Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ВАСЕНЦЕ СЁРМАЗО

Глава 3

Превспутомат мирдетненень-нитненень

1Истя жо тыньгак, нить, максынк прянк эсенк мирденк кедь алов. Ды сестэ сеть мирдетнеяк, конат, паряк, а кунсолыть Пазонь валонть, теевельть кемицякс прянь ветямонк кувалт. Валт уш тесэ а эрявить,2зярдо сынь кармить нееме тынк ванькс эрямонк ды Пазонь мельде пелеманк.3Тынк мазылгавтыцякс илязо уле ушо ёндо неявиксэсь: аволь прянь питней черькодавкстнэ, аволь сырнень понгавтнемкатне, аволь сельмс каятыця оршамотне.4Тынк мазычись улезэ ануваргадыцякс-аёмицякс: те – алкуксонь седейёжонь ломанесь, чевте ды сэтьме обуцянзо марто. Истямо мазычись пек питней Пазонть сельме икеле.5Истямо ладсо мазылгавтнесть-наряжасть эсь пряст кезэрень шкане Пазонтень озныця нитнеяк, конат нежедсть Сонзэ лангс. Неть аватне ульнесть мирдест кунсолыцят.6Истя тейнесь Сарраяк: сон ульнесь Авраамонь кунсолыця ды мериль тензэ “монь азором”. Бути тыньгак тейнетядо паро ды мездеяк а пельтядо ды а тандалетядо, – тыньгак карматадо улеме Саррань кондямокс.

7Истя жо тыньгак, мирдеть, ветядо эсь прянк нинк марто, кода эсенк коряс седе лавшо марто. Невтеде тензэ вечкема-ловома, эдь сонензэяк, кода тыненк, максови казнекс Пазонть пельде пингеде пингень эрямо. Сестэ а ули кодамояк пирявкс тынк озноманк туртов.

Паро тевень кисэ пиштемадо-майсемадо

8Меельце пелев, уледе весе ве мельсэ, лиянь домкасто чарькодицят, вейкенк-вейкенк вечкицят, седеймарицят, ялгаксчинь ванстыцят, сэтьметь.9Илядо пандо кежсэ кеж эли покордамосо – покордамо. Мекевланк, чанстядо-баславадо, содазь: Пазось тердидизьгак тынк истя тееме. Сестэ Сон тынккак чанстятадызь-баславатадызь.10Сёрмадовкссояк ёвтазь:
«Кинь мелезэ вечкемс эрямонть ды неемс мельспаронь чить,
се кирдезэ эсь келензэ апаро валдо
ды кургонзо кенгелемадо.
11Сон туезэ ве ёнов зыяндо ды теезэ паро,
вешнезэ ладямо-оймамо ды бажазо тенень.
12Эдь Азоронь сельметне неить видечисэтнень
ды пилензэ марить сынст озномаст.
А вана зыянонь теицятнень эйстэ
Азорось велявты Эсь чачонзо-чаманзо
[– нардамс сынст моданть лангсто]».
13Бути тынь покш мельсэ тейтядо паро, сестэ киньгак а саты виезэ теемс тыненк зыян.14Куш, паряк, савияк пиштемс тенк видечинть кисэ – ялатеке тынь уцяскавтадо. «Илядо пеле седе, мезде сынь пелить, ды мезеяк тынк илязо тандавтне».15Седейсэнк свал Пазонть ловодо Азорокс, ды уледе свал анокт максомс каршо вал сенень, кие веши пельденк панжомс тынк кемеманть ды седейнежедьксэнть смустензэ. Ансяк тень тееде чевтестэ-сэтьместэ ды лиянть мелензэ ванозь.16Кирдеде ваньксэкс эсь оймеёжонк. Кадык совить визьксчамас эсь кенгелемаст кисэ тынк покордыцятне. Сынь стяко чумондыть эйсэнк, куш тынь, кода Христос мельга молицят, прянк ветятадо парсте.17Седе паро пиштемс-майсемс, бути тенень ули Пазонть мелезэ, паро тевень кисэ, аволь беряненть кисэ.

18Эдь Христос Сонськак – весть ды весе шкатнень кисэ – пиштсь минек пежетенек кисэ: Видечисэсь – авидечисэтнень кисэ, минек Пазонтень ветямга. Ульнесь куловтозь Сонзэ рунгозо ды вельмевтезь эрямос оймеялтозо,19конань вельде Христос тусь ды пачтясь куля оймеялтнэнень, конат пекстазельть чоподас.20Сынь кезэрень пингене эзизь кунсолокшно Пазонть, куш Сон цидярдозь учось Эстензэ велявтомаст весе се шканть перть, зярс Ной тейсь иневенченть. Ансяк аламотне, весемезэ кавксо ломанть, идевсть иневенчсэнть веденть вельде.21Те ведесь невти лемдеманть-нававтоманть, конась ней иди тынккак. Нававтомась – Пазонть кедьстэ ванькс оймеёжонь вешема, аволь рунгонь карготьксчинь шлямо. Нававтомась идетядызь тынк Иисус Христосонь кулозьстэ вельмеманть вельде.22Христос ней кепететсь менельс ды ашти Пазонть вить кедензэ ёно. Ды Сонзэ икеле сюконить ангелтнэ, азорксчитне ды вийтне.


предыдущая глава Глава 3 следующая глава