Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ОМБОЦЕ СЁРМАЗО

Глава 3

Христос курок сы

1Вечкевикс ялган, те уш омбоце сёрма сёрмадан тенк. Мон бажинь неть ледстямотнесэ сыргозтемс тынк превс ванькс мельть-арсемат:2Кирдинк мельсэнк Пазонь кучовт пазмарицятнень икелев ёвтавт валтнэнь ды минек Азоронть ды Идицянть кармавтовксонть, кона тенк максозь тынк апостолтнэнь вельде.

3Васняяк содадо: меельце читнестэ сыть мусколиця сёвныцят-нарьгицят, конат кармить пряст ветямо эсь визьксэнь мелест коряс.4Сынь згилязь кармить кортамо: «Косо эно Христосонь самось, кона алтазель? Минек покштятне-тетятне уш кулсесть, ды ялатеке мезеяк эзь полавтово. Весе юты истя жо, кода мольсь масторлангонть теема шкастонть саезь!»5Сынь содазь стувтнить вана мезде: кезэрень пингене Пазонь валонть коряс теезельть менелесь ды масторось веденть эйстэ ды веденть вельде.6Истя жо неть вийтнесэ калавтозель кезэрень масторлангось, кона ульнесь ваявтозь чады ведьсэ.7А вана неень менелесь ды масторось ванстовить теке жо валонть коряс – толсо ёмавтоманть туртов. Те тееви судонь чистэнть, зярдо улить судязь-ёмавтозь весе, кить а кемить Пазонтень.

8Ансяк тынь, вечкевикс ялган, илинк стувтне вейкенть: Азоронть туртов вейке чись, кода тёжа иеть ды тёжа иетне, кода вейке чи.9Азорось а таргси Эсь алтамонзо топавтома шканть, кода ловить конат-конат. Мекевланк, Сон теньсэ невти миненек Эсь куватень кирдеманзо, секс мекс Сонзэ арась мелезэ ёмавтомс киньгак. Сон покш мельсэ учи-эрьви, зярдо весе велявтыть пежетнеде.

10Ансяк ялатеке Азоронть чись сы апак учо, салыця ладсо веть. Те чистэнть менелесь зэрнезь-увнозь ёми, менелень валдомтыцятнеяк псиденть солыть ды каладыть, масторлангоськак ды весемесь, мезе сонзэ лангсо, палы.11Бути те весемесь истямо ладсо калавтови, сестэ арседе, кодамокс тыненк эряви улемс. Тыненк эряви эрямс иневанькс эрямосо ды весемесэ теемс Пазонть мелензэ коряс,12зярдо пек покш мельсэ учотадо ды малавгавтадо Пазонь чинть самонзо. Те чинть кисэ палы-калады менелесь, менелень валдомтыцятнеяк солыть толонь псиденть.13А вана Пазонь алтамонзо коряс минь учотано од менель ды од мода, конатнень лангсо эри видечи.

14Секс, вечкевикс ялган, тень учозь тееде весе, мезе тынк вийсэ: стявлиде Пазонть сельмензэ икелев асатыкстэмекс-ваньксэкс, челькевтемекс, Сонзэ марто ладязекс.15Ды ловодо минек Азоронть куватень кирдеманть эсенк идемакс. Истя жо, Пазонь максовт превейчинть вельде, тыненк сёрмадсь минек вечкевикс кемиця ялгась Паволгак.16Текень эйстэ сон корты весе эсь сёрматнесэ, конатнесэ ёвтни неть тевтнеде. Неть сёрматнесэ, нама, улить истяткак таркат, конатнень стака чарькодемс ды конатнень чоподасотне ды аволь кеме ойметне колыть-тапить. Истямо ладсо сынь колсить лия Сёрмадовкстнэньгак, ды теньсэ таргить эсест лангс кулома-ёмамо.

17А вана тынь, вечкевикс ялгат, тень эйстэ содатадо уш икелев. Секскак ванстодо прянк: аволидизь пурдавто тынк ки лангсто койтеметнень ильведевксэст, ды аволиде пра эсь кеме юронк лангсто.18Касодо-кемекстадо минек Иисус Христос Азоронть ды Идицянть чанстензэ ды содамонзо-чарькодеманзо эйсэ. Сонензэ улезэ инексчи ней ды пингеде пингес! Аминь.


предыдущая глава Глава 3 следующая глава