Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ ВАСЕНЦЕ СЁРМАЗО

Глава 3

1Ванодо, кодамо ине вечкема казезь миненек Тетянть пельде: миненек максозь кандтнемс Пазонть эйкакшонь лементь, ды минь алкукскак Сонзэ эйкакшонзо! Секскак те масторлангось а содасамизь минек, эдь сон зярдояк эзизе содакшно минек Тетянтькак.2Вечкевикс ялган! Минь ней Пазонь эйкакштано, ды кодамокс ультяно икелепелев – те нейке а неяви. Ансяк содасынек сень: зярдо Христос сы, минь теевтяно Сонзэ кондямокс – секс, мекс несынек Сонзэ истямокс, кодамо Сон алкукс.3Ды эрьвась, конань ули Пазонть лангс истямо седейнежедьксэзэ, теи эсь прянзо истямо ваньксэкс, кодамо ванькс Христос.

Пазонь эйкакштнэ а совавить пежетьс

4Эрьвась, кие совси пежетьс, теи Пазонь Коень колыцянть ладсо, эдь пежетесь улияк Пазонь Коень коламо.5А вана Христос, кода тынь содатадо, сась пежетнень минек эйстэ саеме, ды Сонзэ эйсэ арась кодамояк пежеть.6Истя, эрьвась, кона эри-ашти Христос марто сюлмавозь, а совси пежетьс. Кона совси пежетьс, се эзизе некшне Сонзэ ды а содасыяк Сонзэ.7Тиринь тякинеть! Киненьгак илядо пурдаво виде кистэнть. Се, кие эри видечинь коряс, сонськак Христосонь кондямо видечисэ эриця.8Кие совси пежетьс, се Идемевсенть эйстэ, эдь Идемевсесь совась пежетьс ушодксстонть саезь. Пазонь Цёрась саськак масторлангов самай те тувталонь коряс: Идемевсенть тевензэ педе пес яжамо.9Кияк Пазонть эйстэ чачозесь пежетьс а сови, эдь сонзэ эйсэ эри-ашти Пазонь видьмесь. Сон а совави пежетьс, секс мекс сон чачозь Пазонть эйстэ.10Пазонь эйкакштнэ ды Идемевсень эйкакштнэ вана кода содавить: кие а теи видечинь коряс, се аволь Пазонть эйстэ, кода сеяк, кие а вечксы эсензэ кемиця ялганзо.

Вечкеде вейкенк-вейкенк

11Кулясь, конань тынь маринк ушодксстонть саезь, вана кодамо: миненек эряви вечкемс вейкенек-вейкенек.12Илязтано уле истямокс, кодамо Каин, Апаронть левксэсь, кона чавозь куловтызе эсензэ ялаксонзо. Мекс куловтызе? Секс, мекс Каинэнь тевтне ульнесть зыяновт, ялаксонзо тевтне – видекоень.13Секскак илядо дивсе, кемиця ялгат, мекс те масторлангось кирди кеж тынк лангс.14Минь жо ютынек куломасто эрямос. Тень минь содасынек секс, мекс минь вечксынек кемиця ялганок. Се, кона а вечки кемиця ялганзо, каднови куломанть кедь ало.15Эрьвась, конась кирди кеж кемиця ялганзо лангс – се ломанень маштниця. А ломанень маштницянть, кода тынь содатадо, арась пингеде пингень эрямозо, конась эряволь-аштевель эйсэнзэ.16Вечкеманть минь карминек содамо вана кода: Иисус максызе Эсь эрямонзо минек кисэ. Секс миненеккак эряви максомс эсь эрямонок минек кемиця ялгатнень кисэ.17Бути парсте эриця ломанесь несы эсензэ кемиця ялганзо арасьчисэ ды ялатеке пекстасы седеензэ сонзэ эйстэ, сестэ сонзэ эйсэ кодаяк а эри-ашти Пазонтень вечкемась!18Тиринь тякинеть! Миненек эряви вечкемс паро тевсэ ды видечисэ, аволь ансяк кельсэ-валсо.

Пазонь эйкакштнэ апак пеле молить Пазонтень

19Тень коряс минь содасынек: минь видечинть эйстэ. Теньсэ минь оймавтсынек седеенек Пазонть икеле20свал, зярдо минек седеесь чумонды эйсэнек. Эдь Пазось минек седейденек седе покш, ды Сон содасы весементь.21Вечкевикс ялган! Бути минек седеесь а чумонды эйсэнек, сестэ минь апак пеле мольтяно Пазонтень.22Ды сестэ, мезе а вештяно Пазонть пельде, – сень Сон макссы, эдь минь эрятано Сонзэ кармавтовкстнэнь коряс ды тейтяно сень, мезесь тукшны Сонзэ мельс.23Ды Сонзэ кармавтовксось вана кодамо: миненек эряви кемемс Иисус Христоснэнь, Сонзэ Цёрантень, ды вечкемс вейкенек-вейкенек, кода Сон кармавтсь миненек.24Эрьвась, кие топавты Пазонь кармавтовкстнэнь, эри-ашти Пазонть эйсэ, ды сонзэ эйсэ эри-ашти Пазось. Ды Сонзэ эрямодонть-аштемадонть минек эйсэ минь содатано Оймеялтонть коряс, конань Сон максызе миненек.


предыдущая глава Глава 3 следующая глава