Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 24

Паволонь чумондыть Феликсэнь икеле

1Вете чинь ютазь Анания, попонь прявтось, евреень покштнэнь ды Тертуллань, римень коень содыцянть, марто вейсэ састь Кесарияв, Паволонь каршо чумондоматнень Феликс прявтонтень ёвтамо.2-3Зярдо Паволонь совавтызь, Тертулла кармась сонзэ каршо чумондоматнень ловномо: «Вечкевикс ине Феликс! Свалшкане ды эрьва кува минь седейшкава ды покш сюкпря марто яла видькстнетяно, те тонь кедь ало, тонь преввалдосот минек масторось пачкодсь кеме сэтьмелувс, ды тонь теветь кувалт эрямось кармась улеме пародояк паро.4Минек арась меленек саемс тонь ламо шкат, ансяк вейкеде вешан: мельспаросо, инеськеть, кунсолык нурькине энялдоманок.5Миненек те ломанесь маряви зыянонь кандыця сыявксокс. Сон кепси шалт весе масторлангонь еврейтнень ютксо. Сон назаретэнсетнень авиде тонавтомань сравтницянь прявтост.6Минь сонзэ кундынек, зярдо сон колыксэлизе натой Пазонь кудонть ваньксчинзэ ды секскак теиксэлинек сонзэ туртов судямо минсенек Коень коряс.7Ансяк Лисий тёжань прявтось саизе сонзэ минек кедьстэ вийсэ, кучизе тонеть8ды кармавтымизь минеккак, сонзэ чумондыцятнень, ёвтамс тонеть сонзэ чумодонть. Зярдо тон пензазь сонзэ кевкстнесак, тонсь чарькодьсак: минек чумондоматне видеть».9Еврейтне кемекстызь неть чумондомань валтнэнь, мерсть, келя, мезе те ломаненть коряс ёвтазель, весе виде.

Паволонь идема валозо

10Прявтось аволдась Паволнэнь ды теньсэ мерсь тензэ кортамодо. Павол ушодызе идема валонзо: «Мон содан, тон те раськень судият уш ламо иеть ды теят эсь теветь видестэ. Секскак мон олясо прянь марязь карман кортамо идема валом тонь икеле.11Кемгавтово чиде икеле, мезде тонеть а стака ули содамс, мон сынь Ерусалимев сюконямо.12Чумондыцян монь эзимизь некшне Пазонь кудосояк, синагогасояк, ошсояк киньгак марто пелькстамодо эли прявтнэнь каршо ломантнень кепедемстэ.13Сыненст мейсэяк а кемекставить чумондоматне, конатнень сынь аравтнить ней монь каршо.14Ялатеке мон тонь икеле видькстан: мон се тонавтоманть мельга молицязо, конань сынь ловить авиде тонавтомакс, ды истя алкукскак важодян покштянок-тетянок Пазонть туртов. Мон кеман весеменень, мезе сёрмадозь Коенть эйсэ ды пазмарицятнень книгатнесэ.15Ды мон кемезь учан, кода неть ломантнеяк учить: Пазось вельмевтьсынзе виде ойметненьгак, пежетевтненьгак.16Секс мон свал бажан ванстомс оймеёжонь ваньксчинть, кода Пазонть икеле, истя ломантнень икелеяк.

17Зярыя иень ютазь мон ней сынь Ерусалимев эсень раськем туртов лезксэнть кандомо ды Пазонтень казнень-аноксонь максомо.18Те тевенть теемстэ монь куродымизь Пазонь кудосо ванськавтовомам теемадо мейле. Те шкане монь перька эзть пурнавкшно ломанть, ды киньгак мон эзинь азаргавтне.19Тосо ульнесть Асиясто зярыя еврейть. Неть ломантненень ней улемаль тонь икеле эсь чумондомаст марто, бути сынст ули мейсэ монь чумондомс.20Эли кадык нетне тесэ ёвтыть, кодамо чумо мусть сынь эйсэнь, зярдо монь кевкстнесь Инепромксось.21Арази чумом сеть валтнэсэ, конатнень мон тосо серьгединь икелест стядо аштемстэ: Течи тынь монь судятадо сень кис, мекс кеман-нежедян кулозьстэ вельмеманть лангс?»

22Тень кунсоломадо мейле Феликс лоткавтызе тевенть ды мерсь: «Мон ёвтаса арсемам тынк тевенк коряс, зярдо сы Лисий, тёжань прявтось, ды мон седе домкасто чарькодьса те тонавтоманть».23Сон кармавтсь сядонь прявтонтень кирдемс Паволонь пекстазь, ансяк максомс тензэ аламошка олячи: кадык малавиксэнзэ якить мельганзо эли сакшныть тензэ.

Павол пекстамо кудосо

24Зярыя чинь ютазь Феликс сась нинзэ марто, кона еврей аваль, лемезэ Друзилла. Прявтось тердевтизе Паволонь ды мелень явозь кунсолось сонзэ ёвтнеманзо Христос Иисуснэнь кемемадонть.25Теде мейле Павол кармась кортамо Пазонь мелень коряс эрямодонть, кирдевемадонть ды се чиденть, зярдо Пазось карми судямо ломантнень. Феликсэнь те тандавтызе, ды сон мерсь: «Саты! Азё ней! Зярдо муян шка, таго тердтян».26Теде башка, сон учось: Павол максы тензэ ярмакт олякстомтоманзо кисэ, секскак сеедьстэ кучнесь кисэнзэ ды кортнесь мартонзо.

27Ютасть кавто иеть, ды Феликс прявтонть таркас арась Поркий Фест. Феликс ялатеке Паволонь кадызе пекстамо кудонтень, еврейтнень мельс туемга.


предыдущая глава Глава 24 следующая глава