Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ВАСЕНЦЕ СЁРМАЗО

Глава 1

1Петра, Иисус Христосонь апостолось, кучи шумбракстнемат Пазонь кочкавтнэнень, конат те мирэнть-масторонть лангсо теке ве ёндонь ломанть ды сравтнезь эрить Понтонь, Галатиянь, Каппадокиянь, Асиянь ды Битиниянь ёнкстнэва.2Тынк уш икелевгак Тетя Пазось Эсь арсеманзо-мелензэ коряс кочкидизь ды теидизь Оймеялтонть вельде Эсензэ иневанькс ломанекс. Истя тынь ней теевтядо Иисус Христосонь кунсолыцякс ды ванськавтозекс Сонзэ верьсэнть. Кадык яла седе ламолгадыть тынк туртов Пазонь чанстесь ды седейоймамось!

Эриця седейнежедькс

3Улезэ шназь-чанстязь Пазось, минек Иисус Христос Азоронть Тетязо! Сон вельмевтизе кулозьстэ Иисус Христосонь ды теньсэ, Эсь ине седеймарямонзо коряс, чачтымизь од эрямос ды макссь миненек свал эриця седейнежедькс.4Секс минь учотано Пазонть пельде аёмиця, аколавиця, апужиця парочи. Те парочись кирдеви-ванстови менель лангсо тынк туртов.5Тынк жо, кемеманк кисэ, вансттадызь Пазонь виесь ды пачтятадызь идемас, кона анокстазь ды панжови шканть прядовома пестэ.

6Весе тенень тынь кенярдодо, куш ней тыненк акувать, паряк, сави кирдемс эрьва кодат ризксэнь кандыця стакачить.7Мик сырнеськак снартневи-варчавтневи толсо. Истя жо неть стакачитне снартнить-варчавтнить тынк кемеманть алкуксчинзэ. Иисус Христосонь самсто тынк кемемась, кона ёмиця сырнеде питней, карми улеме тыненк шнамокс, инексчикс ды ловомакс.8Кадык тынь Сонзэ эзинк неекшнеяк, ялатеке Сонзэ вечксынк. Нейгак Сон тыненк а неяви, ды ялатеке кемтядо Тензэ ды кенярдкшнотадо аёвтавомашка кецнемасо:9тынь пачкодтядо кемеманк топавтомантень, ойменк идемантень.

10Те идеманть пек вешнесть ды домкасто тонавтнесть пазмарицятне, конат икелев ёвтакшность тыненк максовиця чанстенть эйстэ.11Сынь бажасть чарькодемс, кодамо шкадо ды тевде-тувталдо кортась Христосонь Оймеялтось сынст вельде, зярдо икелев яволявтнесь Христосонь пиштематнеде-майсематнеде ды сынст мельга молиця Сонзэ инексчиденть.12Ды сыненст ульнесь панжозь: сынь важодсть тынк лангс, аволь эстест, зярдо кортасть неть тевтнеде. Текень жо ней тыненк ёвтнить сетне, кить пачтизь тенк Кенярксов кулянть менельстэ кучозь Иневанькс Оймеялтонть вийсэ. Неть тевтнень лангс ангелтнэяк паро мельсэ бажить ваномс.

Пазонтень алтазь эрямо

13Секскак, аравтынк-сыргозтинк меленк важодемас ды свал уледе валдо превсэ. Нежедеде ансяк Пазонь се парочинть лангс, конась максови тенк Иисус Христосонь самсто.14Уледе Пазонь кунсолыця эйкакшокс, илинк максо прянк визькс мелень вешематненень, конатнень ало эриде-аштиде икеле асодамочинк кувалт.15Мекевланк, кодамо иневанькс тынк Тердицясь, тыньгак уледе истямо иневаньксэкс эсенк прянь ветямосо.16Пазонь пельде Сёрмадовкссонть ёвтазь: «Мон иневаньксан, секс тыньгак иневанькст уледе».17Ды бути тынь эсь озномасонк мертядо “Тетяй” Пазонтень, кона, киньгак лангс апак вано, суди эрьванть сонзэ тевензэ коряс, сестэ тесэ, масторланга якамстонк-пакамстонк, свал эрядо Сонзэ ловозь ды мельдензэ пелезь.18Тынь содатадо: стяконь чаво эрямостонть, конань кадызь тенк покштянк-тетянк, тынь идезь-рамазь олячис аволь питнень ёмавтыця сиядо эли сырнеде.19Тынь идезь-рамазь Христосонь, асатыкстэме ды ванькс Вирезэнть, питнейдеяк питней верьсэнть.20Сон кочказель мирэнть-масторонть теемадо икеле, ды ансяк ней, меельце шкастонть, тынк кисэ яволявтозель.21Христос вельде тынь кемезевиде Пазонтень, кона Сонзэ вельмевтизе кулозьстэ ды макссь Тензэ инексчи. Секскак тынь ней кемтядо ды седейсэнк нежетядо Пазонть лангс.

22Ней тынь кунсолыцят Пазонь видечинтень ды теньсэ ванськавтынк ойменк Оймеялтонть вельде ды кармиде кемиця ялганк седейшкава вечкеме. Истя тейнеде седе товгак: свал вечкеде вейкенк-вейкенк ванькс седейсэ.23Тынь жо чачиде одс аволь ёмиця видьместэ, а вана Пазонь аёмиця валстонть, кона эри ды карми эрямо-аштеме пингеде пингес.24Сёрмадовкссо ёвтазь:
«Весе ломантне тикшень кондят,
ды сынст ине мазычист паксясо цецянь кондямо.
Тикшесь коськи ды цецяськак пужи.
25Ансяк Азоронть валось эри-ашти пингеде пингес».
Те валось – Кенярксов кулясь, кона тыненк пачтязь.


предыдущая глава Глава 1 следующая глава