Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 16

Тимофей сырги Павол ды Сила марто

1Павол пачкодсь Дербев ды мейле Листрав. Тосо эриль Иисусонь мельга молицясь Тимофей. Тимофеень авазо ульнесь еврей ава, кона кармась кемеме Христоснэнь, тетязо – грекель.2Листрань ды Икониянь кемиця ялгатне ёвтасть паро вал Тимофейде.3Павол сайсь мель саемс Тимофеень эсензэ марто якамо, секскак теевтсь тензэ киськепень керявтома кой. Тень сон теизе еврейтнень кувалма, конат тосо эрясть, эдь сынь содыльть: Тимофеень тетязо ульнесь грек.4Ошсто ошс якамсто сынь пачтясть кемицятненень кармавтовкстнэнь, конатнень максызь Ерусалимень апостолтнэ ды кемикуронь прявтнэ, ды кармавтсть топавтомс сынст.5Ды яла виевгадсь кемикуротнень кемемаст ды эрьва чистэ кассь ламочист.

Паволонь неявксозо Троадасо

6Иневанькс Оймеялтось эзь мере тенст Асиясо Пазонь валонь пачтямодо, ды секскак сынь кочкизь кинть Фригиянь ды Галатиянь ютксо моданть трокс.7Зярдо пачкодсть Мисиянь модакирьксэнть видьс, саиксэльть мель ютамс Битинияв, ансяк Оймеялтось тов эзинзе нолда.8Секскак Мисиянть ютамодо мейле сынь састь Троадав.9Веть Павол несь неявкс. Лиссь тензэ Македониянь ломань ды энялдсь икелензэ: «Сак Македонияв, иневеденть трокс ютазь, ды лездак тенек».10Те неявкстонть мейле минь чарькодинек: истя Азорось терди эйсэнек тов Кенярксов кулянть кандомонзо, ды прынек ве мельс сыргамс Македонияв.

Лидия карми Христоснэнь кемеме

11Троадасто минь венчсэ туинек видьстэ Самотраки усияв, тосто, омбоце чистэнть – Неаполев,12Неапольстэ – Филиппав, римень колонияв, кона ульнесь Македониянь васенце пельксэнть ошокс. Тосо ульнинек зярыя чить.13Оймсема чистэ минь лисинек ошонь орта ушов, леентень, косо еврейтне, кода минь арсинеккак, пурнавильть озномо. Минь озынек ды карминек кортнеме аватнень марто, конат тов пурнавсть.14Ютксост ульнесь Тиатир ошсто Пазонь ловиця ава, лемезэ Лидия. Сон микшниль питней тусто-якстере тюсонь коцт. Зярдо Лидия кунсолось, мезде кортась Павол, Азорось панжизе сонзэ седеензэ Паволонь кортамонть чарькодемантень.15Сонськак, кудоютконсетнеяк нававтозельть, ды сон пек тердсь минек эйсэ эстензэ: «Ловиндерятадо эйсэнь Азоронтень алкуксонь кемицякс, садо монень ды эрядо кедьсэнь». Сонзэ энялдоманть минь топавтынек.

Паволонь ды Силань озавтыть пекстамо кудос

16Таго весть ознома таркантень молемстэ минек ки лангсо вастовсь важо тейтерь. Сон ульнесь колазь аванькс оймеялтсо, кона вельдензэ кортыль сыця шкадонть. Сы шкадонть ёвтнематнесэ важо тейтересь кандыль ламо ярмакт эсь азортнэнь туртов.17Сон мольсь Паволонь ды минек мельга, истя сеерезь: «Неть ломантне Верепазонть важонзо! Сынь ёвтнить седе, кода тенек идевемс!»18Истя сон тейниль чиде чис. Окойники, Павол эзь кирдеве, велявтсь ёнонзо ды пшкадсь аванькс оймеялтонтень: «Иисус Христосонь лемсэ теть кармавтан: лиссть эйстэнзэ!» Сеске аванькс оймеялтось кадызе важо тейтеренть.

19Зярдо важо тейтеренть азоронзо чарькодсть: лезэнь лисьмапряст ёмась, сестэ сынь кундызь Паволонь ды Силань, ускизь ошкужос, прявтнэнень.20Ветизь ошонь ине прявтнэнень ды мерсть: «Неть ломантне еврейть, сынь минек ошонь сэтьмечинть колыцяст.21Сынь тонавтыть койтненень, конат аштить минек коенть каршо ды конатнень миненек, Римень масторонь ломантненень, а эрявить саемс ды топавтомс».22Ошонь эрицятнеяк азаргадозь кепедевсть Паволонь ды Силань каршо, ды прявтнэ кармавтсть кайсевтнемест ды илейсэ чавомост.23Сынст пек чавизь ды ёртызь пекстамо кудос. Ванстыцянтень кармавтсть седе пштистэ ваномс мельгаст.24Истямо кармавтовксонь марязь, сон пекстынзе сынст сехте васоло потмарс, пильгест сёлгинзе кандс.

25Пелевень шкасто Павол ды Сила озность ды морасть шнамо морот Пазонтень, лият пекстазтне кунсолость эйсэст.26Апак учо теевсь истямо виев модасорнома, мик пекстамо кудонть юрозо сыргстась таркастонзо. Сеске весе кенкштне панжовсть, весемень тертест прасть.27Зярдо ванстыцясь сыргозсь ды неинзе пекстамо кудонь панжадо кенкштнень, сон каподсь торо эсь прянзо маштомга, эдь сон арсесь: пекстазтне оргодсть.28Ансяк Павол серьгедсь тензэ: «Иля тее эстеть зыян! Эдь минь весе тескетяно!»29Ванстыцясь кармавтсь кирвазтемс тол, ёртозь ёртовсь Паволонь потмаронтень, ды тандадомадонть прясто пильгс сорнозь прась Паволонь ды Силань пильгезэст.30«Азорт-парочить, мезе монень теемс идеман кисэ?» – кевкстинзе сынст пекстамо кудостонть ливтемстэ.31Тень каршо сынь мерсть: «Кемть Иисус Христос Азоронтень, сестэ идеват тон, ды тонь кудораськетнеяк».32Сынь кармасть пачтямо Азоронь валонть сонензэяк, кудоютконсетнененьгак.33Пекстамо кудонь ванстыцясь сеске, секе вестэнть, саинзе сынст мартонзо, шлинзе-нардынзе аржост, ды нейке сонсь ды весе кудораськезэ нававтызь пряст.34Мейле сон ветинзе сынст эсь кудозонзо, андынзе ды весе эсь кудоютконсетнень марто пек кенярдозевсть, мекс кемезевсть Пазонтень.

35Зярдо сась валскесь, ошонь прявтнэ кучсть пекстамо кудонь ванстыцянтень эсест пельде важодицят истямо кармавтома марто: «Нолдынк неть ломантнень».36Пекстамо кудонь ванстыцясь мерсь Паволнэнь: «Прявтнэ кармавтсть нолдамонк. Лиседе ды азёдо седейоймамо марто!»37Ансяк Павол мерсь важодицятненень: «Кода истя? Сынь судтомо минек, чумовтомотнень, илейсэ чавимизь весень икеле, куш минь Римень масторонь ломантяно, ды ёртымизь пекстамо кудос. Ней сынст мелест нолдамонок салава? Истя а ули! Кадык сынсь сыть тей ды ливтьсамизь тестэ».38Важодицятне пачтизь неть валтнэнь прявтнэнень. Зярдо тонат маризь, келя, Павол ды Сила Римень масторонь ломанть, сынь тандадсть.39Прявтнэ састь, апостолтнэнь кедьстэ вешсть чумонь нолдамот, ливтизь пекстамо кудостонть ды энялдсть ошонть кадомадо.40Пекстамо кудостонть лисемадо мейле Павол ды Сила састь Лидиянень. Тосо сынь вастовсть кемиця ялгатнень марто ды кемекстызь сынст оймест. Мейле Павол ды Сила тусть Филиппа ошстонть.


предыдущая глава Глава 16 следующая глава