Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОЛМОЦЕ СЁРМАЗО

Глава 1

1Содавикс Атя кучи шумбракстнемат тонеть, вечкевикс Гай оям. Тонь мон вечктян видечисэ.

2Вечкевикс оям! Мон ознан-арсян тонеть весемесэ вадрясто эрямо. Улезэ рунгонь шумбрачитькак, эдь тонь оймень шумбрачиденть мон содан.3Мон пек кенярдынь, зярдо сакшность кемиця ялгатне ды ёвтнесть, кода кемевиксстэ тон эрят видечисэ. Алкукскак тон эрят видечинть коряс.4Монь туртов арась седе покш кенярдома истямо кулянть коряс: монь эйкакштнэ молить видечинь кияванть.

Вейсэнь важодема ды каршо аштема

5Вечкевикс оям! Тонь кемевиксчиденть кортыть весе тевтне, конатнень тон теят кемиця ялгатнень туртов, ды натой сетнень туртовгак, конат сакшныть лия таркасто.6Сынь ёвтасть весе тесэнь кемикуронтень тонь вечкемадонть. Инеськеть, тейть паро тев ды лездак седе товгак сынст якамост туртов истя, кода туевель Пазонть мельс.7Эдь сынь тусть якамо Христосонь лементь кисэ ды мезеяк а саить акемицятнень пельде.8Секскак миненек эряви лездамс истят ломантненень ды истямо ладсо сынст марто вейсэ теевемс видечинтень важодицякс.

9Мон сёрмадынь сёрма кемикуронтень, ансяк Диотреф, кона вети эсь прянзо прок тосонь азоро, а саи мельс сень, мезде минь кортатано.10Секскак, зярдо мон сан тов, сестэ лангс ливтьсынь сеть тевтнень, конатнень сон тейни. Сон сравтни минек кувалма кежей кенгелемат, ансяк сонзэ туртов теяк аламо. Сон сонсь а васты лия таркань кемиця ялгатнень, тейни пирявкст сетнень каршо, кинь ули мелезэ вастомс сынст. Сон мик панси кемикуросто сетнень, кить вастыть лия таркань кемиця ялгатнень!

11Вечкевикс оям! Иля моле зыянов невтевкс мельга, мольть паро невтевкс мельга. Кие теи паро тевть, се ломанесь Пазонть эйстэ. Кие теи зыянов тевть, се зярдояк эзизе некшне Пазонть!12Деметрейде весе кортнить ансяк паро ёндо, кода корты сонсь видечиськак. Миньгак макстано паро вал кисэнзэ, ды тынь содатадо: минек валось алкуксонь.

Прядома валт

13Ламодо ёвтыксэлинь тонеть, ансяк арась мелем теемс тень черниласо ды толгасо.14Кеман: курок нетян тонь ды кортнетяно мартот сельмеде сельмс.15Седейоймамо теть. Весе оятне кучить теть шумбракстнемат. Тонгак ёвтак минек пельде шумбракстнемат эрьва оянть туртов. Аминь.


предыдущая глава Глава 1 следующая глава