Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 17

Апостолтнэ Фессалоникасо

1Павол ды ялганзо ютасть Амфиполенть ды Аполлониянть трокс, састь Фессалоникав, косо ульнесь евреень синагога.2Павол, кода свал тейнекшнесь, совась синагогав. Тосо мельга-мельцек колмо оймсема чинь перть кортнесь мартост Пазонь Сёрмадовкстонть,3конань коряс чарькодевтсь ды невтсь: Пазонь кучовт Идицянтень алтазель пиштема ды кулозьстэ вельмема. «Те Иисусось, конань эйстэ мон ёвтнян тенк, улияк Пазонь кучовт Идицясь», – кортась Павол.4Зярыя еврейть кемезевсть ды вейсэндявсть Паволнэнь ды Силанень, мартост ламо гректькак, конат ловсть Пазонть, ды аволь аламо содавикс аваткак.

5Те сявадстовтынзе акемиця еврейтнень сельмест, ды сынь пурнызь нузякс нулгодькс ломантнень ошкужотнестэ ды ошонь эрицятненьгак ды кармасть ошонть азаргавтомо. Сынь вешнесть Паволонь ды Силань ды ливтиксэлизь сынст ломантнень икелев. Секскак каявсть Ясононь кудонтень.6Ансяк тосто эзизь муе апостолтнэнь. Сестэ саизь Ясононь ды лия кемицятнень, ветизь ошонь прявтнэнень. Азаргавтозтне пижнесть: «Сынь прянзо лангс велявтызь весе масторлангонть, ней вана састь тейгак!7Ясон жо саинзе сынст эсь кудозонзо. Сынь весе молить кесаренть мереманзо каршо ды свал кортыть лия инязоронь улемадо. А те инязорось, келя, Иисус!»8Тень марязь, ошонь прявтнэ ды вейс пурнавозь ломантне теевсть теке азарсь кискат.9Ошонь прявтнэ васняяк сайсть Ясононь ды лиятнень пельде кемекстамо вал ярмакт марто ды мейле нолдызь.

Беройя ошсо

10Ансяк ушодовсь весь, кемиця ялгатне ильтизь Паволонь ды Силань Беройяв. Тов самодо мейле сынь мольсть евреень синагогав.11Беройянь еврейтне, аволь кода Фессалоникансетне, седе превеельть. Сынь мелень явозь кунсолызь тонавтома валонть ды эрьва чистэ вансть Пазонь Сёрмадовксонть, сень содамга: видестэ а видестэ корты Павол.12Ламот неть еврейтнень ютксто кемезевсть, мартост кемезевсть грекень содавикс аваткак ды цёраткак.13Ансяк зярдо еврейтне Фессалоникасо марясть, келя, Павол пачти Пазонь валонть Беройясояк, сынь састь товгак ды кармасть ломантнень апаро мельс совавтомо ды ацирьгавтнеме.14Кемиця ялгатне сеске ильтизь Паволонь буто иневедь чирев, Сила ды Тимофей кадовсть Беройяс.15Паволонь ильтицянзо уйсть мартонзо Афинав, мейле мурдасть мекев. Сынь пачтясть Паволонь пельде Силанень ды Тимофейнень энялдома – самс седе курок сонензэ.

Павол Афинасо

16Павол, эсь ялгатнень учозь, якась Афинава. Кежензэ савтызь аволь алкуксонь пазонь чачотне, конатнеде пешксель те ошось.17Секскак сон кортнесь синагогасо еврейтнень ды Пазонь ловиця гректнень марто. Эрьва чистэ кортнесь сетнень мартояк, конат вастовкшность тензэ наймансо.18Весть сонзэ марто кармасть пелькстамо домка превень вечкицятне. Сынь ульнесть Эпикуронь ды Зенононь мельга молицяст. Веенстнэ сынст эйстэ кевкстнесть: «Мезе ёвтыксэль те чаво чалгамонь чавицясь?» Лиятне кортасть: «Сон, паряк, ёвтни лия масторонь пазтнэде». Сынь кортнесть истя секс, мекс Павол ёвтнесь Кенярксов кулянть Иисусто ды кулозтнень вельмемадост.19Тень кувалма Паволонь ветизь промксос Ареопагов. «Ёвтак миненек, кодамо смустезэ те од тонавтоманть, конанень тон тонавтат?» – кевкстизь Паволонь.20«Тон кортат таго-мезе ачарькодевикс. Ули меленек содамс, мейсэ смустезэ?»21Афинань ломантне ды лия масторонсетнеяк, конат тосо эрильть, сехте пек вечкильть мездеяк одто кортнеме ды кунсоломо.

22Ареопагонь промкссо Павол стясь ды мерсь: «Афинань ломанть! Весемень кувалма мон неса, тынь пек мелявттадо пазнэнь сюконямодо.23Эдь ошканк якамсто ды озксонь тарканк ваномсто мон неинь мик истямо алтарь, конань лангсо сёрмадозь: “Асодавикс Пазонтень”. Мон ней ёвтнян тыненк те асодавикс Пазонть эйстэ, конанень тынь сюконякшнотадо, мик апак сода, кие Сон истямось.24Пазось, кона теизе мирэнть-масторонть ды весементь, мезе ули эйсэнзэ, Сон менеленть ды масторлангонть Азорост. Сон эри аволь кедьсэ теевть Пазонь кудова.25Ломантненень мезе тееви эсь кедьсэст Сонзэ туртов?! Сонензэ мезеяк а эряви. Сон Сонсь весе ломантненень максы эрямо, лексема ды весе лиянть.26Сон теинзе вейке верьстэ весе ломаньраськетнень, кадык эрить весе масторлангованть. Сон эрьвантень сынст эйстэ аравтсь шка ды эрямо тарка.27Сон теизе тень вана мекс: кадык вешнить ломантне Пазонть ды, паряк, щупазь-капазь мусызь.

Пазось, ялатеке, минек эрьванть эйстэ авасоло.28Эдь Сонзэ эйсэ минь эрятанояк, якатанояк, ультянояк. “Минь Сонзэ буень-раськень”, кода теде кортасть тынк конат-конат моронь сёрмадыцятнеяк.29Истямо ладсо, бути минь лисинек Сонзэ буестэ-раськестэ, сестэ миненек а эряви арсемс, буто Пазонть чачозо сырнестэ, сиясто, эли кевстэ теезь чопачань кондямо. Пазонь чачось а моли ломанень кедьсэ ды мельсэ теезенть ёнов, Сон – овсе лия.30Пазось кувать цидярдсь ды эзинзе чумондо ломантнень сеть шкатнестэяк, зярдо сынь Сонзэ а содылизь. Вана ней Сон кармавты весень эрьва косо кадомо эсест пежетест.31Сон путсь чи, зярдо карми видестэ судямо масторлангонь весе ломантнень. Судиякс ули Ломань, конань Сон икеле аравтызе те тевенть топавтомо. Пазось кемекстызе те кочкамонть весе ломантнень икеле, зярдо вельмевтизе Сонзэ кулозьстэ!»

32Зярдо сынь марясть кулозьстэ вельмемадонть, конат-конат кармасть Павол лангсо пеедькшнеме, лиятне жо мерсть: «Те тевенть коряс минек ули меленек кунсоломс тонь лия шканеяк».33Теке марто Павол кадызе Ареопагонь промксонть.34Зярыя ломанть ялатеке вейсэндявсть Паволнэнь, кармасть кемеме. Сынст ютксо ульнесть Ареопагонь ломанесь Дионисий, Дамарь лемсэ ава ды лияткак.


предыдущая глава Глава 17 следующая глава