванстык тень лангс кемемат-вановтот эсь потсот, кадык сындест соды ансяк Пазось. Вай, кодамо уцяскав се ломанесь, кона а чумонды эсь прянзо сеньсэ, мезенть сонсь лови парокс!23А бути ломанесь кавтолды ярсамопелензэ коряс ды ялатеке ярсы, сестэ Пазось сонзэ чумондсы сень кисэ, мекс сон теи аволь эсь кемеманзо-вановтонзо коряс. Весемесь, мезенть ломанесь теи аволь эсь кемеманзо коряс, ули пежетекс.

Пазонтень пингеде пингень шнамо

24Шнамо Пазонтень, конань ули виезэ кемекстамс тынк кемеманть! Теде корты Кенярксов кулясь, конань мон ёвтнян. Те улияк Иисус Христос эйстэ кулясь, лиякс меремс, се салавачись, кона кекшезель ламо пингень перть ды ней уш панжозь.25Ней те салавачись панжозь пазмарицятнень Сёрмадовкстнэсэ. Сынст вельде сон яволявтозь пингеде пингень Пазонть мереманзо кувалт весе раськетненень, – ветямс сынст Азоронтень кемемас ды кунсоломас.26Улезэ Иисус Христос вельде пингеде пингень шнамо вейкине Пазонтень, кона ськамонзо превейдеяк превей! Аминь.


предыдущая глава Глава 14 следующая глава