Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЯКОВОНЬ СЁРМАЗО

Глава 1

1Яков, Пазонть ды Иисус Христос Азоронть важозо, кучи шумбракстнемат срадозь эриця кемгавтово буетненень.

Снартнемат-варчавтнемат ды кемема

2Кемиця ялган, ловодо ине кенярксокс эрьва кодамо снартнематнень-варчавтнематнень, конатнес тынь понгонетядо.3Эдь тынь содатадо, зярдо тынк кемемась юты варчавтнематнень пачк, те чачты-касты эйсэнк цидярдома.4Ды те цидярдомась кадык прядсы эсь тевензэ: сестэ тынь карматадо улеме весеме ёндо вийс совазекс, апак кола ды кодамояк асатыкстэмекс.

5А бути киньгак тынк эйстэ а сатны превейчизэ, кадык веши сонзэ Пазонть пельде. Ды максозь ули тензэ, эдь Пазось весенень максы паро мельсэ, апак коря.6Ансяк кадык веши кемезь ды допрок апак кавтолдо. Се, кие кавтолды, моли иневедень ведьвелявкс ёнов, конань вармась панси ды вырновтни эрьва ёнга.7Истямо ломанесь кадык а арсияк мезеяк саемс Азоронть пельде,8секс мекс сон кавтов явозь ойме ды аволь кеме весе эсь тевсэнзэ-валсонзо.

Сюпавт ды кажовт

9Кадык кажов кемиця ялгась шны прянзо, секс мекс Пазось сонзэ кепеди-касты.10А вана сюпавось кадык шны прянзо сестэ, зярдо Пазось сонзэ алкиньгавты, секс мекс сон юты-ёми паксянь цеця ладсо.11Лиси чизэ, пултасы псисэнть – ды пужи тикше недьксэсь, певерить сонзэ цецятне, ды кулы-ёми цецянть мазычизэ. Истя жо пужи-ёми сюпавоськак эсь эрямонь тевензэ лакамо шкастонть.

Снартнематне-варчавтнематне ды сынст кирдемаст

12Кодамо уцяскав ломанесь, кона цидярдозь канды снартнематнень-варчавтнематнень. Сенень, конанень сынь кирдевить, максови изницянь каштазокс эрямо, конань Пазось алтызе Сонзэ вечкицятненень.13Кадык кияк сетнеде, кинь лангс прасть варчавтнематне, а корты: «Пазось монь снартни-варчавтни». Эдь зыянонть арась виезэ варчавтнемс Пазонть ды Пазось Сонськак киньгак а снартни-варчавтни.14Эрьванть снартни-варчавтни эсензэ зыянов мелень бажамось, кона уски-тарги ды мани сонзэ эсь мельганзо.15Зярдо зыянов мелень бажамось пекии, сестэ сон чачты пежеть, а зярдо пежетесь касы-кемексты, сон канды кулома.

16Илядо ильведе-манчеве, монь вечкевикс кемиця ялгат.17Эрьва кодамо паро максовксось ды эрьва кодамо асатыкстэме казнесь максовить верде, весе валдо тевень Тетянть пельде, кона зярдояк а полавтневи, ды Сонзэ валдось зярдояк а тееви чоподакс.18Те Сон Эсь олянзо коряс чачтымизь минек видечинь валсонзо: улевлинек минь васенце таркасо Сонзэ теевкстнэнь ютксо.

Уледе Пазонь валонь марицят ды топавтыцят

19Истя, вечкевикс кемиця ялган: кадык эрьва ломанесь капши кунсоломо, ансяк кадык а капши кортамо ды а капши кежиявтнеме.20Эдь кежень пачк ломанентень а тееви видестэ, Пазонть мелензэ коряс.21Секскак, кадынк ве ёнов эрьва кодамо аваньксэнть ды весе зыянонть. Сэтьместэ саинк валонть, кона путозь-видезь седеезэнк ды конань ули виезэ идемс тынк ойменк.

22Уледе валонь топавтыцякс, аволь ансяк кунсолыцякс – истят ломантне манчить эсь пряст.23Эдь кие кунсолы валонть ды а топавты сонзэ, се моли истямо ломань ёнов, кона ванкшны эсь чаманзо зеркалань пачк.24Сон варшты эсь лангозонзо, туи ве ёнов ды сеске стувтсы, кодамо сон.25Ансяк се, кие пштистэ ваны асатыкстэме коенть лангс, кона олякстомты ломаненть, ды седе товгак карми истя ваномо, ды кие аволь стувтыця кунсолыця, мекевланк, коенть коряс теиця, сон карми улеме уцяскавкс эсь тевензэ теемасо.

26Бути кияк эйстэнк арси: сон видестэ важоди Пазонтень, ансяк а машты кирдеме эсь келензэ, сестэ сон манчи эсь прянзо ды Пазонтень сонзэ важодемазо чаво чалгамонь кондямо.27Вана кодамо Пазонть, Тетянть, сельме икеле ванькс ды асатыкстэме Тензэ важодемась: бути лездат урозтнэнень ды доватненень сынст стакачисэнть ды бути ванстат эсь прят те масторлангонть аваньксчинзэ эйстэ.


предыдущая глава Глава 1 следующая глава