Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 24

Вельмема

1Недлячистэнть, чи лисемстэ, аватне састь калмонтень эсест анокставт тантейстэ качадыця ойтнень марто. Зярыя лияткак састь мартост.2Вана сынь неить: калмонь пекстыця кевесь сявордозь ве ёнов.3Сынь совасть калмонтень, ансяк Иисусонь уловонть эзизь муе.4Аватне аштесть талакадозь, ды апак учо сынст икелев лиссть кавто цёрат, оршазь сияждыця оршамосо.5Тандадомадонть аватне нолдызь вановтост модантень, цёратне мерсть тенст: «Мекс тынь вешнетядо Эрицянть кулозтнень ютксто?6Сон тесэ арась. Сон вельмесь! Мельс ледстинк сень, мезде Сон кортнесь тенк Галилеясо улемстэ:7“Истя эрявсь теевемс: Ломантнень Цёрась максови пежетев ломантнень кедьс, вачкодеви крёст лангс ды колмоце чистэ кулозьстэ вельми”».8Сестэ Иисусонь неть валтнэ ледсть аватнень мельс.9Калмонть лангсто самодо мейле сынь ёвтнизь тень кевейкее апостолтнэнень ды весе лия тонавтницятнененьгак.10Неть аватне ульнесть Магдалань Мария, Иоанна, Мария – Яковонь авазо. Лия аватнеяк, конат ульнесть сынст марто, ёвтнесть апостолтнэнень текень.11Ялатеке апостолтнэ сыненст эзть кеме. Сынь арсесть: неть ёвтнематне – чаво валт.12Ансяк Петра сеске стясь ды чиезь тусь калмонтень. Сон комась ды неинзе тосто ансяк тапарямо коцтнэнь. Сон велявтсь мекев ды пек дивсесь весе теевезентень.


Эммаусов молемстэ

13Секе чистэнть Иисусонь кавто тонавтницянзо тусть Эммаус велинес, кона ульнесь Ерусалимде кемгавтовошка вайгельбень тарка.14Молемстэ сынь кортнесть эсь ютковаст меельце чинь тевтнеде.15Зярдо сынь истя кортнесть ды пелькстнесть эсь ютковаст, сасынзе сынст Сонсь Иисус ды мольсь мартост вейсэ.16Ансяк тонавтницятне Сонзэ эзизь сода: те шкане сынст сельмест прок сокорольть.17Иисус кевкстинзе тонавтницянзо: «Мезде тынь ютамсто кортатадо эсь юткованк ды мекс тынь истят нусманят?»18Вейкесь эйстэст, конань лемезэ Клеопа, мерсь каршонзо: «Паряк, Тон ансяк Ерусалимев сыцятнестэ а содат, мезе тосо теевсь неть читнестэ?»19Иисус кевкстинзе сынст: «Мезе эно?» Тонавтницятне каршонзо ёвтасть: «Се, мезе лиссь Назаретэнь Иисус марто, кона ульнесь пазмарицякс, виевель тевсэ ды валсо Пазонть икеле ды весе раськенть икеле.20Ансяк минек попонь покштнэ ды прявтнэ максызь Сонзэ куломас, вачкодизь крёст лангс.21Минь кемезевкшнинек: Сон – Се, кона олякстомтсы Израиленть. Теке марто течи вана колмоце чи, зярдо те весе теевсь,22ды ней вана конат-конат минсенек аватнестэяк талакавтымизь. Сынь чи лисемстэ якасть калмонтень,23ансяк эзизь муе Сонзэ уловонть. Зярдо састь тосто, ёвтнесть, келя, сыненст састь ангелт, конат мерсть: Иисус вельмесь.24Мейле мольсть кой-конат минек ялгатнестэ калмонтень ды неизь весементь истя, кода кортасть аватне, ансяк Сонзэ Эсензэ эзизь нее».25Сестэ Иисус мерсь тенст: «Вай, кодат тынь ачарькодицят! Нать тынк кельме седейтненень истя стака кемемс весементень, мезде кортасть кезэрень пазмарицятне!26Арази а истя Пазонь кучовт Идицянтень эрявсь пиштемс ды истя Эсензэ иневалдонтень совамс?»27Ды Сон кармась тенст ёвтнеме, кода весе пазмарицятне, Моисейстэ саезь, кортасть Эйстэнзэ весе Сёрмадовкстнэсэ.

28Истя сынь пачкодсть се велинентень, ков мольсть. Иисус невтсь пря седе тов молицякс.29Тонавтницятне лоткавтызь энялдозь: «Кадовт мартонок, эдь чизэ велявтсь чоподема ёнов». Сестэ Сон совась кудос ды кадовсь мартост.30Сынст марто чокшнень ярсамсто Сон сайсь кши, Пазнэнь сюкпрянь ёвтазь, синдизе ды максызе тенст.31Те шкастонть сынст сельмест прок панжовсть – сынь содызь Сонзэ, ансяк Иисус сынст икельде сеске ёматотсь.32Сестэ тонавтницятне кармасть кевкстнеме вейкест-вейкест эйсэ: «Арази эзть либордо минек седеенек, зярдо киява ютамсто Сон кортнесь минек марто, зярдо панжсь миненек Сёрмадовкстнэнь смустенть?!»33Сынь сеске стясть ды велявтсть Ерусалимев, муизь кевейкее апостолтнэнь, конат пуромсть вейсэ лия тонавтницятнень марто.34Пуромозтне кармасть ёвтнеме сыцятненень: «Азорось алкукскак вельмесь! Сон невтизе прянзо Симоннэнь!»35Мейле кавтотне ёвтнизь, мезе мартост лиссь ки лангсо ды кода сынь содызь Иисусонь, зярдо Сон синтресь кшинть.


Иисус невтизе прянзо тонавтницятненень

36Сынь эзизь прядо кортнемаст, зярдо Иисус Сонсь апак учо лиссь икелест ды мерсь: «Седейоймамо тенк!»37Тонавтницятне талакадсть ды чувтомсть. Сынь арсесть: те чопача.38Иисус поладызе кортамонзо: «Мекс тандадыде? Мекс тынк седеенк пешкедсть кавтолдомасо?39Варштадо Монь кедень ды Монь пильгень лангс: те – Мон Монсь. Токшимизь Монь ды несынк, эдь чопачанть арасть сывелезэ ды ловажанзо. Кода нетядо, Монь улить».40Неть валтнэнь ёвтамсто, Сон невтинзе тенст кедензэ ды пильгензэ.41Тонавтницятне кеняркстонть кодаяк эзть кемеве ды дивсесть. Сестэ Сон кевкстинзе сынст: «Ули тынк тесэ кодамояк ярсамопель?»42Сынь кандсть Сонензэ рестазь калонь сускомо ды керяз медь.43Сон саизе ды сэвизе икелест.

44Мейле Иисус мерсь тенст: «Вана кодамо Монь валтнэнь смустесь, мезде Мон кортнинь тынк марто, зярдо ульнинь ютксонк. Весементень, мезе сёрмадозель Монь эйстэ Моисеень Койсэнть, пазмарицянь книгатнесэ ды Псалтирьсэ, топавтовомаль».45Мейле Иисус лездась тенст чарькодемс Сёрмадовкстнэнь смустенть.46Сон кортась тенст: «Истя сёрмадозь: Пазонь кучовт Идицянтень эрявсь пиштемс ды вельмемс кулозьстэ колмоце чистэ.47Ды Сонзэ лементь пельде весе раськетнень эряви тердемс Пазонтень велявтомас – пежетест нолдамга. Ушододо Ерусалимстэ!48Тынь весемень тень неицят-содыцят.49Мон нейке кучан тенк сень, мезе алтась Монь Тетям. Тынь кадоводо Ерусалим ошс, зярс а валги лангозонк Верепазонь вий».

50Мейле Иисус ливтинзе сынст ошсто ды ютась мартост Бетания веленть видьс, кепединзе Эсензэ кедензэ ды чанстинзе-баславинзе сынст.51Ды зярдо Сон чанстясь эйсэст, Сонсь кармась явовомо эйстэст ды кепедевеме менель лангов.52Тонавтницятне модас сюконясть Сонензэ ды мурдасть покш кеняркс марто Ерусалимев.53Сынь свал ульнесть Пазонь кудосо ды шнасть-чанстясть Пазонть. Аминь.


предыдущая глава Глава 24 следующая глава