Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 27

Павол туи венчсэ Римев

1Зярдо Фест кармавтымизь минек туемс Италияв, сестэ Паволонь ды зярыя лият пекстазтнень максызь Юлий сядонь прявтонь кедензэ алов. Сон ульнесь кесарень ушмосто.2Минь озынек Адрамит ошонь покш венчс, конанень эрявсь уемс Асиянь лоткамо таркатнева, ды сыргинек. Мартонок ульнесь Македониянь ломань Аристарк Фессалоника ошсто.3Омбоце чистэнть минь пачкодинек Сидонов. Юлий прянзо ветясь Паволонь марто седейшкава. Сон мик нолдызе Паволонь ялганзо содавтомо ды саеме кедьстэст весе эрявиксэнть.

4Мейле минь таго лисинек иневедьс ды каршо пувиця вармадонть уинек Кипра усиянть ёжова, косо вармась ульнесь аволь истямо виев.5Мейле минь ютынек покш иневеденть трокс Киликиянть ды Памфилиянть вакска ды пачкодинек Ликиянь Мира ошс.6Тосо сядонь прявтось мусь Александриянь покш венч, кона уйсь Италияв, ды минек озавтымизь те венчентень.7Минь састо уинек ламо чить ды, окойники, ламо виень путозь пачкодинек Книда ошонть малав. Вармась пувась каршо, ды миненек а кода ульнесь молемс седе тов. Секскак савсь уемс Салмононь неренть вакска Крит усиянть вармавтомо чирева.8Истя эль-эль шаштозь Критэнь чиренть ёжова, минь пачкодинек таркантень, конань лемезэ Вадря Лоткамо таркат, кона Ласея ошонть маласо.

9Шкадонть ёмавтозель ламо, ютакшнось уш Постонь кирдема чиськак, ды те шкастонть уемс апак пеле ульнесь а кода. Секс Павол мерсь весенень, конат ульнесть венчсэнть:10«Цёрат! Мон неян: минек укшномась седе тов карми молеме покш стакачи ды пелема марто, аволь ансяк венченть ды канстонзо туртов, ломантнень эрямост туртовгак».11Ансяк сядонь прявтось седе пек кемсь венчень ветицянтень ды венчень азоронтень, аволь Паволнэнь.12Те лоткамо таркаськак а маштовиль телень печтямс, ды седе ламотне сайсть мель уемс седе тов, терявтомс пачкодемс Фойниксэв ды тосо печтямс теленть. Фойниксэсь ульнесь Крит усиянть лангсо ды панжозель варматненень, конат пувить обед ёнкс-чивалгомасто ды пелеве ёнкс-чивалгомасто.

Иневедьсэ давол

13Пувазевсь обед ёнксонь шожда вармине. Сынь арсезевсть: нама, те се, мезе тенст эрявияк арсемаст топавтомань туртов, кепедизь якоренть ды сыргавтызь венченть Крит усиянть кувалт, чиренть эйстэ васов апак туе.14Аламо шкань ютазь усиянть удалдо пувазевсь виев давол варма, конанень мерить “пелеве-чилисема ёнксонь давол”.15Сон истя кундызе венченть, кодаяк эзинек цидярдо варманть каршо. Минь максынек прянок вармантень, кона кармась кандтнеменек, ков понгсь.16Истя понгинек Клавда вишкине усиянть вармадо кекшезь ёнксонтень. Тосо покш стакачи марто идинек вишкине венчкенть,17конань кепединек палуба лангс. Теде мейле венчсэ важодицятне нолдасть пикст покш венченть перька ды сюлмсизь сонзэ эрьва ёндо. Сынь пельсть озавомс Сиртэнь чувар мазя тарканть лангс, секскак нолдызь вармамевтенть, ды истямо ладсо венчесь максозель вармантень.18Омбоце чистэнть даволось седеяк виевгадсь, ды венчсэ важодицятне кармасть канстнэнь-сталмотнень ёртнеме ведьс.19Колмоце чистэнть минь эсь кедьсэнек ёртнинек иневедьс венченть пельксэнзэяк.20Зярыя чить менеленть лангсо эзть неяво а чи, а тештть, ансяк даволось яла ацирьгалесь. Окойники минь допрок ёмавтынек идеманть лангс кемеманоккак.

21Венчсэнть ломантне умок уш мездеяк эзть ярса. Сестэ Павол стясь юткозост ды мерсь: «Цёрат, эряволь тенк кунсоломс превспутомам ды кадовомс Крит усиянть ваксс. Сестэ аволиде кирде неть кажотнень ды ёмавкстнэнь.22Ялатеке ней прянк илядо нолдтне: кияк эйстэнк а ёми, яжави ансяк венчесь.23Мон теде содан вана косто: ютазь вене монень сакшнось Пазонь кучовт ангел, се Пазонть пельде, конанень мон максыя прям ды конанень важодян.24Сон монень мерсь: “Иля пеле, Павол! Тонеть эряви аштемс кесарень суд икеле, ды тенде башка Пазось Эсь чанстензэ кувалма максы теть истямо казне: ванстовить мартот весе уицятнень эрямосткак”.25Секс, цёрат, илядо пеле! Мон кеман Пазонтень ды содан: кода монень ёвтазь, истя улияк.26Минь ультяно ёртозь кодамояк усия лангс, мезеяк лангс апак вано».

Венчень яжавомась-каладомась

27Кемнилееце вестэнть, зярдо даволось кандтнесь-пансесь эйсэнек Адриянь иневеденть ланга, пелеве шкасто венчень важодицятне чарькодсть: аволь васоло та-кодамо мода.28Сынь онкстызь ведень сэренть, лиссь комсешка сэльть-саженть. Мейле, аламо таркань ютазь, таго онкстызь, лиссь уш ансяк кеветее сэльть.29Венчсэ важодицятне пельсть, аволинек вачкодеве кевтнес, ды венч удалксстонть нолдасть ниле якорть ды озность: седе курок сазо чись.30Сынь терявтсть оргодеме венченть лангсто, уш нолдызь вишкине венчкенть ведьс. Тень эйсэ невтсть, буто арсить ёртомс якорть венченть икелькс ёндо.31Павол мерсь сядонь прявтонтень ды ушмантнэнень: «А кадовиндеряйть неть ломантне венченть лангс, тынь а идевтядо».32Сестэ ушмантнэ керсизь пикстнэнь, конатнесэ сюлмазель вишкине венчкесь, ды сон тусь иневедев.

33Валске малав Павол кармась энялдомо весе ломантненень: эряви мездеяк сускомс. «Кемнилееце чи уш, кода тынь аштетядо учозь ды мездеяк а ярстадо», – мерсь сон.34«Секс энялдан, мездеяк ярсадо. Те эряви эрямонк ванстомга. Тынк эйстэ киньгак прясто вейкеяк черь а пры».35Тень мерезь, Павол сайсь кши, весемень икеле ёвтась сюкпря Пазонтень, синдсь кши сускомо ды кармась ярсамо.36Сестэ лиятнеяк састь паро ёжос ды кармасть ярсамо.37Венченть лангсо эйстэнек ульнесть кавтосядт сизьгемень кото ломанть.38Зярдо ломантне пекест пештизь, сынь кармасть шождалгавтомо венченть ды кадовикс товзюронть ёртнизь иневедьс.

39Зярдо ашолгадсь, венчсэ важодицятненень эзь содаво модась: икелест ведьуло, вандора чире марто. Сынь совасть мельс ветямс венченть тов, бути ветяви.40Сынь керизь якорень кирдема пикстнэнь ды кадызь якортнень иневедьс. Секе шкастонть юкснизь пикстнэнь, конатнесэ сюлмсезельть ветямо рулень милетне, варма мельга кепедизь икельце вармамевтенть, ды кармасть венченть ветямо чиренть ёнов.41Апак учо венчесь эртевсь мазя таркас ды озась. Венчень судось пезнась чуваронтень ды ковгак эзь шашто, удалксонть жо вачкоесть ды яжасть виев ведьвелявкст.42Ушмантнэ пельсть: иляст оргоде чирентень миледемстэ пекстазтне, секс маштыксэлизь.43Ансяк сядонь прявтось сайсь мель идемс Паволонь ды лоткавтынзе сынст. Сон кармавтсь весенень, кить маштыть укшномо, васенцекс кирнявтомс ведьс ды уемс чиренть ёнов.44Лиятненень – уемс лаз лангсо ды лия мезе лангсо, мезе кадовсь венченть эйстэ. Истя минь весе идевинек ды лисинек мода лангс.


*а 27:17 мазя тарка – ведьсэ аволь домка тарка; мель


предыдущая глава Глава 27 следующая глава