Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЯКОВОНЬ СЁРМАЗО

Глава 2

Ванодо ломантнень лангс вейкетьстэ

1Кемиця ялган, тынь, кие кеми Иисус Христоснэнь, инексчинь минек Азоронтень, ванодо весе ломантнень лангс вейкетьстэ, киньгак башка апак яво.2Невтевксэкс: тынк промксос сови ломань цивтёрдыця оршамосо, сурсонзо сырнень суркс, истя жо сы кажов ломань, таштомозь оршамосо.3Тынь, нама, сеске несынк сень, кие цивтёрдыця оршамосо, ды мертядо: «Озак тезэнь, тесэ паро таркась», мекевланк, кажовонтень, мертядо: «Тон жо арак тозонь» эли «Озак масторов, монь пильгень ваксс».4Арази теньсэ тынь уш эзиде тее авейкетьксчи эсенк ютксо? Арази эзиде карма улеме судиякс, конат судить аволь видестэ?

5Кунсолодоя, вечкевикс кемиця ялган! Арази Пазось эзинзе кочка масторлангонь кажовтнень? Сон сынст тейсынзе кемемасо сюпавокс ды совавтсынзе Эсь Инязорксчизэнзэ, конань Сон алтызе вечкицянзо туртов.6Ансяк тынь кажовонть покордынк. Арази аволь сюпавтне лепштить тынк эйсэ? Арази аволь сынь усксить-таргсить эйсэнк судга?7Арази аволь сынь покордыть-чалгсить се ине лементь, кона ёвтазель тынк велькссэ.

8Бути тынь топавттадо Пазонь Инязорксчинь коенть, кона кирдеви Пазонь пельде Сёрмадовкссонть: «Вечкть малавиксэть кода эсь прят», – сестэ тынь тейтядо парсте.9А бути тынь вантадо ломань лангс авейкетьстэ, сестэ тынь тейтядо пежеть ды Коесь невттядызь тынк сонзэ колсицякс.10Эдь се, кие топавты весе Коенть, ды ансяк мейсэ-бути вейкесэ теи пежеть, сон чумо весе Коенть коламосо.11Пазось, кие мерсь: «Иля ускуря», истя жо мерськак: «Иля маштне». Лисни истя: бути тон а ускурят, тонсь жо маштнят, сестэ ялатеке тон колсят Коенть.12Кортадо ды тееде истят ломантнень ладсо, конатнень кармить судямо олячинь максыця коенть коряс.13Эдь судось аволь седеймариця сетненень, кить а путыть лиянень седеймарямо, а вана седеймарямось изни судонть лангсо!

Кемемась ды тевтне

14Кемиця ялган, кодамо лезэ тень эйстэ, бути ломанесь корты: сонзэ ули кемемазо, ансяк арасть тевензэ? Идеви а идеви сон те кемемантень?15Бути кемиця братонтень эли сазоронтень а мейсэ оршамс ды а мезде ярсамс,16кияк жо тынк эйстэ мери тенст: «Азёдо седейоймамо марто, эжнеде ды ярсадо!» – ансяк тынсь мезеяк а макстадо сынст рунгост туртов, сестэ кодамо лезэ ули тень эйстэ?17Истя кемемаськак, бути сон ськамонзо, тевтеме, сестэ сон кулозь.

18Мекевланк, невтевксэкс, кияк мери: «Тонь ули кемемат, а вана монь тевень». Невтик монень тон эсь кемемат тевтеме, ды монгак тонеть невтьса кемемам эсь тевсэнь!19Тон кемат: Пазось – вейкине. Видестэ теят! Идемевстнеяк истя жо кемить ды сорныть-талныть.20Истя содат а содат, тон, чавола ломань: тевтеме кемемась – кулозь.21Арази минек ине покштянок Авраам ловозель чумовтомокс Пазонть икеле аволь тевензэ кисэ, зярдо путызе Исаконь, эсь цёранзо, аноксонь максома алтаренть лангс?22Тон неят: кемемась важодсь вейсэ тевензэ марто ды тевтнень вельде кемемась теевсь алкуксокс.23Истямо ладсо топавтовсть Пазонть пельде Сёрмадовксонь валтнэ: «Авраам кемезевсь Пазонтень, ды тень кисэ Пазось ловизе сонзэ чумовтомокс», ды сонензэ кармасть мереме “Пазонь ялга”.24Нетядо, Пазось лови ломаненть чумовтомокс тевензэ кисэ, аволь ансяк кемеманзо кисэ.25Истя ульнесь Рахав усксевиця аванть мартояк. Сон ульнесь ловозь чумовтомокс тевензэ кисэ, зярдо сон нолдынзе эсензэ кудос салава кевкстницятнень-киведицятнень ды мейле сынст ливтинзе лия киява.26Эдь кода рунгось оймевтеме кулозь, истя кемемаськак тевтеме кулозь.


предыдущая глава Глава 2 следующая глава