Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 13

Пингень прядовома тешкстнэ

1Пазонь кудостонть лисемстэ тонавтницянзо ютксто вейкесь кецязь мерсь Иисуснэнь: «Тонавтыця, вантая, кодат парт кевтне, кодат покшт кудотне!»2Иисус каршонзо мерсь: «Несыть неть покш мазый кудотнень? Весе калавтозь улить, а кадови эйстэст кев лангс кевгак».

3Зярдо Сон озадо аштесь Ойумарькс пандонть лангсо Пазонь кудонть каршо, сестэ Петра, Яков, Иоанн ды Андрей, конат кадовсть мартонзо ськамост, кевкстизь Сонзэ:4«Ёвтак тенек, зярдо те ули, ды кодамо тешксэнь коряс содави весе тень топавтомась?»

5Иисус каршост кармась кортамо: «Ванодо, кияк аволидизь маня.6Ламот сыть кекшезь Монь лементь ало ды кармить пряст ёвтамо: “Те Мон”. Сынь ламонь ильведстьсызь-манясызь.7Зярдо марятадо маласо войнань гайть ды васоло войнадо кулят, илядо тандале, – тенень эряви улемс, ансяк те зярс аволь песь.8Раське кепедеви раськень каршо, мастор – масторонь каршо. Таркань-таркань улить модань сорномат, сыть вачо иеть ды шалномат-талномат. Неть майсематне ансяк теке чачтомань пиштематнень ушодксост.

9Тынь ванодо эсь мельганк, – тынк ветятадызь судс, синагогатнесэ кармить чавомонк. Монь кисэ тыненк сави стямс прявтнэнь ды инязортнэнь икелев ды ёвтнемс сыненст Мондень.10Ансяк васня эряви ёвтнемс весе раськетнень ланга Кенярксов кулянть.11Зярдо тынк макстадызь прявтнэнь кедьс, илядо мелявто икелев ды илядо арсе, мезть тенк кортамс. Ёвтынк сеть валтнэнь, конат тенк те шкастонть максовить. Эдь кортыцякс ули Пазонь Оймеялтось, аволь тынь.

12Лелясь макссы-мийсы куломас ялаксонзо, тетясь – эйкакшонзо, эйкакштнэ стить тетяст-аваст каршо ды кармить макснеме сынст куломас.13Монь лементь кисэ весеменень ультядо а вечкевиксэкс, кие жо весе тень цидярдсы педе пес, се ванстови-идеви.

14Зярдо несынк аваньксчинь нулгодьксэнть, конадо кортась Даниил пазмарицясь, аштицякс тосо, косо сонензэ а улемаль – ловныцясь чарькодезэ! – сестэ сеть, конат Иудеясо, оргодест пандо лангов.15Кие тондавсь кудо лангс, се илязо валго алов, илязо сова эсь кудозонзо мезеньгак саеме.16Кие паксясо, илязо велявто мекев кудов оршамонзо кисэ.17Кодамо стака ули сеть читнестэ пешксесэтненень ды потесэ эйкакшонь потицятненень!18Ознодо, илязо уле тынк оргодемась тельня.19Сеть читнестэ ули истямо пиштема, кодамо арасель теевеманть ушодомсто, зярдо Пазось теинзе менельтнень-мастортнэнь, ды натой течинь чис ды зярдояк а ули.20Бути Азорось аволинзе аламолгавто неть читнень, сестэ кияк аволь ванстово. Ансяк сетнень кисэ, конатнень Сонсь кочкинзе, аламолгавтынзе сеть читнень.

21Сестэ кияк мериндеряй тенк: “Вана тесэ Пазонь кучовт Идицясь!” эли: “Вана тосо Сон!” – илядо кеме.22Се шкастонть кармить само кенгели христост ды кенгели пазмарицят, конат теить покш дивань тешкст ды тамашат. Сынь снартыть натой Пазонь кочкавтнэньгак ильведстемс-манямс, бути те тееви тенст.23Ванстодо прянк. Вана Мон весементь ёвтыя тенк икелев.

24Сеть читнестэ, те пиштемадонть мейле, чись чополгады, ковоськак а карми максомо валдо,25тештетнеяк прыть менельстэ, менелень вийтнеяк теить сорк.26Сестэ несызь Ломантнень Цёранть пель лангсо самонзо покш вийсэнзэ ды иневалдосонзо.27Сестэ Сон кучсынзе ангелтнэнь, пурнасынзе Сонсензэ кочкавтнэнь масторонь ниле ёндо, моданть чирестэ – менелень чирес.

28Тонавтнеде чарькодеме инжир чувтонть коряс: зярдо сонзэ тарадонзо чевтемить ды нолдыть лопат, сестэ содави – кизэсь маласо.29Истя тесэяк, зярдо тынь несынк тень топавтоманть, сестэ чарькодтядо – те шкась маласо, кенкш лангсо.30Видестэ кортан тенк: неень пингень ломантне ёмамо а кенерить, кода весе те топавтови.31Менелесь ды масторось ёмить, ансяк Монь валон а ёмить».

Чись ды часось а содавить

32«Се чиденть эли частонть кияк а соды: менелень ангелтнэяк, Цёраськак, ансяк Тетясь.33Ванодо, уледе анокт ды ознодо: а содатадо, зярдо сы те шкась.34Те шканть самось моли истямо тев ёнов: ломанесь ки лангс туемстэ кудонзо кадсы эсь важонзо кедь лангс ды эрьвантень максы тев; орта лангсо аштицянтеньгак мери ванстомодо.35Секскак ванодо, уледе анокт, эдь а содатадо, зярдо сы кудазорось: чокшне ланга, эли пелеве шкане, эли атякш морамо шкане, эли валске ланга.36Апак учо самсто сон илядызь стардо тынк удомсто.37Мезть ней тыненк кортан – тень весенень кортан: илядо удо, уледе анокт».


предыдущая глава Глава 13 следующая глава