Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 28

Павол Мальта усиясо

1Идезтне, конат ульнесть Павол марто, кармасть содамо: усиянть, конань лангс минь шумбрасто-парсте лисевинек, лемезэль Мальта.2Усиянь эрицятне минек вастымизь пек седейшкава. Сынь кирвазтсть толбандя ды весень минек тердимизь эжнеме, эдь ушосонть якшамоль ды мольсь пиземе.3Павол пурнась ве берема тарадт, кармась путнеме эйсэст толбандянтень. Тарадтнэнь ютксто псиденть лиссь гуй, кона пезназь пезнась Паволонь кедьс.4Зярдо усиянь эрицятне неизь гуенть, кона поводевсь Паволонь кедьс, сынь кармасть кортамо эсь ютковаст: «Те ломанесь, улема, ломанень маштниця. Сон идевсь иневедьсэ, ялатеке видечинь авапазось а мери тензэ кадовомс эрямо».5Павол жо сорновтызе гуенть толс, ды сонзэ эйстэ Паволнэнь эзь ульне кодамояк зыян.6Ломантне учость: Павол курок карми таргоземе эли сеске пры кулозь. Сынь кувать учость ды мейле, зярдо неизь, мезеяк берянь сонзэ марто эзь тееве, полавтызь арсемаст ды кармасть кортамо: келя, сон – паз.

7А васоло ульнесть Публиень, усиянь прявтонть, кудонзо-чинзэ. Сон минек саимизь эсь кудозонзо, ды колмо чить минь эринек инжекс сонзэ кедьсэ.8Те шкастонть сонзэ тетязо стакасто сэредсь, эзь стякшново, чавсь эйсэнзэ пси ды пеке орма. Павол совась нупалезэнзэ, ознось, путынзе лангозонзо кедензэ ды шумбралгавтызе сонзэ.9Теде мейле весе лия сэредицятнеяк, конат ульнесть те усиянть лангсо, сакшныльть Паволнэнь ды пичкильть.10Сынь эрьва кода невтсть миненек эсь паро мелест ды вечкемаст. Зярдо карминек туеме кедьстэст, сынь макссть мартонок весе, мезе ансяк тенек эрявсь.

Павол пачкоди Римев

11Колмо ковонь ютазь минь лисинек иневедьс Александриянь покш венчсэнть, конань лемезэль “Кавтаськеть”. Сон теленть ютавтызе те усиянть лангсо.12Минь пачкодинек Сиракуза ошов ды ульнинек тосо колмо чить.13Тосто уинек Регияв. Чинь ютазь, пувазевсь лембе ёнксонь варма, ды омбоце чистэнть минь пачкодинек Путеол ошс.14Тосто муинек кемицятнень ды, сынст энялдомаст коряс, эринек кедьсэст сисем чить. Мейле, окойники, минь сыргинек Римев.15Римсэ кемицятне марясть эйстэнек ды лиссть минек вастомо. Веенст вастымизь Аппиень Ошкужосонть, омбонст – Колмо Инжекудонь ошсонть. Кемицятнень неезь, Павол ёвтась сюкпря Пазонтень, ды сонзэ оймезэ кемекставсь.

16Зярдо минь сынек Римев, сядонь прявтось максынзе пекстазтнень римень ушмонь прявтонть кедьс, Паволнэнь мерсть эрямс башка кудосо ды путсть тензэ ванстыця.

Павол Римсэ

17Колмо чинь ютазь, Павол тердинзе эстензэ евреень куронь прявтнэнь. Зярдо сынь промсть, сон мерсь тенст: «Ялгат-оят, Ерусалимсэ монь кундымизь ды максымизь римень ломантненень. Ансяк мон мезеяк эзинь тейне раськенек каршо ды покштянок койтнень-кирдатнень каршояк.18Тонат, монь кевкстнемадон мейле, нолдыксэлимизь, секс мекс эзть муе монь эйстэ кодамояк чумо, конань кисэ монь эряволь маштомс.19Ялатеке еврейтне ульнесть олякстомтоман каршо. Секскак монень савсь вешемс кесарень суд, ансяк монь раськем аволь мейсэяк чумондоманзо кисэ.20Тень кувалма мон тынк тердидизьгак: вастовомс ды весемеде теде кортнемс мартонк. Эдь се седейнежедьксэнть кисэ, конань топавтоманзо Израилень раськесь умок учи, мон течи кандтнян неть тертнень».21Паволонь кунсолыця еврейтне мерсть: «Миненек Иудеясто эзть пачколе тондеть кодаткак сёрмат, ды сеть ялгатне-оятнеяк, конат тей сакшность, тондеть мезеяк берянь эзть ёвтне.22Ялатеке минек меленек кунсоломс тонь, кода тон арсят тень эйстэ. Минь те од тонавтомадонть содатано ансяк сень: сонзэ кувалт эрьва косо молить пелькстамот-спорямот».

23Паволонь марто сынь аравтызь вастовома чинть. Се чистэнть Паволнэнь кудов сакшность седеяк ламо еврейть. Валскестэ чопода чокшнес Павол кортась мартост ды панжсь тенст Пазонь Инязорксчинть смустензэ. Моисеень Коенть ды пазмарицятнень сёрмадовксост лангс нежедезь, сон терявтнесь кемевтемс сынст Иисуснэнь.24Веенстнэ кемсть сонзэ валтнэнень, лиятне эзть кеме.25Мельтне явовсть, ды сынь кармасть тукшномо. Сестэ Павол ёвтынзе меельце валонзо: «Пек парсте Иневанькс Оймеялтось ёвтась минек покштятненень-тетятненень Исайя пазмарицянть вельде:26
“Азё те раськентень ды мерть:
Карматадо пилесэнк кунсоломо, ды а чарькодьсынк,
сельмесэнк ваномо, ды а несынк.
27Неть ломантне калгодкстомтызь седеест,
пилесткак потомдызь,
сельместкак конизь, секс:
иляст нее сельмесэст, иляст маря пилесэст,
иляст чарькоде седейсэст, иляст велявто Монень
ды Мон илинь шумбралгавто сынст”.
28Ней содадо: Пазось кучизе идемадо Кулянть лия раськетненень, ды сынь марясызьгак!»29Зярдо Павол ёвтызе тень, еврейтне тусть, псистэ эсь ютковаст пелькстнезь-спорязь.

30Павол эрясь Римсэ мик кавто иеть эсензэ сиведезь кудосонть ды паро мельсэ вастнесь эрьванть, кие тензэ сакшныль.31Сон апак пеле ды кодамояк пирявкстомо кортась Пазонь Инязорксчиденть ды тонавтсь ломантнень содамс Иисус Христос Азородонть видечинть.


*а 28:4 видечинь авапаз – те аволь алкуксонь паз, конанень сюконясть Мальта усиянь эрицятне.


предыдущая глава Глава 28 следующая глава