Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 22

1«Покштят-тетят ды ялгат-оят! Кунсоломизь. Мон ёвтан икеленк зярыя валт эсь прям идемга».2Зярдо ломантне маризь, Павол корты евреень кельсэ, сынь седеяк кармасть каштмолеме. Павол поладсь:3«Мон евреян, чачинь Киликиясо, Тарс ошсо, ды касынь те ошсонть. Ды тесэ, Гамалилэнь кедьсэ, мон ульнинь тонавтозь покштятнень Коень кеместэ топавтомантень-кирдемантень. Мон весе вийсэнь тюринь Пазонь тевенть кисэ, кода течи тюри эрьвась тынк эйстэяк.4Мон пансинь мик маштомас Азоронть киява молицятнень, кундсинь цёратнень ды аватнень, ёртовтнинь эйсэст пекстамо кудова.5Теде соды попонь прявтоськак, раськень весе прявтнэяк. Монень мик максозельть пельдест сёрмат Дамасконь еврейтненень. Мон молинь тов неть ломантнень кундсеме ды Ерусалимев тертязь сынст пачтямо чумонь пандовтомань кисэ.

6Ды вана мезе лиссь монь марто Дамаск ошонть маласо, ки лангсо: чикуншкане апак учо валдомтымим менельстэ ине валдо.7Мон прынь мода лангс ды маринь вайгель, кона мерсь тень: “Савла! Савла! Мекс тон пансят Эйсэнь?”8Мон кевкстия: “Тон кият, Азоро?” Сон мерсь: “Мон Назаретэнь Иисусан, конань тон пансят”.9Монь ялгатне неизь валдонть ды пек тандадсть, ансяк Сень вайгелензэ, кие монень кортась, сынь эзизь маря.10Мон таго кевкстия: “Азоро! Мезе монень теемс?” Азорось мерсь монень: “Стяк ды азё Дамасков. Тосо весементь ёвтасызь, мезе теть теема”.11Ине валдось монь сокоргавтымим, секскак ялган кедте ветимизь Дамаск ошов.

12Тосо эрясь Анания, Коенть педе пес кирдиця ломань, конань весе Дамасконь еврейтне шнасть.13Сон совась монень ды мерсь: “Савла ялгам, велявтозо теть сельмевалдось!” Сеске мон карминь нееме ды ваномо сень лангс, кие ёвтынзе монень неть валтнэнь.14Сон мерсь: “Минек покштятнень-тетятнень Пазост тонь кочкинзеть Сонзэ мелензэ содамо, Видечисэнть нееме ды Сонзэ вайгелензэ марямо, зярдо Сон теть пшкади.15Тон улят весе ломантнень икеле Сонзэ ёвтницякс сень коряс, мезе неить ды мезе марить.16Сестэ мезе жо тон учнят? Озномасот тердик Азоронть лездыцякс. Стяк, нававтык прят ды шлить пежететь”.

17Мейле мон велявтынь Ерусалимев ды, Пазонь кудосо озномсто, кучозель тень неявкс.18Мон неия Азоронть, кона мерсь монень: “Капшак ды нейке кадык Ерусалименть: неть ломантне а кармить кемеме тонь валозот Мондень”.19Мон меринь тень каршо: “Азором, неть ломантне содыть, кода мон, синагогасто синагогав яказь, кундсилинь ды локшосо керсилинь Тонеть кемицятнень.20Ды зярдо валовсь Стефанонь, Тондеть ёвтницянть, верезэ, монгак тосо аштинь ды ульнинь сонзэ маштоманзо кисэ. Мон мик ванстынь сонзэ маштыцятнень оршамопелест”.21Сестэ Азорось мерсь монень: “Азё. Мон кучтан тонь васов, лия раськенсетненень”».

Павол тёжань прявтонь кедьсэ

22Неть валтнэнь видьс пурнавозтне кунсолость Паволонь. Ансяк неть валтнэде мейле сынь кармасть рангомо: «Истямонть нардама моданть лангсто! Сонензэ а эряма!»23Сынь рангсть, сезнесть ланга оршамост, коморсост ёртнесть коштс пуленть.24Тёжань прявтось кармавтсь Паволонь ветямс ушмокудов, тосо локшосо керямс ды парстине кевкстнемс сонзэ, мекс ломантне истя пижнесть лангозонзо.25Зярдо Паволонь сюлмсизь локшосо керямс, сон пшкадсь вакссонзо аштиця сядонь прявтонтень: «Мери-арась коесь тенк локшосо керямс Римень масторонь ломаненть, кона судскак арасель максозь?»26Зярдо тень маризе сядонь прявтось, сон мерсь тёжань прявтонтень: «Мезе тон теят? Те ломанесь – Римень масторонь ломань».27Сестэ тёжань прявтось лиссь Паволнэнь ды кевкстизе: «Тон алкукс Римень ломанят?» «Алкукс», – мерсь Павол.28Сестэ тёжань прявтось мерсь: «Монень савсь покш питне пандомс Римень ломанькс арамга». «Мон вана чачинь Римень ломанекс», – мерсь тень каршо Павол.29Сетне, конат анокольть пензавтомо Паволонь, сеске тусть. Тёжань прявтоськак тандадсь: эдь сон кшнисэ тертизе Римень масторонь ломаненть.

Павол Инепромксонть икеле

30Тёжань прявтонть ульнесь мелезэ содамс, мезень кисэ еврейтне чумондыть те ломаненть. Омбоце чистэнть сон нолдызе Паволонь кшнинь тертнестэ. Сон тердинзе весе попонь покштнэнь ды Инепромксонть. Мейле совавтызе ды аравтызе икелест Паволонь.


предыдущая глава Глава 22 следующая глава