Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЯКОВОНЬ СЁРМАЗО

Глава 4

Максынк прянк Пазонть кедь алов

1Косто саевить тынк ютксо эртневематне ды сёвноматне? Арази аволь тынк визькс мелень вешематнестэ, конат азаргалезь лакить рунгосонк?2Тынь покш мельсэ мезе-бути мельга правтадо, ансяк тынк те арась. Тынь маштнетядо ды, сельменк сявадстозь, мезес-бути пек бажатадо, ялатеке тыненк те а саеви. Тынь сёвнотадояк, тюртядояк, ансяк тынк ялатеке мезенккак арась, секс мекс тынь а вештядо.3Бути мик вештядояк, сестэяк тенк мезеяк а максови. Эдь тынь вештядо аволь паронь теемань кисэ, мекевланк, эсенк визьксэнь меленк витемань-петемань кисэ.4Авидечисэ ломанть! Арази тынь а содатадо: бути тынь ялгат те масторлангонть марто, сестэ тынь мольтядо Пазонть каршо! Истямо ладсо: кинь мелезэ улемс ялгакс те масторлангонтень, се тееви ятокс Пазонтень.5Эли тынь, паряк, арсетядо, Пазонть пельде Сёрмадовксось стяко корты: «Сон седеень покш паломасо вечки-вешни ойменть, конань совавтызе эйзэнек».6А вана чанстесь, конань Сон максы миненек, седеяк покш. Секскак Сёрмадовкссо кортави:
«Пазось моли прянь верьга кандыцятнень каршо,
сэтьметненень жо Сон максы чансть».
7Истя, максынк прянк Пазонть кедь алов! Стядо Сатананть каршо, ды сестэ сон оргоди тынк эйстэ.8Малавгадодо Пазонтень, ды Сонгак малавгады тыненк! Шлинк кеденк, пежетень тейницят, ванськавтынк седеенк, кавтов явозь ойметь!9Чаводо прянк, рангодо ды авардеде! Тынк пейдеманк теевезэ рангомакс ды кенярксонккак – ризксэкс.10Вишкиньгавтынк-сэтьмелгавтынк прянк Азоронть икеле, ды Сон тынк кепедтядызь.

Илядо судя лиянь

11Кемиця ялгат, илядо беряньстэ кортавто вейкенк-вейкенк. Кие кортавты малавиксэнзэ эли суди сонзэ, се кортавты Коенть ды суди Коенть. А бути тон судят Коенть, сестэ тон уш Коень судиця, аволь сонзэ топавтыця.12Ули ансяк Коень вейкине максыця ды вейкине Судия, конань ули виезэ идемскак ды ёмавтомскак. Тон эно кият истямось, лиянь судицясь?

Илядо шна прянк

13Ней кунсолодо тынь, конат кортыть: «Течи эли ванды сыргатано истямо-истямо ошов, ды эрятано тосо вейке ие, ды карматано микшнеме-рамсеме, ды покшолгавтомо-ламолгавтомо уличинек».14Ансяк тынь тунь а содатадо, мезе карми улеме ванды! Мезе истямо тынк эрямось? Тынь теке шожда качамне, конась сась вейке липкес ды сеске жо ёмась.15Тень таркас тыненк эряволь кортамс: «Бути карми улеме Азоронть мелезэ ды ультяно эрицят, сестэ минь тейсынек тень ды тонань».16Ней жо тынь шнатадо ды верьга кандтадо прянк. Эрьва кодамо истямо прянь шнамось ули зыянокс.17Лисни, кие соды, мезе истямо паронь теемась, ансяк тень а теи, се сови пежетьс.


предыдущая глава Глава 4 следующая глава