Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 7

Тынь олякстомтозь Моисеень Койденть

1Кемиця ялгат, ней мон тыненк карман кортамо, кода сетненень, кие соды, мезе истямо Коесь. Тынь, нама, содатадо: Коесь кирди азорксчи ломаненть лангсо ансяк сонзэ эрямо шкасто.2Невтевксэкс, мирде экшсэ аванть Коесь сюлми мирденстэнь, зярс мирдесь эри. Бути мирдесь кулы, сестэ сон олякстоми Коенть эйстэ, кона сюлмиль эйсэнзэ мирдентень.3Бути нись мирдень пингестэ туи лиянень, сестэ сонзэ ловсызь ускурицякс. Бути мирдесь кулы, нись олякстоми те коенть эйстэ ды сестэ уш сонзэ а ловсызь ускурицякс, бути лиси лия мирденень.4Истя эрси тынк мартояк, кемиця ялган: Христосонь куломсто тыньгак, кода Сонзэ рунгонь пелькст, кулыде Коенть туртов. Ней кармиде улеме Лиянь, – Сень, Кона вельмевтезь кулозьстэ. Истя минь карматано лезэвстэ важодеме Пазонтень.5Зярдо минь эринек колазь обуцянок коряс, сестэ пежетев бажамотнень, конатнень кирвазтсь Коесь, ульнесь виест минек рунгонть лангсо ды минь лезэвстэ важодинек ансяк куломантень.6Ней вана минь олякстомтозь Коенть эйстэ, секс мекс минь кулынек сенень, мезесь икеле кирдсь минек эсь кедензэ ало. Ней минь важодтяно Пазонтень одкс, Оймеялтонть ветямонзо коряс, аволь кода икеле, зярдо эринек сёрмадозь Коенть коряс.

Коесь ды пежетесь

7Мезе тень эйстэ лисни? Арази сонсь Коесь пежетев? Кодаяк аволь! Ансяк Коенть вельде мон карминь содамо пежетенть эйстэ. Бути Коесь аволь ёвта: «Иля кайсе сельметь...», мон аволинь содаяк, мезе истямо сельмень кайсемась.8Пежетесь нолдызе тевс Коень те кармавтовксонть ды сонзэ вельде кирвазевтсь монь эйсэ эрьва мезе лангс сельмень кайсемат. Эдь Койтеме – пежетесь кулозь.9Ульнесь шка, зярдо мон Коенть а содылия ды ялатеке эринь. Зярдо карминь содамо Коень кармавтовкстонть, сестэ кармась эрямо пежетеськак –10ансяк монсь кулынь. Истямо ладсо кармавтовксось, кона путозель эрямонь максыцякс, кандсь монень кулома.11Пежетесь, кона те кармавтовксонть нолдызе тевс, сонзэ вельде манимим ды маштымим.12Сонсь Коесь ялатеке максозь Пазонть пельде, ды сонзэ кармавтовксоськак иневанькс, виде ды паро.

13Истя, лисни: арази те парось кандсь монень кулома? Кодаяк аволь! Тень теизе пежетесь, конась истя невтизе эсензэ алкуксонь чачонзо: сон нолдызе тевс те паронть ды кандсь монень кулома. Истя, кармавтовксонть вельде теевсь седеяк чарькодевиксэкс, кодамо тандавкс пежетесь!

Паронь ды зыянонь тюрема

14Минь содатано: Коесь оймеялтонь. А мон колазь обуця марто ломанян ды миезян пежетентень урекс.15Монень допрок а чарькодевить эсь теевть тевень: мезе мелем, сень а теян. Мекевланк, мезесь монень пек а вечкеви, сень теян.16Ды зярдо теян монь сень, мезенть теемс арась мелем, сестэ мон лован Коенть видекс-парокс.17Тень коряс лисни: те зыянонть теи эйсэнь эриця пежетесь, аволь мон.18Мон содан: парось а эри монь эйсэ, лиякс меремс, монь колазь обуцясонть. Мелем ули теемс паро, ансяк сон тень а тееви.19Мон а теян се паронть, конань ули теемс мелем. Мекевланк, теян зыян, конань теемс мелем арась.20Бути мон теян сень, мезенть теемс арась мелем, сестэ те невти: тень теи моньсэнь эриця пежетесь, аволь мон.

21Лисни, мон свал неян эсень эйсэ истямо кой: зярдо ули мелем теемс паро, монь эйстэ лисни ансяк зыян.22Монь потмо мелесь, нама, кеци Пазонь Коентень.23Ансяк эсень эйсэ мон неян лия кой, кона тюри монь превень-седеень коенть каршо. Сон саи монь полонс пежетень коенть алов, кона важоди монь рунгосонть.24Мон пайстомо ломань! Кие монь олякстомтсамам куломань кандыця те обуцядонть?!25Сюкпря Пазонтень – Сон тень теи минек Иисус Христос Азоронть вельде! Лисни истя: мон превсэнь-седейсэнь важодян Пазонь Коентень, а вана колазь обуцясон важодян пежетень коентень.


предыдущая глава Глава 7 следующая глава