Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ВАСЕНЦЕ СЁРМАЗО

Глава 2

Христос – кемикуронть юр кевезэ

1Секскак кадынк ве ёнов эрьва кодамо зыянонть ды эрьва кодамо кенгелеманть-манчеманть, кавто чачосо улеманть, сельмень сявадоманть ды эрьва кодамо беряньстэ кортавтоманть.2Пиже эйкакш ладсо бажадо ярсамс Пазонь валонь ванькс ловсодонть, конань вийсэ тынь кастадо ды пачкодтядо идемас.3Сёрмадовкссо ёвтазь: «Тынь Азоронть паронзо уш неинк-варчинк».

4Садоя Сонензэ, эриця Кевентень, конань ёртызь ломантне, а вана Пазось кочкизе ды ловизе питнейкс.5Тынськак, кода эриця кевть, тееведе оймеялтонь кудокс. Сестэ тынь ультядо Пазонтень важодиця попокс ды карматадо кандтнеме Тензэ оймеялтонь казнеть-анокст, конат тукшныть Сонзэ мельс Иисус Христосонь кисэ.6Пазонь пельде Сёрмадовкссонть кортави:
«Вант, Мон путса Сионс кочказь питней кевенть,
ужонь-уголонь кирдиця юр кевенть.
Ды Сонензэ кемицясь зярдояк а ули совавтозь визьксчамас».
7Питней Сон тыненк, кемицятненень, а вана сетненень, конат а кемить,
«кевесь, конань ёртызь кудонь теицятне,
теевсь ужонь-уголонь кирдиця юр кевекс»
ды «пупордямо кевекс,
кевпандокс, конань эйс сынь эшкевить».
8Сынь а кунсолыть Пазонь валонть, ды секскак пупордькшнить сонзэ эйс. Истямо уцяска Сон сыненст аравтськак.

9А вана тынь – Пазонь кочкавт буе, Инязоронтень важодиця попт, Пазонтень алтазь раське, ансяк Сонензэ явозь ломанть. Тынь аравтозтядо яволявтомс Сонзэ пародояк паро ине тевтнеде. Сон тынк тердидизь-ливтидизь чоподачистэ Эсензэ дивань-тамашань валдочинтень.10Икеле тынь ульниде аволь Сонзэ ломанть, – ней жо Пазонь ломантядо. Икеле Сон тыненк эзь путне седеймарямо, – ней жо Сон тыненк максызе Эсь седеймарямонзо.

Уледе Пазонь важокс

11Вечкевикс ялгат, энялдан тенк, кода масторланга якицятненень-пакицятненень ды лия ёнксонь ломантненень: илинк максо прянк пежетев обуцянк мельтнень алов, конат тюрить тынк ойметнень каршо.12Ветядо прянк пародояк парсте виде Пазонь асодыцятнень ютксо, куш сынь чумондыть эйсэнк кода зыянонь тейницянь. Сестэ сынь, тынк паро тевенк лангс ванозь, кармить шнамо Пазонть се чистэнть, зярдо Сон сынст содавтсынзе.

13Истя, Азоронть кисэ максынк прянк масторлангонь весе прявтнэнь кедь алов: инязоронтень, весемеде покш прявтонтень,14ды истя жо ветицятнененьгак, конатнень Сон кучинзе чумонь пандомо зыянонь теицятненень ды шнамо паронь теицятнень.15Пазонть мелезэ: паронь теезь тынь лоткавтсынк ачарькодиця ломантнень превтеме лабордомаст-лавгамост.16Эрядо олячисэ, ансяк илязо уле те олячись берянь тевень кекшемакс, мекевланк, эрядо Пазонь важо ладсо.17Весень ловодо, эсенк кемиця ялганк вечкеде, Пазонть мельдензэ пеледе, инязоронть-кесаренть ловодо.

Тееде Христос ладсо

18Важот, максынк прянк эсь азоронк кедь алов, весемесэ ванодо мелест, аволь ансяк партнэнь ды чевте седейтнень, истя жо казямотненьгак.19Се тукшны мельс Пазонтень, зярдо кияк чумовтомо пиштезь кирди ризкст-мелявкст Пазонть мелензэ кунсоломанть кисэ.20Зярдо тынь кирдтядо чавома берянь тевень кисэ, сестэ мекс тынк шнамс? А вана бути тынь карматадо кирдеме майсемат паро тевенк кисэ, те тукшны мельс Пазонтень.21Тенень тынь тердезьгак. Сонсь Христоскак пиштсь минек кисэ, ды теньсэ макссь тенек невтевкс: миньгак молевлинек Сонзэ мельга.22
«Сон кодамояк пежеть эзь тее,
ды Сонзэ кургсто кияк кенгелема вал эзь марсе».
23Зярдо Сонзэ покордасть, Сон покордамо вал каршост эзь ёвта; зярдо пиштсь-майсесь, Сон сынст эзь тандавтне, а вана кемезь максызе прянзо Пазонтень, виде Судицянтень.24Сон Сонсь кандынзе-кепединзе минек пежетенек Эсь рунгосонзо крёст лангс вана мекс: куловлинек минь пежетенть туртов ды эрявлинек видечинть туртов. Сонзэ рантнень-аржотнень вельде тынь шумбралгадовлиде.25Зярдо-бути тынь ульниде теке кадовозь реветь, а вана ней велявтыде мекев эсенк Ваныцянтень, ойменк Ванстыцянтень.


предыдущая глава Глава 2 следующая глава